Hyderabad Mizo Freshers’ 2013

 ‘Thalaite u, in thatlai chen ula, In la naupan viau lai hian hlim rawh u’ tih zawng Mizo te hian kan lo mil ber mai, khawi hmun pawh hi nuam kan ti, Hyderabad alo nuam zual. Sum tam tak in a lei chhuah rual loh inunauna nen thuthmun kan han rem tlang thin zawng khuanu remruat hi kan tihlawhtling bik hian a hriat a, ‘lokal ru, i fak ang u’ tia insawm hran ngai lo hian Siamtu Pathian hi kan fak bik hliah hliah hian a hriat. Chutiang boruak nuam leh zangkhai chhim tur chuan incheina hranpa i mamawh lo a, i nih ang ang khan pawm i ni a, thir gate karah khan rawn inzep lut ve phawt mai teh.

Hun hi kan ta

Kal tlai deuhah i inngai mai thei a, mahse, helaia awm ho zawng hun thuhnuaia awm kan ni lo a, kan thuhnuaiah hun chu kan dah zawk tlat avangin hun hian min tibuai ve lo. Tan hun te chu kan inlungrual theih deuh nana chhawp chhuah ve mai a ni a, hmun tin kil tin atanga fuan khawm, a then Bus tawt ah, a then kawng tawt ah, a then mihring tawt tak karah, chutianga rawn inzep phei hram hram chung chuan a hun a thlen leh thlen loh hi kan thiltihtheihna piah lam a ni. Chuvangin tlai deuh mah la, tan hun takah i thleng a lo ni zawk ang. A reng thuah a hunah tan tur tih fo hian a hun a lo thleng hman lo te kan ti hrilhhai lutuk a, a rualkhai thei ang ber zel zawn hi tha kan ti zawk.

Khual chhawn

A luhka i rawn chuankai hma hauhin ‘E, lo thleng thei maw, nang chiah kan lo nghak tawh che a nia’ an lo ti ang che, mahni lamah pawimawhna neilo tih inhrereng mah la, ‘keimah chauh nghaka an lo tawi khawmuang chu’ tiin mihring nih ve manah hlu ta riau a inhriatna te pawh i nei thar ang. Han hawi vel la, tupawh maiin hlimsanga an lo chhawn che i hmu ang a, thlarau lam pawlna chan thar sawi tur hre meuh si lo in i thla a muang veng veng mai ang.

Kailawn tawite rawn chhiar chhoin luhka i rawn chuangkai ang a, bahsamsei hmel ngaihnobei tel bawk si in duhsak takin an lo chhawn ang che, chutah zet chuan i lo awih ngai loh ‘vawikhat hmuhna ah hmangaihna a piang thei e’ an tih te chu i hrechhuak ang a, tunhma zawnga inhmu ngai si lo khan a lo duh ru hle che ah te pawh i ngai hial ang. Nia, khualchhawn dah tur te hi an uluk thei bawk a, an dah fuh thei viau a nia. Hmel, chezia leh nungchang thleng a mi entawntlak an duh thin. Chutiang dah tur chu keini Hyderabad kan hausakna lam tak a la ni lehzel.

Duhthlan theih hun

Khualchhawn in thutna an kawhhmuh kher che i nghah chuan tui lo deuhin i thu tluan chhuak hlauh thei. Chuvangin mahni inbengvar la, Vai ram hmun dang ang lo takin hmeichhe thutna leh mipa thutna kan siam hrang lo a, nangmaha i thu hrang duh tlat anih chuan thudang, anih lem loh chuan han hawi vang vang la, i hmeltha tih ber bulah khan han thu chat mai teh le. Thusawitu in sawi tur a duham poh leh i hlim chhung a rei a ni mai. Mite chuan Program hman zawh hlan an nghakhlel ang a, nang chuan hmanhmawh hlawm viau in i hre ru ang.

Zai leh lam in bul an tan ang a, duh thlan theihna nei i nih kha, i hla duh ber mai ‘E khai, hlim rawh u, nui rawh u’ tih kha a copy an lo sem kher bawk a, han thlang thuai la, anih loh chuan an thlan khalh ang che. A thlangtu nih hian a hranpain lawmman keng tel lo mahse, mitin in phur taka an sak sak che i hmuh chuan, thlang fuh ta berah inngaiin ‘vawikhat dang nui lehin’ tih pawh vawi sarih i nawn tluk tluk duh ang.

