Hnehna Nopui i dawm theih nan

(Hyderabad Mizo Association Freshers Day 2018 Bulletin atana ziah)

Hyderabad hi ‘The City of Pearl’ an ti thin a ni awm e. India ram khawpui ropui zinga chhiar tel ve tlak a ni ang a, a tha lam leh a thalo lam zawng pawhin sawi tur a ngah ve viau ta ve ang. Chutiang khawvelah i damchhung hun azawnga i hun tha ber ‘Vanglai hun’ hmang tura puanthuah nen i rawn inpu lut ve hi chunglam remruat tihloh rual a ni lo ang a, I hun rangkachak hmang tura hmun rangkachak i rawn thleng thei hi kan lo lawm che a ni.

Mihringte nuna hun tha ber; kan hun rangkachak chu kan vanglai hun hi a ni a, he hun i hman dan hian i hun lo la awm turah awmzia a nei thui dawn. Chumi anih avang tak chuan mikhual lawma lo lawm che leh mikhual duata lo duat che kan tum lo. I puitlin kan duhsak vang zawk che in heti zawng hian kan lo lawmlut zawk ang che. I tan he hmun hi inbeihna mual a ni dawn a, hnehna changa i inpu haw leh thei anih chuan chawimawina nopui i dawm dawn khawp. I chefuhlo anih erawh chuan ‘hmun rangkachak’ nimahse, i tan ‘hmun anchhedawng’ a ni ang. 

Hnehna Nopui dawm thei tura i haw leh hi kan duhpui che a, chutiang tur chuan i theihna zawng zawng hmang la, i finna leh thiamna te chher hriam sauh sauh ang che. Hmun rangkachak nimahse, rangkachak lem, ropuina lem leh nawmchenna lem te chuan hmun pawimawh lai an luah ve tho a, sira hnawl pawh har i ti viau ang. Mahse, i tan thang hlauhawm annih theihnghilh ngai suh ang che. 

A thei thei dinchanna khawvel nimahse, mahni chauh chuan he khawvel hi nuam i ti si lo ang. Hnehna hi midangte rahbeha chan atanah chuan a rawng lua a, midangte rahbeh ai chuan khawvel hnehna hi midangte tana malsawmna a ni zawk tih hre chungin khawvel chungah hnehna chan tum la, i hnehna chanah midangte thikthu ai chuan lawmpuina hlawh chhuah tum zawk ang che.

I vanglai hun tha ani na a, i tan hun tha lo a inher chhuak thei tih hrereng la, a thaber tura i inbuatsaih laiin a chhe ber hmachhawn turin in ring tel bawk ang che. Kan inrinloh khanah hian beihna kan tawh fo avangin kan inring sual thin a, i beisei loh khawvelah lenluha i awm hunah pawh i ke pen a ngheh theihnan inbuatsaih lawk ang che.

Khawvel a cheng i nih avangin khawvel thil kan han chhawp chhuah sak che a, khawvel i chhuahsan hun a la awm dawn tih hi i theihnghilh loh atan a pawimawh ber. Chu chu i hriatloh chuan eng anga nopui dawm thei pawhin haw la, chatuan hlawhchhamna chuan kut pharin a lo nghak reng dawn che. He khawvela i hlawhtlinna nopui i chhawm luh theihlohna hmunah i la inlan dawn a, chumi hre reng chung chuan he i huntha hi hmang turin kan duhsak che a ni.