Midangte tana malsawmna

A rûka siama ka awm a, Lei hmun hnuaihnung bera mâwi taka siama ka awm lai khan ka ruhrel chu ilakah thupin a awm lo. Ka riruang la famkimlo chu i mitin a hmu a, I lehkhabuah chuan ka pêngte zawng zawng hi ziak vek a ni a, a ni têla siamin a awm zel a –Sam 139:15

Nimahsela, a hun bi a lo kim khan fa nihna kan hmuh theih nan, dân hnuaia awmte chu tlan turin Pathianin a Fapa, hmeichhe hrin, dân hnuaia lo piangin a tir chhuak ta – Galatia 4:4

Khawvelah hian mi chi hrang hrang kan lo piang tawh a, kan la piang zel bawk ang. Ṭhenkhat chuan sulhnu ṭha tak tak an hnutchhiah a, an thihhnu zêlah pawh hriatzui an ni. A tam zawk erawh chu kan lo piang a, kan thi leh a, kan dam hun engemawti chhung hian mi hmuh leh hriat kan ni a, chubak hmuh zui leh hriat zui kan ni lo. Chumai piah lamah ṭhenkhat erawh chu a chhe lama hriatreng hlawh te kan la ni mah zawk a, kan tihfuhloh ve rêng nge kan chunga thleng tura khuanu duan tih pawh ngaihtuah tham a ni.

Pathianin a fapa he khawvel tân a rawn tir a, keini lo piang ve ngawt ai chuan a dan a dang. A Pathianna lam pawh hi dahṭha ni ila, hmeichhe hrin zingah chuan khawvêl nghawrnghing hneh ber mai niin hriatreng tur a ni hrim hrim mai. A chhan chu a dam hun chhung reiloteah khan a nunna mi dangte tân a hlan a, a theihna zawng zawng midangte damna tur atân a hmang a, amah kha midangte tan malsawmna a ni. Chu chu keini a zuitu inti te hian kan hmuh ṭhelh ṭhin. Khawvel malsawmna chi hrang hrang kan dawn zingah kan nunna leh kan chhandamna dawn hi a hlut zia kan hre fuhlo fo.

He khawvela kan lo piang ve leh nungdama tun hun thleng kan hman theihna zawng zawngah hian a fawng vuantu chu amah Pathian hi a ni a, thenkhat chuan hei hi kan hmuh hmaih a, kan chanpual ve reng emaw tiin kan nawm kan makin kan nitin hun hi kan hmang thin. Khawvêl malsawmna dang tello pawh hian kan nunna leh kan chhandamna hi lungawi tham a ni hrim hrim a, Chu chu kan manfuh phawt chuan kan lo piang ve hi kan tan malsawmna a va ni dawn em!

Khawvel mihring tam zawk hian kan lo pian hian midangte tân malsawmna nih aiin mahni tana malsawmna nih tumin kan inhmang ral a, min siamtu lam phei chu ngaihven aiin a tlansan lam zawngin kan ramṭang a, nunna min petu tân pawh hian inchhirawm zawk tur khawpin kan nun hi kan hman châng a awm. Khawvel malsawmna kan um lutukna lamah malsawmna kan dawnsa hi kan theihnghilh a, kan nunna hlu em em mai hi hlutloh tur ber zawk emaw tiin malsawmna dang zawn nan kan thap fo mai.

Khawvel lam tehdana kan sulhnu hnutchhiah chu lo dahṭha ta ila, kan thlarau chhandamna tur pawh buaipui hmanlo a hun hmang ṭhin hi kan va tam em! Chungte hlei hlei tân chuan khawvela lo pian chhuah ve pawh hi vanneihna ai mah chuan vanduainaa chhiar chi a ni mah zawk ang. Chutichuan, vawiina kan pianna hi midang pian vanneihzia lam ngawt ngaihtuahlo hian, mahni ngei pawh chung vannei ber zingah chuan kan tel ve tih hria ila, kan dinhmun lam a kan malsawmna dawn kan chhiar thiam hian midangte tan awlsam takin malsawmna kan ni ve thei dawn a lo ni.