‘Chuzawng chu maw duhthlan tur’ i lo ti ngawt ang e, kumin atana an nula tlangval neih thar ho an rawn tilar dawn a, lo hriat tam chu a har maithei, Mahse, duhzawng lo thlana lo hriat chat erawh chu har i ti kher lo ang. Duhzawng han tih lemah an duh ve kher ang che tihna chu a ni lo a, NLUP sema sem an tum ho an rawn tarlang pawh a ni chuang lo. Lo ralkhat duhve tawp la, hma i lak thiam leh i vannei ang a, i thiam vak loh chuan i theihnghilh leh mai dawn nia.

Dawhsan cheimawi leh changtu te

I luh tirh a i mit latu pakhat chu an dawhsan chei kha a ni. Mawlmang tak, sum leh pai tamtak senna ni si lo, kan phu leh phak tawka mawi leh hmuh nuam kha hmun dangah i la hmu kher lo maithei. Hall chhunga lo chuang lut apiang te mit fukna hmasa ber anih avangin uluk taka chei a ni a, tin, thlalak apianga lo lang ve chhen anih mai piahlamah nang aia thlalak pui duhtu hmu hnem zawk anih avangin chei a phu a ni. A senso phu loa nalh leh hmuh nuama rawn cheitu te an fakawm.

He dawhsan chang pha tur hian a thlarau chang sa nazawng a ni ngawt lo a, ram leh hnam tana inpekna nei thinlung, a tul dang ang zela inpe ngam kan thlan chhuahte an ni. ‘Nangmah i inhmangaih angin i vengte i hmangaih tur a ni’ tih a taka nunpui ngam te an ni a, mahni in en hmasa lo khan chu dawhsan chu chan i lo beisei ve ngawt ang e. Sum leh pai, tha leh zung, hun tha tam tak senga hnamdang zingah kan Mizo hnam lo khaiding tu, a saptawng kan hawh dawn chuan lo ‘champion’ pui tawh te an ni a, hmanlai ang chu nise, Nopui dawm thei vek an ni.

Kan mikhual duhawm te

Kan session min kaihruaitu, Freshers’ te mikhual a, inhmelhriatna hun tha tak rawn huaihawttu te kha a hranpa ngata kan chahchhuah te emaw i lo ti ang e, Hyderabad zawng talent hrang hrangah hian kan hausa ka tih tawh kha. Nakin maia u chan rawn chang tur nula tlangval duhawm tak tak kan nei rui mai kha thla a muang. Zangkhai tak, tawifel tak, hlimawm bawk si, an zinga han dinchhuah ve mai te pawh chakawm i ti lo maw. An talent neih tha tak tak te kan phochhuah sak vek hman lo che a, tin, i rilru a i lo ngaihtuah zawh atana i duh thenkhat an rawn zawh tak loh te pawh a awm maithei. Mahse, chung zawng zawng an lo zawh khalh che chuan i biak fal hunah i hil lutuk an hlau a, i kawm tlangnel theihna tawk an rawn zawhsak che kha nakina i lawmna tur a ni. 

Ei leh in

Kan insenna nasa ber leh kan inlungrualna ni bawk si chu ei leh in tuihnai buatsaih hi a ni. 'Thingpui leh chhang chauhin kan nung tur a ni lo' kan ti a, Buh leh sa hi kan nunna pakhatah kan chhiar tel. Kan pi leh pu ten Pialral an lo thlakhlel na chhan pawh ei leh in, faisa ringa awm der der anih kha maw! Hei zet hi chu kan chhawm nung tha khawp mai. Ren ngai map lo buh leh sa, ding leh vei bo map khawpa kan han ei thei hi chu Pialral dang kan ngai lo. A siamtu lamin theihtawp chhuaha tui tura an siam sawi tui leh ngaihna a awm chuang lo a ni bawk a, ‘kan puar e, kan fan e, ngalfimin dam rawh se’ ti kha kan tih ve chhun ni mai se.

