‘A tirin Pathianin lei leh van a siam a’ Genesis 1:1
Lei hmun hnuaihnung bera mawi taka siama ka awm lai khan Ka ruhrel chu i lakah thupin a awm lo.Ka riruang la famkim lo chu i mitin a hmu a, I lehkhabuah chuan ka pengte zawng zawng hi ziak vek a ni a, A ni tela siamin a awm zel a, A pakhat mah la awm hmain. Sam 139:15-16
“A tirin Pathianin lei leh van a siam a”, Mihring hun reilote dama, hriatna leh finna tawp chin nei hian engtikahmah hei bak hi chu kan chhut chhuak zo lo ang. Lungawi taka ‘atirin’ tih hi pawm mai tur kan ni. Chutiang chuan thilsiam te chu Siamtu Pathian in a siam dan ang ang in, chutianga inthlahchhawng zel bawk in, zawng chu zawng thlah turin, science chuan “mihringte hi zawng thlah kan ni” lo timahse, zawng chuan zawng a thlah kumkhua ang tih hi Pathian thuruat a ni.
“Tin, Pathianin a thil siam tinreng chu a en a, ngai teh, tha a ti em em a”, a engmah hi ‘hei chu duhthu a sam chiah lo hle mai’ a ti lo a, chuvang chuan thildangah ‘inthlakthleng teh se’ pawh a ti lo. Zawng hi a pian a fuh vak lo a, mihringah chang chho mai teh se’ a ti hek lo. An nih dan ang ang a an awm chu a en a, tha a ti em em vek. An mahni leh an mahni ngei pawh chuan lungawi lohna an nei lo nihmiang. Kan piantirh atanga bu tawh Bawng kha tun thlengin a ala bu a, thildang a la zir belh lo reng reng. Kan pi pute ngei pawh in ‘Sunhlu kungah thei dang a rah ngailo’ an lo tih kha. Sunhlu hian a kum tam tawh vangin kawlthei a rah lo.
Keini mihringte erawh chu din kan nih dawn atang reng hian Van khua Assembly Session chu an thu a, "Kan anpuiin, keimahni ang takin, mihring siam ila” tih chu an thu ngaihtuah a ni a, lungrual taka tihthluk a nih hnuah, nang leh kei hi siam kan ni. ‘Zawng khuan lo thlah mai teh se’ an ti chu ni se la, ngau thlah leh hauhak thlah hi kan huk dum dum ta ve ang.
Thilsiam dang zawng zawng chu thu maia siam an nih lai hian, nang leh kei chu Pathian in ama kut ngeia a din leh siam kan ni lo maw! “Tin, LALPA Pathianin Ieia vaivutin mihring a siam a”. Pathian kutchhuak dik tak, he khawvela anpui reng reng nei lo, Amah Pathian anpuia din kan nih te hi a va ropui em. Thilsiam dangte tan hi chuan kan lo thik awm ngawt dawn a lo ni.
Kan nunna hi he khawvel thildang zawng zawng nunna nen khaikhin phak rual loh a la nileh ta zel. “a hnarah chuan nunna thaw chu a thaw lut a; tichuan mihring chu mi nung a lo ni ta a” Pathian in a nunna thaw min pek hmanga nung kan nih hi kan hriatreng a pawimawh asin. Thilsiam dang zawng zawng nunna chu thu maia pek an nih laiin keini nunna chu Pathian atanga kan chhawm a ni. Zawng atanga in chhui zawm hian Pathian atanga siam kan nihna te, a nunna tawmpui kan nihna te, amah anpui kan nihna te a tibo vek. Chuvang chuan kei chuan zawng thlah nih aiin Pathian zawmpui nih hi ka thlang zawk.
Heng ang taka nunna inzawm nei hi thilsiam dangah an awm lo tih hria ila, Pathian nena kan inzawmna hi Amah nena leng dun tura siam kan nih hi I hre thar leh ang u.