Hnehtu niturin

‘Tin, Isuan a zirtîrte hnênah, ‘Tlûknate hi awm lo thei a ni lo; nimahsela tlûkna awmtîrtu chung chu a pik e! Hêng mi tête zînga pakhat pawh tihtlûk ai chuan, a titlutu tûr nghawngah chuan buh rawt sawmna lung awrhtîrin, tuifinriatah thlâk sela, a tân a tha zâwk tûr a ni’ Luka 17:1 

Israel fate Aigupta mite thuhnuaiah hreawm takin an awm a, Lalpa an auh lai khan anmahni chhandamtu tur Mosia a rawn din chhuak a. Mosia chuan thlan anihna leh koh anihna ang takin Israel fate tan zalenna a rawn hawng a, Israel fate zawkin an zirloh em avangin Kanaan ram em zawng a rah pui ta lo. Mahse, ama mimalah chuan a thawh tur leh tihtur a hlen kim a, midangte tana malsawmna a ni. Chutiang dinhmun angah Israel fate Philistia mite thuhnuaia hreawm takin an awm leh a, Pathianah beiseina pawh an neih ngam mang tawh loh hnuah chhandamtu Samsona a rawn din chhuak leh a, mahse, Pathian in a kohna leh thlan anihna chu Samsonan a nih tur angin a hmang lo thung a, a chakna leh thiltihtheihna chu ama tan ngei tlukna a ni ta zawk. 

Tlukna awmtirtu atana midang emaw pawnlam thil emaw mawhpuh tlat hi kan chin than a ni. Nu leh paten an fate sualnaah midang, an thiante an mawhpuh a, midangin midang kan inpuh tawn a, faten nu leh pa zirloh kan ti bawk a, khawtlangin Kohhran, Kohhranin khawtlang, ram leh hnam ang zawng pawhin mahni ai chuan midang mawhpuh tur zawn tlat hi kan mihring mizia a ni. Midangtea kan va ngaihbel tlat thin ‘Tlukna awmtirtu chung chu a pik e’ tih hi mahni leh mahni tan pawha inbel tur a ni. Midangte tana tlukna siamtu kan nihna mai piahlamah, mahni ngei pawh hi chu tlukna ah chuan kan va inbarhlut thin asin. Mosia dinhmunah hian Israel fate phunnawina te, an luhlulna te, Pathian laka an helna te zawng zawng hi Pathianin a kohna phatsanna tham chu a ni tehmeuh mai. Chutih lai erawh chuan Samsona chuan pawnlam atanga neksawrna emaw tihduhdahna emaw a tawk hran lo. Ama duhthu ngeiin, amah leh amah tlukna ah chuan a inbarh lut a ni. Tlukna awmtirtu chu amah chu a ni ta zawk. 

Thilsiam reng reng chu a siamtu hian an hrechiang ber mai. Pathian, chhunglam entu chuan a thilsiam mihringte pawh hi min hrechiang a, Eden huan atang tawh khan mihringte tan tlukna hi awmlo thei a nih loh zia hi min hriatsak daih tawh. Chuti anih avang chuan daisual leh tluk chang a lo awm anih pawhin kan la thiamawm. Tlu hlen reng tur leh dingchhuak leh theilo erawh kan ni lo a, kan tlukna hmun atanga mawhpuh tur zawnruaia, a dinchhuahlehna kawng kan zawng lo emaw kan tum lo emaw anih erawh chuan thiamthu sawi tur kan nei lo thung. 

Mihring chuan pawnlam landan kan en thin a, Pathian erawh chuan chhunglam a buk thin. Pawnlam landanah thutlukna kan siam thin avangin kan tisual fo a, kan mit hmuha mawi leh tha atanga kan zawn thin avangin bumin kan awm thin. Mahni leh mahni ngei pawh hi he pawnlam landan leh mite min hmuh dan atang hian kan la inteh cheu a, kan chhunglam mite min hmuhsak loh, mahni kan inhriat si atang ngei pawhin thutlukna kan siam duh lo a, miten min sawi dan leh min hmuh danin kan in hnem lungawi thin. Chuti anih avang tak chuan kan tlukna ngeiah, keimahni thiamlohah ngei ngei pawh midang mawhpuh tur kan zawng thin a, mahni leh mahni hi tlukna insiamsak ah kan inngai lo

Kan tun dinhmun theuhah pawh hian mahni inen ta ila, ka tihtur ka tihloh leh ka tihloh tur ka tihah hian midang mawhpuh thei ka ni em? Chu tlukna emaw thlemna ka tawhah emaw, sualna a ka awm mekna ah emaw te hian midangin tlukna min siamsak vang nge keimah ngeiina ka insiam sak vang? Kan thiamlohah midang kan mawhpuh tlat chuan dinchhuah chu a har khawp ang. Min siamtu ngei hian kan dinhmun hriain dinchhuahleh theihna kawng min hawnsak tawh a, Samsona ang maia a va inbarh lut zawng a nung tawh lo in a hnehtu nun nung tawh zawk tur kan ni. Mahni inen ila, mahni i insiamtha zel ang u. 