Neuh neuh

Kan hrut vek seng lo, haw hmain Excise zu dapin in dap thuak thuak teh ang! A hmunhma ah duhthusam thei ber turin nikhat hnatlang neih a ni a, Program kan chherchhuan dan a tha tawk a, tul lo a hun khawhral emaw, pawhfan emaw a awm lo a, engkim a tawi fel thlap. Bungrua te a nih tur angin kan rem fel tha a, rimawi leh tawngrinna ten kan hun hman min ti phuisui. Kan duhthusam lo lai te kha chu kan sum leh pai dinhmun in a tlin bak a ni ve a, Member ten phur taka he hun kan hmang tlang mawlh kha a ropui. Kan inlungrualna vul zel rawh se.

Kan Felna Lalpa

“Kal la, heng thu hi hmar lamah va sawi rawh, ‘rinawm lo Israel, lokir rawh, tih hi Lalpa thuchhuak a ni. Thinrimin ka en reng lo vang che, Zahngai thei tak ka ni si a,”(Jeremia 3:12)

Tin, Isuan a hnenah, "Kei hi thawhlehna leh nunna chu ka ni; tupawh mi ring chu thi mah sela a nung reng ang’ (Johana 11:25)

Kan sualna te leh kan thatloh te anga min thungrul ngai lo tu kan Pathian chu fakin awm rawh se. Famkim lo mihringte kan ni a, he kan lei damchhung ni ah hian kan famkim ngai hek lo ang. ‘Mihring ngaihtuahna te chu an naupan tet ata a sual si a’ (Gen 8:21) tih hi tisa lam thlira Pathian hmaa kan lan dan chu a ni reng dawn. ‘Tu mah thil tha ti reng an awm lo’ (Sam 53:1) tih ang chata min hrechiang tu awm chhun chu min siamtu Pathian chauh hi a ni.

Mahni leh mahni kan in en thin a, felna tehfung te pawh kan hmang ve bawk thin a, chuta kan inhmuh dan chu a chang chuan kan felin kan hria a, kan thla te pawh an muang ve huai a, a chang erawh chuan kan in teh fel zo lo a, kan thla te pawh an phang leh a, Pathian lam hnaih tula hriatna te kan han nei leh rih thin a, kan thiltih that leh that lohah kan lo inbuk mai mai a ni lek fang a, kan nihna tak leh kan chhungril erawh chu thiltha tih leh tih loh vang maia inthlak sek a ni ve si lo. Tirhkoh Paula te meuh pawhin ‘mirethei ka va ni tehlul em’ (Rom 7:24) tiin an lo aupui ve bawk kha.

Kan tunlai khawvelah he felna kawng hi nasa takin zawh kan tum a, Kristian te chauh pawh kan ni lo, sakhaw hrang hrang te pawh hian mihring mihrinna a felna hi he kan damchhunga kan thlen hman tur, a saptawng te kan hawh dawn chuan kan ‘finishing line’ ni in, chumi avanga nun lo awm leh tura lawmman la tur ni ah an inrin tir a, chutiang ang deuh bawk chuan keini Kristian te pawhin kan nunah thalo ni a kan hriat lakah kan insum a, sual nia kan lo hriat ve te atangin mahni in kan inthian a, abikin ‘Piantharna’ kan chan hnu hian chu felna kawng chu kan zawh ngei ngei tur ni in kan hria a, ‘keini suala thi tawh engtin sualin kan la nun leh theih cheu vang’ (Rom 6:2) tih angin, mahse chutiang tak chuan kan fel tluan chhuak meuh em?

Chu chhungril lam sual nihna alh awm reng chu kan thlamuan ve chang ah te, engemawhlek a lo thlenah te Sualna lalpa chuan remchangah hmangin a rawn chhem vam a, kan tih ve chhun leh kan nun kan hman dana felna kan lo neih ve chhun te chu vawikhat chhemah min chhemkiansak vek thin a ni lo vem ni? He khawvel felna kawnga mi inserh hrang sakhaw dang zingah te hian an va tam em. An hun leh nite midangte tana hmanga, mahni taksa nawmna hlana ram leh khawtlang in a lo that phah na tura an thisen hlan tu te hi kan tluk emaw chu? Eiruk do nana chaw vawikhat nghei ai chuan eiruk tur a awm chuan malsawmna a ngai Kristian te kan ni lo vem ni? Kan unau eitur mumal neilo khawlaia chengkhat tal beiseia min thlir laia mahni inchhunga khawvel changkanna kan phak ang tawk tawk a chen thin te kan ni lo vem ni? Mahni tihtur a ngaih ai chuan midangte hmangaih tura midang beisei thin kan ni lo vem ni? Kan thinlung theuh hi in X-ray sak teh ang u, Pathian chu sawiloh keini pawh hian ‘mifel sawm tal an awm phawt chuan khua chu ka hrem lo mai ang e’ (Gen 18:32) kan ti duh hial ang.

