Mite tâna damna

 ‘Tin, a tho va, inkhâwmna in ata chu a chhuak a, Simona inah a lut ta a, Tin, Simona nupuia nu chu nasa takin a khua a lo sik a, tichuan, a tân an lo ngen sak a, Tin, a kiangah a ding a, khawsik chu a hau va, a reh ta a, tin a tho ta nghal a, an rawng a bawlsak ta a, tin, ni tlak dawn laiin natna hrang hranga nâ, damlo nei apiangin a hnenah an rawn hruai a, an zâa chungah a kut a nghat ṭheuh a, a tidam ta zêl a’ (Luka 4:38) 

    Kan Lal Isua Krista he khawvela a awmlaia a hnathawh pawimawh tak pakhat chu midangte tâna damna thlen kha a ni. Keini mihringtena kan buaipui ber erawh chu mahni tâna damna hi a ni thung a, khawvel hian chu chu min zirtir leh min kawhhmuh, min hruaina lam kawng a ni tlat. Kan nitin hnathawh hrang hrang te pawh hi mahni tâna damna tur kawng a ni tlangpui a, midangte tâna thawk leh rawngbâwl inti pawh hian kan damna tur hi kan ngaihpawimawh hmasak a ni fo. 

    Chutiang taka nun hman chu a sualna a awm em ni? teh suh e, mahni dam phawt loh chuan midangte damna chu ngaihtuah theih a ni hleinem! Mahni pawh inchingfel hmasa lo chuan midang chinfel chu thil theih a ni lo. Midang chu sawiloh, mahni damloh na na na chuan midangte zâwkin kan damna tur an buaipui a ngai dawn a, midangte tâna damna nih a hnekin midangte tan phurrit kan ni thei mai dawn a ni. He khawvela kan chen chhung chuan chu dân chu kan zawm ve a ngai tlat. Mahse mahni damna kan thupui ber a ni ṭhin hi erawh chu kan buaina a ni thung. 

    Ram leh ram kan innghirngho a, kan indo a, khawtlangah pawl leh pawl kan indo a, kan inep a, chhungkuaah mahni chhungkaw dinchanna kan ngaihtuah a, ṭhenawmte nêk leh rahbeh kan hreh lo a, mimal nunah midangte aia chungnung zawk, thiam chang zawk leh thil ti thei zawk nih kan thupui a, kan lo buai zo ta a ni. Ram leh ram kan innghirnghona avanga nunna hlu tak kan chân te, sum leh pai kan chân te, khawtlang leh chhungkuaah mahni kan inngaihpawimawh avanga indona leh innghirnghona kan thlen zozai te hi a va pawi tehlul em! Heng zawng zawnga kan senral te hi midangte tâna damna zawk atân hmang te ila, kan dam tlang nimai tur. 

        Pathian Biakina kan khawsak hona leh midangte kan hmangaihna hian Biakin piah lam pawh hi thleng se, kan nun hian entawn tur a nei ang. Kan Lal Isua chuan Biakin a chhuahsan rualin a dam chhan a chhuahsan lo a, Biakin pâwnah pawh midangte tâna damna thlentu anih ang hian kan Pathian Biakin pâwn thleng hian midangte tâna damna thlentu nih tum ila, mite tâna rilru natna emaw, taksa lama retheihna emaw, lungawilohna leh phunnawina thlentu emaw hi nih tumloh ṭheuh ila, chutiang chuan kan nunah entawn tur kan hnutchhiah thei dawn a lo ni. 

    Midangte ngaihtuah lek lo hian kan damna tur atan hian kan buai ṭhin a, mahni kan indah hmasak lutukna avang hian midangte tâna damna aia harsatna thlentu hi kan ni thin a, chu chu kan hriat hauhloh hian kan lo ti vak ṭhin tlat mai. Zirlaite pawhin hlawhtlinna kan zawnna kawngah midangte rapbet zawngin kan hma kan ngai tur a ni lo. Party induhsakna emaw, chhungte dinhmun sâng vang emawa midangte zuankâna mahni indah chungnun te thleng hian midangte tân harsatna kan thlen thei tih hriat a ṭha.Kan hlawhtlinna te hi Pathian hriatpui tlak ni se, midangte tâna malsawmna nih tum zel ang u.

