Theite kung atanga zirtur

Theite kung leh hnimhlingnei danglamna hi I ngaihtuah ve tawh ngai em?
Hnimhlingnei chu aram neitu duhdan ang lo takin hling neiin a rawn thang chhuak a, theite kung erawh chuan a theih ang tawkah rah duhawm tak a chhuah ve thung a, a huan neitu tan chuan hnimhlingnei chu a dem awm ngawt ta ve ang.
Engvanga hlingneia rawn chhuak ta mai nge maw anih le!!.
Matthaia 3:7 ah chuan Baptistu Johana kam chhuak.., ‘ Rul thlahte u, thinur lo thleng tur hi tlansan turin tuin nge zilh che u. Chutichuan sim hming pu tlakin rah rawh u.”tia zilhna kan hmu a, engtin nge rah tura beisei an nih?
Chu theite kung chuan rah duhawm tak achhuah theih avang ngawt chuan hnimhlingnei chuan rah eitheih a chhuah ve turah kan beisei thei ang em?
Heti zawng hian I ngaituah teh ang. Hnim hlingnei hian ‘tui ka hmu tamtawk lo, theite kung hian ka nisa dawn tur ang min dawntir theilo’ ti ta se thiam kan chantir thei ang em? Chu a chhuanlam chu tihhlawhtlin sak nita se, Hling aiah theite rah eitlak a chhhuah theih kan ring em?
Biblein ‘Tuihna pakhat ata tui tui leh tui tuilo a chhuak thei em ni?’ a tih te, ‘Thing chu arahah a hriat ani’ atih te, ‘Theipui kungah lenhling an lo ngai em ni’ atihte hi engtia dawnsawn chi nge ni ang?,
Kan nuna kan chhuanlam tamtak chu ‘mite ang thil kan neih ve loh avang te, an dinhmun luah ang kan luah ve loh avangte, chhungkaw khawsak dinhmun avangte, an hlawh chhuah ang kan hlawh ve loh avangte niin kan hria a, …ve ila chuan …. kan ti thin.
Mahse hnimhlingnei leh theite kunga mawhpuh tur dik tak chu a chi ah ani. Hnimhlingnei chi chuan hnim hlingnei a to chhuahpui a, theite kung chuan theite ato chhuahpui mai chauh ani. Chuvangin theipui kungah lenhling an lo ngai lo a, theipui hutah theipui tak leh tui a beisei theih loh.
Kan thiamlohna leh kan sualna tehi kan bengper a, midangah te, thildangah te chhuanlam tur kan dap kual thin. Hnimhlingnei chuan chhuanlam tam tak dap dul reng mah se, Hnimhlingnei a nihna avang chuan hling a chhuah pui reng ang a, keini suala awm reng te hian that tum thin mah ila, kan nihna (sual) avang hian sualna chuan rah a chhuah reng tho ang.
Chu hnimhlingnei siamthat theihna awm chhun chu a chi ah a awm. Keini suala piang hi Kristaa piantharnaa kan in thlak angai ani. Chutichuan tupawh ‘Krista a awm apiang chu thil siamthar a lo ni a, thil hlui te chu an ral ta, ngaiteh a lo thar ta’,tih kan lo ni tawh ang a. Chutichuan ‘keini suala thi tawh engtinnge sualin kan la nun theih cheu ang’ kan lo ti thei tawh ang.
Tirhkoh Paula chuan chhuan tur tamtak zingah, ‘ka chaklohna te hi ka chhuang tawh zawk ang. Ka nung hi (hnimhlingnei chia to chhuak ni tawh loin) keima tana nung ka ni lova, Krista tana nung (theite chi thar a thlak danglam zawk)ka ni zawk e. Chumi avang chuan ka tan khawvel hi khenbehin a awm a(chu hnimhlingnei chi chu a thi tawh a,) kei khawvel tan khenbehin (hnimhlingnei chhuah thei tawhlo) ka awm a ni’ lo ti thei ta ani,