‘Chuti chung chuan i felna Lalpa hnena kir lo hian i la awm cheu ang maw!’ tih hi Lalpa thuchhuak a ni ta. Pharisai ina Lal Isua hriak thih tu tana tehkhinthu a sawiah ‘A sual tam tak kha ngaihdamin a awm ta; ani pawhin a hmangaih ta em em a nih hi; amaherawhchu ngaihdam tlem chuan, tlemin a hmangaih thin’ (Luka 7:47)a tih angin mahni sualna hre chiang apiangin kan felna Lal Isua hi kan hmu chiang ang a, kan mamawhna kan hria ang a, a hlutna kan hrechiang ang. Ani chuan kan thiltih angte a min buk lo in Krista Isua kan rinna ah chuan kan felna min chhiar sak si a ‘Rinawm lo mihring, lokir rawh, zahngai thei tak ka ni si a’ tia sawmna hi kan beisei tur awm chhun a ni. Pianthar hma zawnga fel theih loh avanga Pathian ram lut thei lo khan pianthar hnuah felna avangin Pathian ram luh i in ring ngam chiah maw! Nakinah zawng mahni felna chhuang tu te chuan an fel lohzia an la inhmu ang a, Krista felna chhuang tu te chuan an tana Krista hlutzia hi an la hmu fiah ang. Mahse, kan tun damchhungah hian kan sualna leh tlin lohna kan hriat nasat a, ngaihdama kan awmna kan hriatchian poh leh Lal Isua Kristan kan tana min thawhsakna hi kan hre chiang ang.

Pathian kan hmangaihna

Babulon luikamahte, chutah kan thu a, A ni, kan tap thin…… Mi ramahte chuan, Lalpa hla engtin nge kan sak theih ang? Aw Jerusalem, ka theihnghilh che chuan, Ka kut ding lam hian a thil thiam hi theihnghilh ve rawh se. Ka hriat reng loh che chuan, Ka lei hi ka dangah bet tlat rawh se; Ka hlimna ber aia Jerusalem ka duh zawk loh chuan.(Sam 137:53).

Pathian min hmangaihna hi kan sawi vul viau a, keini lamina kan hmangaihna erawh sawi vul tham a awm lo thin. Hmangaih puanchhuahna hla mawi leh ril tak tak kan nei thin a, a thu leh hla zawng pawhin kan hausakna lam tak pawh a ni awm e. Chung zingah chuan Israel ten Jerusalem an ngaihhla tluk tur hi a awm ang em aw! Jerusalem theihnghilh ai chuan mihring pangai nih loh an thlang hial a, thildang zawng aia Jerusalem an thlahleh loh chuan hlimna zawng zawng hi an tan engmahlo ni hial se an duh a ni.

II Chronicles 36:21 ah chuan hrilhlawkna ‘LALPAN zâwlnei Jeremia hmanga thu a lo sawi chawlhni serh thei lova an awm chhung kum sâwmsarih, chawlhni an serh leh theih thlengin, ram chu tihtiauvin a awm ang’, tih thlen dik thu kan hmu a, Israel te chuan an mahni chawinungtu Lalpa thu chu an zawm lo a, Pathian thupek te chu an hawisan avangin anmahni hrem nan Babulon lal kutah salah a tantir a, an tan hun chhung pawh kum 400 chuang zet a ni. In hrem nan chuan a namai lo kher ang. A chhuan ang zawng pawhin chhuan li/nga an liam a, Sal turin an inthlahpung a ni ngawt a, a hreawm dan tur hi kan chhutpui thiam kher awm lo e.

Chu an retheihna hmun atang chuan Jerusalem chu an han hrechhuak a, Jerusalem hi a khaw nawm em vang emaw a sik leh sa vang emaw a ngai leh thlahlel an ni lo a, an Pathian khawpui, Pathian an biak theihna hmun awmchhun, Pathian nena an lendun theihna hmun a nih avanga thlahlel an ni. A kum zabi tehmeuh sala an tan hnu ah chuan an Pathian chu theihnghilh der a, an saltanna te pathian leh ngaihdan te tawmpui hial tawh zawk awm tak an nih lai a, heti taka an Pathian hmangaihna thu an la auchhuahpui thei hi zir tlak a ni.

