Thawhrim hi a chhanna a ni

 Mahni inlum chhuahsana thlawhhma thar la tura lo feh chhuak zawng zawngte, a thei leh chak apiang dinchhuahna khawpui Hyderabad ah kan lo lawm a che u. In lo thlen thlak ve takah chuan khualtha lawmin kan lo lawm che u a, mahse, fa tak enkawl chuan kan lo enkawl thei dawnlo che u tih erawh han inchah zui nghal ila, in thlawhhma lakna turah kan tih theih sang ber duhsakna kan hlan tawp mai ang che u.

Mahni inlumah kha chuan sem sem dam dam, ei bil thi thi in ti a, a nuam leh hreawmah in indawm nung za ngei a, helaiah zawng ‘a thei thei dinchhuahna khawvel’ tih a ni tawh dawn a, in chenpui leh in fehchhuahpui te nen ngei pawh a dingchang zawk nih in inchuh angai dawn. Israel fate hnenah Lalpan ‘In hmaah nunna leh thihna ka dah e, in duh chu thlang fel rawh u’ a tih ang maiin tunah hian in hmaah hlawhtlinna leh hlawhchhamna dahin a awm a, chu chu taihmakna leh thatchhiatna hmangin i thlang nitin tawh dawn.

Pathian thu pawh hian hei hi min lo zirtir ve bawk ania. Pathianin Adama hnenah “..I dam chhung zawngin rim taka thawkin lei rah chu i ei tawh ang… leia i kir leh hma loh chuan hmaia thlantui luang zawih zawihin chawi i ei tawh ang…’ a tih khan dam khawchhuak tur chuan hmaia thlantui luanga beih angai tih a sawichiang a, thatchhe chung chuan ei hmuh beisei suh a tihna a ni.

Kan tunlai thalai te zingah thawhtur hrelo te, tihtur neilo te kan awm suau suau mai hi a mak khawp mai. Kan chhuanlam tam tak chu awmzia omlo, a hlawklo tih vel a ni tlangpui a, nileng lengin awmze nei leh hlawk zawk chu kan zawng nihmiang, kan leng suau suau a, engmah lah kan hmuchhuak lem hleilo. Hetiang formula hmang hian kan zirlai te hi zir kan lo tum ang e. A awmze awm leh hlawk ber, Pathian ngeiin kawng a ruatsa chu hmaia thlantui luang khawpa beih a ni. Chutih rual chuan thawhrimna tello chuan eng hlawhtlinna mah hi a hlu lo tih te pawh hi zir tel ta ila, a hlutloh piahlamah a tlo lo lehzel bawk tih te phei chu mahni ngei pawh inhrilh nawn fo chi. Hlawhtlinna emaw kan tih a tlo lo tih kan han dai hriat leh meuh hi chuan a lo tlai chhe viau tawh thin a, siamthat leh a har tawh thin.

Lal Isuan tehkhinthu pakhat a sawi a, mifing lungpui chunga in satu leh mi a tiaudup chunga in satu. Lungpui chunga insak hi thil awlai a ni hauhlo ang a, a bankhur laih ringawt pawh a va hautak dawn em! Nia, thlantui luanga beih fat fat ngai, thawhrimna nen takmeuha sak a ngai ang. Tiaudup chunga chuan hahdam takin a sak theih tehmeuh ang chu, mahse, a tlo zawk leh kumhlun zawk chu thlantui nena sak kha a ni tlat mai.

Anihna tak takah chuan awmzia omlo, a hlawklo kan tihte pawh hi awmze nei tham leh hlawk thama kan beih fat fat loh vang a ni. Chutih lai vekin kan hlawhchhamnaah midang dingchhuak an rawn awm leh thei lawi bawk a, Pathian thu ang taka taima taka lungpui chunga bankhur ringawt pawh beidawnpui tham tur bei ngat ngat te hian hlawhtlinna in nuam an lo sa thin a, a hahthlak tur ngaingamlo a tiaudup chunga in sa te hi kan lo hahthlawn thin zawk a lo ni.

He khawpui, mi tinreng mai mahni tana chakai khawrha an liam suau suau na hmunah hian hlawhtlinna nopui i dawm ve duh anih chuan taima taka beih hi a kawng awmchhun a ni. Atthlak khawpa taima nih pawh hreh suh. Atna hmunah pawh finna chhar tur a lo awm zel mai ang. A hlawhchham dawn tih hre chung pawha i bei ngat ngat anih chuan a hlawhtlin dan tur tal i chhar chhuak em em ang. Taihmakna nen chuan engmah hi hlawhchhamna a ni lo a, hlawhtlinna tur kawng dik zawk chharchhuahna zel a ni. Thatchhiatna avanga kawng laka kawng awlsam dap te hian hlawhchhamna an seng zawk thin a ni tih hriain taima takin hlawhtlinna nomawi nen i haw leh kan duhsak a che.