Dil tur dik

 ‘Chutichuan, ‘Engnge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng thîn a ni. Chûng zawng zawng chu in mamawh tih in Pa vâna mi’n a hre reng a ni’ Mat 6:31 

Kan Pathian thuin ‘Hringnun chu buaina a khat a ni’ a lo tih zawng zawng kan nei zo a, kan tunlai chhuan te hi kan hmanlo ta hle mai. Zing kan thawh atanga kan mut leh thlenga mihringte buaizia hi kan ngaihtuah ngai em aw! Kan damchhung ni chu buai reng rengin kan vuiliam nitin a, kan buai thin em avangin kan nuna pawimawh zawk tur kan ngaihtuah hmanlo fo a, a pawimawh zawk dah hmasa ta lo a a pawimawh lo zawk dah hmasak tak tlat tum te hi kan ngah hian i hre ve lo maw! Kan bul vel hi han thlir ila, Kristian lo ai chuan Kristian te chuan nun chu kan hmang awmze nei zawk chuan a hriat. Mahse, hei hi lungawi pui mai tur chu a ni lovang. Kan Pa vana mi hian kan mamawh tinreng pek min tiam a, mahse, enge kan mamawh leh enge pawimawh hmasa tih hi kan hriat loh chuan dil tur dik hi kan hre lo ang a, kan dil ngei thin a pawh hi kan mamawh pek ngai kan nih leh nih loh kan hrethiam lo ang a, pekloh kan nihin kan hrethiam lo bawk ang a, pek kan nihin a hlutna kan hrethiam bawk hek lo ang. 

Enge i dil thin le? Kan hun tam zawka kan dil fo chu kan duh leh mamawh hi a ni. Mihring kan nih chhungin duh leh mamawh neih chu a sualna a awm hran lo ang. Chu ngawt dil leh beisei chu a tawk dawn em ni? Kan duh leh mamawh zawng zawng hi nei ta vek ila, khawvel lam tak chuan kan hlawhtling pawh a ni thei. Mahse, Pathian lamah hian eng ang dinhmun nge kan luah phah ang tih erawh ngaihtuah tel a tha khawp mai. Pathian in engti turin nge min duh? Kan mamawh leh kan duh te kan thlen rual hian, a chhanna lo thleng ta se Pathian in eng ang zawngin nge min beisei let ang tih te pawh ngaihtuah tel a tha khawp ang. Hani chuan Pathian hmaah fa a dil a, a chhanna a hmuh rual chuan Pathian tan a hlan let nghal a, a petu tan pawh hian pek kha a phu a ni. 

Kan tunlai khawvelah, kan Zoram ngeiah te pawh kan neih rosum te, kan fanau te thleng hian malsawmna nia kan ngaih laia engvanga phurrit chang ta nge an nih tih te pawh hi ngaihtuah tham a tling. A mawh ka phur ngam dawn em? Thufing pakhat chuan ‘thil reng reng hian a tlukpui sawhkhawk a nei thin’ tiin a lo sawi a, kan Mizo thufing chuan ‘Sunhlu kungah thei dang a rah ngai lo’ a ti thung a, kan Pathian thu chuan ‘miin a tuhrah chumi vek chu a seng leh dawn si a’ tiin tlang leh fiah takin min hrilh. Kan tuhrah hi kan seng thin chu a ni a, mahse, kan hrethiam lo fo. Chumi anih avang tak chuan kan thil dil leh beiseiah hian a mawh kan phur a, kan phurh ngam loh tur chu dil loh mai pawh a finthlak zawk maithei

Israel fate chuan hnamdangte anga anmahni hruaitu tur Lal Pathian hnenah an han ngen tlat mai a, Pathianin Lal an neih chuan an dinhmun turte a hrilhfiah sak chungin an ngen lui tho a, an that phah loh tur mah nise, Pathian chuan an ngen avangin Lal Saula a pe ta. Zirna a hlawhtlin kan duh a, kan dil a, Sawrkar hna tha tak thawh kan duh a, kan dil a, nupui pasal fanau te nen chhungkaw tha tak din kan duh a, kan dil a, Pathian remruat a ni em tih lam kan ngaihtuah loh chuan a nghawng hi kan tuar zo lo thei. Damloh hritlan kan tawh chang te hian Pathian kan au a, damna kan dil a, a petu hian ‘Eng atan nge i hman ang?’ tih min zawt ta se, enge i rilru a lo lang? Sawi tur mumal nei lo pawh kan kat nuk ang a! Zep nak emaw, kan dil damna leh hriselna te hi a petu lungawina tur hian kan hmang lo niin a lang. Ka mimal nun, kan chhungkua atana kan duh leh mamawh, kan dawn malsawmna kan hman dan hi ennawn chu a hun viau lo maw!