Kum za chuang Kristian ram kan ni ta a, Heti khawpa chhum lo chat lo a inzirtir a, mahni ram ngeiah thlamuanga Pathian kan au chung hian tun hi kan dinhmun a ni a, tuna thlarau lama kan pate hian min la liamsan ang a, chhuan thar in an la rawn kaihhruai hun ah chuan eng ang nge ka nih ang tih te pawh hi ngaihtuah tham tak chu a ni. Mi ramah te awmin Pathian hre lo hnam hian kum zabi tehmeuh min han awp se chu kan Pathian chu sawiloh kan hnam zia leh nunphung thleng hian kan kalsan vek mai lo ang maw.

Israel ten heti ema an thinlunga Jerusalem an ngai thei mai hi eng ang takin nge an Pathian chanchin leh zirtirna hi an inhlan chhawn zel tih pawh ngaihtuah tham a ni. Heti khawpa hmangaihna, inpek na, mahni taksa peng zawng zawng te nihna leh theihna te ai pawh a an thlan hial zawk khawpa hmangaihna hi an hmangaih Pathian tan hian chhanloh chi em ni ang. Han chhiar han chhiar i la, hetiang khawpa hmangaihna nasa hi mihring hian an nei leh thei ang em? ‘Naupang chu a kalna awm kawngah zirtir ula, a puitlin hun pawhin a thlah lovang’ Thufingte 22:6 tih te hi a takin an nunpui ni ngei tur a ni.

Keini ina kan Pathian kan hmangaihna nen te hi chuan khaikhin chi pawh a ni lo. Kan Pathian hmangaih dan hian mahni inhmangaihna a keng tel tlat a, kan chan na turah chuan chhuanlam hmangin kan inthiarfihlim a, khawvel thila kan tih theih te chu Pathian tan chuan kan thei lo fo a, chuti chung chuan inpekna te chu kan la tuipui em em tho a, sum leh pai, damchhung khawsak duhamna te nen kaikawp tun chungin Pathian hi kan hmangaih ve a, Israel, hnam helhmang kan tih zawk te khian an Pathian chu an lo hmangaih zawk daih a ni lo maw!

Israel te hian an thlamuan lai leh rahbeha an awm loh lai chuan an Pathian chu an lo theihnghilh thin a, hremna tenau zawk te hmangin Pathianin a zilh thin. Mahse, chu chuan awmzia a nei rei thin lo a, chhuan thar an lo chhuak a, angai ang bawkin an Pathian chu an hawisan leh mai thin. Chutianga kal zel chuan he kum 430 sal tanna hi an tawngbaw ta a ni.

Han chhut han chhut ila, kan ram zimte Zoramah pawh hian tunhma Pathian hre lo a lo neinung leh nuam lo chen tawh thinte chhuan chhui tlak an awmloh zia te hi kan ngaihtuah ngai em? A ram ang zawng pawh ni lo in a veng ang zawng pawhin tunhma a zu zuar chhungkua tunah tumah sawi zui tur awm ta lo, zuih ral ta hi kei ngei pawh hian ka hre tlat. An nu leh pate tak chuan an chhuan te rawn awmzui dan hi an hmu pha lo. Chutiang ang chi tuna tukhawkha ngaihsak tak loh te hi hman huna Pathian lo hre duhlo te an ni duh khawp asin. In chhungkaw History phak tawkah chhui la, pi leh puten Pathian an lo tihna rah te, Pathian hre lo a an lo nun rah te i chhiar thiam tawk chu a awm ngei ang.

Hetianga Pathian hmangaihna tak tak nen lo a kan mimal nun khawvel te, Zoram khawvel hi kan la hmang chho zel anih chuan Pathian thinurna tawp hi kan la tawngbaw thei dawn khawp, chumi hun hma a harhchhuah hi kan va mamawh em!

A liampui ta si

A chang hi chuan duhthusam ram atanga duhzawng thlang te hian kan buai a, a tak ramah erawh chutiang ngawt a lo ni lo, duhthlan chu sawi loh, duhthlan tur aikal pawh hmuh zawhloh theihna khawvelah hian duhthlan tak chan loh hi kan thiamloh pawh va ni suh! Chutiang thawnthu te chu lehkhabu ah chauh a lo ni lo, hun inher zel hian kan nunah pawh a lo her chhuahpui thei a lo ni. ‘Mipa tan cho rual loh a awm ngai lo ve’ an lo ti anih pawhin tun tum zawng cho chhuah rual loh a ni tlat.

