HMA Day hmangtu kan thalai fel tak tak te chibai ule.
Vawikhat atan kan lo piang a, kan tum leh hriatlawk pawh niloin, Hyderabad
khawpui nuam tak maiah kan lo tla lut ve a, kan hun liamta lamah kan
ngaihtuahna kan senglo ang bawkin kan hun lo la awm tur atan kan ngaihtuahna
kan seng chuang lo mai thei a, kan nitin hun hman mekah kan nuam tih zawng anga
kan awm theih chuan chu bak han beisei leh chuan tur kan hrelo pawh a ni thei
e. Nia, Vanglai hunah hi chuan engmah kan rilru han kamtu hi awmlo se,
pangdamin awm ila, ngaihzawngte pawh nei rei rui ila kan nuam tih zawng anih
chuan; anih loh leh kan chakzawng ang ang eiin in ila, rilru hahna tur reng
reng nei hmanlo lekin phak tawk zelah nun hi chen ila, vawikhat pian manah pian
man a awm nge nge ang chu.
Kan Pathian thu chuan kan vanglai hun nawmzia hi min
hriatpui a, chen tur pawhin min duh a, mahse, thil pakhat kan hriat reng tur
chu ‘I Vanglai hian i Siamtu hre reng rawh’ tih hi a ni. Helamah hian heti
zawng hian vawiin ni a lokal khawm te i han infuih thar teh ang.
Kan vanglai hun a ni emaw kan puitlin hun a ni emaw
kan NUNNA hi chin hriat a ni lo a, engtik hun pawha liam puat thei reng a ni a,
chumi anih avanga nun kherkhiap leh inveng reng renga hmang tur chu kan ni si
lo. Chutianga kan nung a nih chuan dam hlutna kan pawh pha si lo ang. Sum leh
pai te pawh hi a hlu viau na a, hman zawh puat theih a ni a, thla tira nei ve
im em pawh thla tawpah chuan a thir nawi dap khawm leh rak rak thin te kha kan
ni a, chumi avanga inren reng reng leh chhut thlip thlepa hman erawh chuan sum
hlutna kan tibo leh lawi si ang.
Kan ngaihtuah ngai emaw kan sum leh pai te hi a
tlaran zawng leh a peipung zawngin a hman theih a, hmana harsa ve tak tak ni a
kan hriat te pawh kan el phakloha awm ta kan hre nawk ang a, chutih rualin
hmana kan boss ni thin tuna min tlawntu ni leh ta zawk te pawh an awm thei e.
Chung chuan sual kawng emaw an zawh tih lam a ni lo. An sum leh pai te a
peipung zawngin emaw a tlaran zawngin an hmang tihna mai chauh a ni.
Kan zirna
kawngah pawh hian kan hun neih tha tak tak daihzai taka hmang kan awm laiin
thenkhat chuan kan chenral mai mai a, ni khata darkar in ang nei theuh theuh
pawh hi kan indaihzai hleih thei khawp mai. Engemaw apianga lang ve hman ziah
tihah hlawhtlinna leh hlawhchhamna a innghatlo a, chungte chu tluk rualloh an
awm nawk zawk. A hunlai chuan kan chhut si se lo a ni thei a, mahse, a tawpah a
tlaran zawngin kan hmang nge a peipung zawngin tih hi chu a chiang mai thin.
Nun kan hman dan pawh hi a tlaran zawngin leh a
peipung zawngin kan lo hmang thin a lo ni reng mai. Vanglai chen theuh theuh
pawh hi ralkhat atanga inteh mai chi a lo ni hauh lo mai a, thenkhat chuan sum
leh pai, zu leh sa nen vanglai hun an hmang a, ralkhat atanga han en mai chuan a
awhawm viau pawh a ni thei a, mahse, heng hi chu a tlaran zawnga nun chen tu te
an ni a, an tawpna a awhawm ngailoh.
A peipung zawnga hman hian mahni intihhreawm emaw
chakzawng leh duhzawng ang pawh tih ngamloh emaw a ni ngawtlo a, fel tak leh
thianghlim taka nun mai hian kan hriatloh karin kan lo peipung a ni zawk a, kan
phak baka nawmchen kan tum a, a tha leh thalo tur pawh thliar phallo a kan han
leng vel hian kan hriatloh karin a tlaran zawngin kan nun kan hmang a lo ni
reng mai. Chu chu inhrilhfiah hranpa ngailo hian a tawpah a chiang thin.
Kan vanglai hun hi kan nuna a awhawm lai ber a ni a,
sum leh pai chhuta kan chhut chuan kan hausak lai ber a ni. Chutih avang tak
chuan kan hman dan hian kawngro a su bik em em a, kan la ngaihtuah kir fo tur, kan
inchhirna tur emaw kan la lawm veng vengna tur emaw chu tuna kan thatlai hun
kan hman danah hian a ni dawn. Kan tun hun hi a tlaran zawng emaw a peipung
zawng emaw, a rah hi kan la seng thuai dawn a, kan damchhung a kan seng a awm
ang a, kan thihhnua kan la seng belh leh pawh a awm dawn.
Tumah hi ‘Chuti chuan awm rawh’ inti rual kan ni
tawhlo a, mahse, mi fing leh mi a hriat hranna awlsam ber chu a khawsak danah a
ni. Mi fing chu a tlaran zawngin a nung ngailo a, mi a chuan a peipun lam a
ngaihsak heklo. Thil zawng zawnga hlu ber Nunna hi a tlaran zawnga nunpui atan
chuan a uiawm tak meuh meuh tih erawh hria ila, sum leh pai vang emaw,
nawmsakna vang emaw, mi ngaihsan hlawh duh vang emaw mai mai hian tlaran nunin
i lo nung dah ang e. Engkim dang zawng aia thil hlu Nunna hi peipung thiam
thiam chu mi vannei, mi nihlawh kan la ni mai dawn a ni.