Midangte hmangaihna

    Chu mi hunah chuan mi felte chuan ‘Lalpa engtikah nge riltamin kan hmuh che a eitur kan pek che? Tuihalin kan hmuh che a in tur kan pek che. Engtikah nge mikhuala kan hmuh che a kan thlen che?..engtikah nge dam lovin emaw tan inah emaw kan hmuh che a i hnenah kan lo kal’ tiin an la chhang ang. Tin, Lalber chuan ‘Heng ka unau te ber te zinga mi pakhat chunga in tih hi ka chunga ti inni tiin a la chhang ang’ Matthaia 25:37 

    Nangmah i inhmangaih angin i vengte pawh i hmangaih tur a ni.. Mat 19:19 

    Kan Lalpa Isua Krista he khawvela a lenlai khan mi harsa leh rethei, mite hnuaichhiah leh ensan te tan a belhfakawm em em tih kan hria a, tunlai hun angin sum leh pai te, zirna tha te, in enkawlna tha te a la awmlo a, chung karah chuan a theih tawk tak meuh meuhin mite tidamin hmangaihna thu a tlang aupui a, amah pawhin a nunpui a, hmangaihna dawnglo tam tak, mahni chhungte ngei pawhin an tuithlar, khawtlangin hnawksak an tih te thleng khan hmangaihtu a ni a, chu a hmangaihna dawngtu te tan khan a va hlu dawn em! 

    Kan tunlai hunah hian a lang chuan kan in enhrang duh hauh lo na a, in enhranna te, in hnuaichhiahna te, midang ngaihnepna te, midang nekchepna te hi a awm nasa tih hi a lang chiang khawp mai. Lal Isua zuitu, a zirtirna te vuantu kan intih mek lai pawh hian kan inthenawm khawvennaah hi chuan Lal Isua zuitu nih hi kan harsat thin khawp mai. Mi hausa zawkte tan chuan chhungte nih nuam kan tih nen mi harsa zawkte tan chuan belh fakawm kan ni hleithei lo fo. Mahni tanghma hai kan thiam a, mahni tan chuan malsawmna kan nih ang hian midangte tana malsawmna nih chu kan harsat thin. 

    Mihringte tana hlu ber chu hmangaihna dawn hi a ni awm e. Hmangaihna dawn beisei, beisei ang dawng si lo te nun hreawm turzia te hi kan chhut thiam lo maithei. Nula tlangval, nupa karah te phei chuan thihchilh hial te pawh kan awm thin. Kan inchhungkhurah te theuh pawh hian hmangaihna dawnglo bik ni a inhriatna te hian boruak a tichhe thei khawp. Chumi lehlamah chiah chuan midangte hneh theihna awlsam ber, mitin te kan sihhnipna lai chu hmangaihna pek kan nihnaah hian a ni. Mi rorum leh sual buru tak tak, thu tha leh zirtirna tha tinrengin a hneh loh te pawh hi hmangaihna chuan an nun a thlak danglam vek thei. 

    ‘Naupang chu a kalna awm kawngah chuan zirtir ula, a puitlin thleng pawhin a thlah lo ang’ tih a ni a, kan khawvel dinhmun hi kan thlir chuan naupang te te kan nih lai atangin zirna school kaltlangin mahni ke a din kan inzirtir a, midangte aia chungnung zawk leh hlawhtling zawk nih kan inzirtir a, intihsiakna nasa tak karah kan seilian a, midangte hmangaihna lam kawng hi kan zir hman ta lo. Chawlhkar khatah vawikhat Pathian Biakinah kan inkhawm a, reilo te chulam hawi chu kan inhrilh a, a beitham khawp mai. Chuvang chuan helam kawngah hian nasa zawka tan kan lak a, kan tu leh fa te hnenah te, kan nunho danah te, midangte hmangaihna hi zir uar ang u. Vai ramah kan awm a, kan chhuavah nikhua reng rengin innekna boruak hreawm tak karah hun kan hmang a, thin hi a chhe duh khawp mai. Mahse, hengah pawh hian hmangaihtu zawk nih hi zir zel ang u. Kan inchal tauh pui hian eng ram mah min thlen lo a, harsatna a su kiang lo. Chu ai chuan hmangaihna hian thil a ti thei zawk tih hria ila, i inzir sauh sauh ang u.