Hun liamta ah te chuan

Tunhma chuan thinlung lam hmangaihna nge hmel duhna tih hriatloh luitui luang laiah khan kan lo cheng ve thin a, kan duh leh kan liluh a, kan peihloh hun tikah kan inphorosan leh thin. A hunlaiah na na na kha chuan chutiang reng turah riak pawh kan dah. Kum a lo tam a, rual u zawk chan kan lo chan tak hnu hian chu luipui chuan min luan liamsan a, a dai pawh kan dai pha ta meuh lo a nih hi.

Ani tak a, hmanah chuan hmangaihna kan tih te chu dil theih thil a ni a, kan dil a, kan ngen a, kan ngen chhuak mai lah tak a, tunah erawh chuan ngen ngam tur alawi ka awm ta lo a, kan han ngen ve chhun te lah kan hmu ta mai lo nen, ‘ka va tih luatah lengin ka zir sual e’ tih ang maiin ‘ngen loh tur ka ngen ta em ni’ ka ti rum rum.

Chutiang chuan a ni, a vawikhat na atan Biakin kawtah ka hmu a, ralkhat hmuh mai phei zawng ni mahse a sam phe siau siau kara a mitmeng mawi tak te, a nui hmel thlir ninawm loh te, a incheina phuah remtu a fuke duhawm tak te hmuh hmaih rual a ni lo, a belchiang tura va panhnaih a ngai lo a, ralkhat atang pawhin lung a dum zo a, van chungsanga nisatna in hnahchhawl a em vuai ang maiin ralkhat atang pawhin ka uai zo ta. An sawi ‘vawikhat hmuhna ah hmangaihna a piang’ an tih kha a theih em loh pawhin engemaw ti taka duhna hi chu a piang thei e. Mihring chu bawlhhlawh sa a piang tiin lo sawi thin mahse, a maha Siamtu kutchhuak hnuhma hmuh theih chin zawng han thlirin hei zawng bualfaia piang a ni ngei ang.

Khawilo ramchhuak pheichham man an sawi ang maiin ngaihtuahnain duhthusam nen a umzui a, tui ang nem biahthu hlanpuiah a sawm a, a pawm leh pawm loh lam hre hman loin runhmun rempuiah leh fanau maltluan chawidunpuiah a keuhthlu fel der a, ‘damchhung mi hmuak apiang I tirh ni se’ tia khuanu hnena duhthusam sam awl ber tum a ni.

Chona hautak

Chutin kan inhmu zeuh zeuh a, ka ngaina zual ta deuh deuh a ni. Chu ngainatna chuan hmangaihna lamtluangah pawh min lo hruai thei hle dawn a lo ni a, hriatloh chhungin chu zinkawng zawh tur chuan ka inpeih ta ut mai. Mahse, chu zawng khawvel dang a ni a, mahni a zin mai theihna pawh a lo ni lo a, a zinpui tur ber hmin phawt a ngai si a, zin tura inpuahchahna hahthlak ka hmachhawn ta reng mai.

Mite anga hmangaihna zawlaidi benga hriatna mai nilo thinlung chhungril thleng phak fah thei te ni ila tia duhthusam chang a awm a, khuanu hian mumang ram lamah ka ai rawn awh thut se tih chang te pawh ka nei. Khawilo hmangaih thawnthu ka chhiar liam tak anga engemawti zawng deuha rawn inherchhuak mai tur ang te pawh hian ka beisei thin a, mahse, chung zawng zawng chu mumang ram a mi an ni a, herchhuah ni reng a awm si lo.

'Chung ang duhthusam nite chu herchhuak lo mahse lawm zel tang e' tih ngawt chuan min hnem zo lo fo a, rauthla a lenga va rim ngawt pawh duhkhawp a tling zo lo fo. chung hunah chuan muthilh tum ngawt in awmzia a nei lo a, ‘hmangaihna tia an lo aupui thin hi beidawn pui tur mai chauh em ni’ tih rum rum chang a awm. Han thinrim pui ngawt dawnin awmzia a awm der bawk si lo a, beidawn tawpah khawi lo thlalak hlui hai ruk ruk mai te pawh a awl tan ta.