Van taksa ropuinan

Aw, Ka hun hi a tawiturzia hrereng la,
Mihring fate zawng zawng hi i va siam engmah lo em!
Eng mi nge thihni hmel hmu lova nunga
Seol kut atanga a nunna chhanhim tur chu.
Sam 89:47-48

‘.. Lalpa Pathianin leia vaivutin mihring a siam a, …’(Gen 2:7) Chungnungbera thiltihtheihna kut chhuak, a duh anga din leh siam niin, a nunna thaw avang chuan minung a lo ni ta. Tin, heti hi ani a, hlum atanga dinchhuah ve mai chuan a siamtu chu engmahlo a ngaiin ‘..vaivut i ni a, vaivutah i kir leh tur ani’ (Gen 3:19) tih anchhia chu ama duhthu ngeiin a lo rochung ta a,

Mahse, kan mihring taksa; vaivuta din leh vaivuta chang leh mai tur atan hian kan va thawkrim thin si em! ‘Mi zawng zawng hlobet ang an ni a, an ropuina pawh hlobet par ang ani’( I Peter 1:24) tihte hi a taka hmuh fiah a har thin anih hi!.

Naupang kan nihlai atangin kan chenna khawvela kan lo dinchhuah ve theih nan nu leh paten sum leh tha tamtak an seng a, ‘Naupang chu a kalna awm kawngah zirtir ula, a puitlin hun pawhin a thlah lovang’ tihte chu he kan lei taksa tanah hian min zirtir niber hian ahriat. Chutah vanglai hunin min rawn nang ching a, nula in khawvel hmachhawn tura a incheimawina sen ral zawng zawngte, mipain anihna aia ropui duhna avanga a insenso na zawng zawngte hi ngaihtuah teh! ‘Ngaizawngtu hmuh theihna turin I awmdan I va uluk ve’ (Jeremia 2:32) tia Jeremia zilhna awka hi kan tunlai hun nen hian a inrem ngawt lovem ni?. Ngaihtuah teh ‘Lawilo’ dawrah ‘Thil Lawilo’ buaipui hian kan hmanhlelh ani ber lo maw!.

Chhungkua dinin damlai ni chu thlantui nena chhiar liam hnu leh, ‘zingtakah intho a, tlai takah in chawl a, in thawhrim rah in ei thin hi a thlawn ani’.(Sam 127:2) tih chu nunin ataka alo dai hnu meuh chuan alo tlai zo tawh lawi si a,

Zirtirtu zirtirna ‘Leiah intan rote khawlkhawm suh u, vanah intan rote klhawlkhawm zawk rawh u. In ro awmna apiangah in rilru pawh a awm ang’(Matthaia ) tih thu te chu ataka nunpui ngam har mahse, amah Lal Isua zilhna ‘..., fimkhur rawh u....damchhung khawsak ngaihtuahna nen, in rilru a khat lutuk hlauh ang a, chumi ni chuan thang awk angin thawkkhatan inchungah alo thleng phut ang. Chutiang tak chuan lei chung zawng zawnga awmte chungah chuan a thleng theuh dawn ani’ (Luka 21:34-35). tih hmangaihna awka hi I zir nawn leh ang u. Chutiang chuan he kan lei taksa, vaivuta din leh vaivuta kir leh mai tur atan hian eng ang takin nge kan inchhek dawn tih hi kan ngaihtuah fo atan leh kan nun kaihruaitu atan hman tum thin ang hmiang.

‘Atawp berah chuan unaute u..’ vaivuta din mai mah ni ila, keini Krista ringtu te chuan amah Krista avang chuan beisei tur kan nei ani.‘kan awmna leia in hi thiat mah sela, vanah, in kuta sak loh, chatuana awm tur, Pathian hnen ata in nghet chu kan nei tih kan hre si a’ (II Kor 5:1). Chumi beisei tur nei kan ni hi kan va nihlawh em!

Chutih avang chuan hawh u. kan lei taksa ‘vaivut’a din ni lo, kan van taksa ‘thlarau’ chatuan ami tur tan; kan lei in ‘ropuina lem’ atan ni lo, kuta sak loh ‘vankhawpui’ tan hian i in khawlkhawm zawk ang u.