Hlimni zeuh zeuh

Engemaw tih nikhua a lo thlenin a duhawm tawk chauhin a rawn inchei ang a, a sira kal ve nih mawlh ka lo thlahlel thin. Eng thuam pawh rawn inbel se, kei ka tan a mawi ber fo a, mawipui theih incheina ah zawng Siamtu malsawmna a dawng bik hian ka hre thin. Hriat phak tawka a rawn nui ri te chuan thlasik zan reh laia fak hla sakin lunglen a kaitho ang maiin thinlung a fan chhuak thei asin. Chung nikhua te chuan eng hmasawnna em hai chhuak thin lo mah ila, ‘ka kianga i awm phawt ka tan khuavel a par leh thin’ tih ang deuhin ka lo ralkhat hlimpui thin.

Khua hmuna leng mah ni ila, mahni seh seh mual hranah ti niawm takin kar kan tluan a, Pathianni lo her chhuak turte chu Tlumtea thlirin ka thlir ta fo mai. Hun dangah chuan Pathian biak inkhawm te chu mawhphurna pakhata ngaia tihhlawhtlin thin a ni a, tunah erawh Pathianni karkhata vawikhat chauh zawng a tlem lam deuh a ni tia auchhuahpui te pawh ka nap ta mai, inkhawm chhun ah pawh ani nge ka hnaih zawk a ni neitu Pathian tih ngaihtuah tham a tling ta. A kiangah zawng Siamtu Pathian; a thilsiama fak hi a nuam bik a, a hmangaihna chanchin te chu hrethiam ta riau hian ka inhre thin a, chu ni reilote chuan min va muan thin em!

Khawilo chhuahvah kan neih ho chang a awm a, beiseina tisang tu an ni. A hlat poh leh beisei leh beisei loh tawn tur a tam mai a, a rei lam thu lah rei lua a awm thei si lo. Mahse, Pathian thuin ‘thawk lo chuan ei pawh ei suh se’ a lo tih ang maiin beiseina ngawt chuan amah maiin rah chhuah tur a nei si lo a, ni lo chhuakah tlang bawhtu chhum te a zamral thin ang maiin boruakah a thamral zel a, chhawm nun zui tak reng ka nei lo.

A liam dawn ta si

Mihringa duhna awm hi hmangaihna ah kan chhiar dawn anih chuan Hmangaihna hi hmangaihna mak tak a lo ni e. Pathian hmangaihna zawng dawhsanah kan aupui tak lawm lawm a, Ani ka hmangaihna ah erawh ka inchaih buai. Mihring hmangaihna zawng a derdep em a, au chhuahpui tlak loh hmangaihna te pawh ni hmiang, Zing nichhuak duhawm tak hian huaisenna thar rawn her chhuahpui thin mahse a kiang ka lo thlen meuh erawh chuan huaisenna zawng zawng chu engmahlo an chang zui thin si.

Chutiang chuan hun thar kan chuang kai a, kan inkar thawnthu ah bung thar erawh ka kai thei si lo. A pawi ta ber mai chu chu hun inher chho zel chuan thenna ni te pawh a rawn her chhuahpui dawn ta. Mite angin an sawi hmangaihnaah la inchiah em lo mah ila, kar hla dana min han awmsan dawn meuh chuan tlangkhata len chauh pawh a lo thlamuan thlak tih ka hre chhuak a, hun liamta te chu ka ui thar leh hnuhnawh a, kohkir rual a ni si lo. Chutiang ngawta nun bung khat han ziah tawp mai chu hreh viau mah ila, ka duh avanga duhthlang thei ka ni ngawt bawk si lo.

Kha chen ka tana malsawmna a lo nih ve dan te chu a thu leh hla zawng pawha puanchhuah a chakawm, mahse, chu zawng ka thiam phak bak a ni a, min beisei lo mai zawk a ni ang chu! ka thiam tawk chu ‘engemaw changa min duhsaktu lo awm ve hi an hlu asin' tih zawng a ni mai. Chumi piahlam zawng Bible hla thlankhawm zinga mi ka khawnkhawm anih ngawt loh chuan sawi belh tur ka hre lo.

Chutin huaisenna zawng sawm khawma nang ngaih biahthu thiam tawk te a ka han thailan tak kha chhan lohin a liampui ta si a.