Vanneihna thuahhnih

He mi khawvêla hausate hi chapo lo tur leh sum rinawm lovah hian an beiseina nghat lova, thil zawng zawng lâwmna tura tam taka min petu Pathian chungah chuan nghat zawk turin zilh rawh. (Timothea 6:17) 

Sum leh paite chu chatuan atân a ni lo va, Lallukhum chuan chhuan zawng zawng a daih em ni? (Thufingte 27:24) 

Vawikhat pianmanah pheichham man te hi i chak ve tawh em? Anihlohleh khawilai lucky ticket emaw aṭanga pawisa tam tham tak man te hi i chak ve tawh em? Beiseiloh lam aṭanga vanneihna hi achâng hi chuan han tawnbuak ve hrim hrim a chakawm ṭhin asin. Midangte kan han thlir a, a khawsak leh nunphung, neih rosum te kan han hmuh hian vannei kan ti ṭhin a, awh chang kan nei ṭhin. Mahse, khawvel mihring lo piang chhuak tawh phawt hi chuan kan dinhmun tawk ṭheuhah vanneihna hi chu kan lo nei vek a, dinhmun chhe bera ding emaw kan intih lai pawh hian kan hriatthiam bak vanneihna hi chu a awm zel. 

Mihring nunphungah chuan phak bâk chiah nih duhna te, neih phak bâk chiah awhna te hi a awm ve hrim hrim. Naupan laia puitlin châkna te, puitlin hnua naupan lai duhleh zâwkna te, mahni thil neih aia midang thil neih duh tlat te, mahni nihna aia midang nihna ang nih chak tlat te, heng hian kan nunah a ṭha zawnga nghawng a nei anih phei chuan malsawmna a ni zâwk a, hmalam pan tura min fuihtu tha tak a ni thei. Kawng lehlamah erawh chuan a ni lo lam zâwnga hman theih leh duhamna kawng chhe taka min hruaitu a ni thei bawk. 

Kan nuna lungawi lohna leh phun nawina min thlentu ber fo chu kan nih ang tur ni a kan inhriat loh ṭhin vang hi a ni a, kan vanneihna lam thlir lo hian kan la chanloh lam kan thlir ṭhin a, rethei leh chanchhe zawk changah kan indah ṭhin. Khawvel lam thlirna aṭang chuan damchhung khawsak leh neih thilah kan tlachhe deuh pawh a ni maithei. Mite angin kan duhzawng ang te pawh kan nei kimlo a ni thei e. Mahse, kan chantawk ṭheuh hi Pathianin kan tana malsawmna min pek a ni tih hria ila, keini aia chanhai leh chanchhe zawk hi tam tak an awm tih theihnghilh lo ila, kan kuta awmlo ai chuan kan kuta awm te hi a hlutzia chhut ṭhin ila a va duhawm em! ‘He khawvela kan chanvo hi lawmna tur vak ka nei lo e’ kan ti anih pawhin keini Lal Isua ringtu leh chatuan hun beiseitu hi chuan lawmna tur kan la nei chêu mai. 

Khawvêl mite chuan he khawvêl a an dam chhung hun bâk hi beisei leh chuan tur an nei lo a, keini erawh chu he khawvel piahlamah chatuan nunna tharin min hmuak a, he khawvela kan retheihna zawng zawngte chu kan hnuchhawn tawh dawn a, chubaka vanneihna chuang chu a awm leh thei dawn em ni? Keini aia vannei leh chuang tur an awm lo asin. Heti taka chanvo ropui kan neih lai hian he khawvel thilte hmanga inhaivura, duham taka nung tur kan ni lo. Pathianin kan phak tawk tura a malsawmnaa min vur hi kan lungawipui zo tur a ni. He khawvêl thil engmah hi chatuan atâna kan sengluh tur a awm lo a, nakinah kan chatuan hmun aṭangin kan rawn thlir ang a, kan buaina zawng zawng hi engmahlo mai anih zia chu kan la hrethiam ngei ang. Chutih hunah chuan he khawvêla kan rosum khawlkhawm te, kan zirna leh thiamna te, kan kut hnathawh te zawng zawng ai chuan amah Pathianina min lo enkawl zia te, amah neitu kan nihzia te hi kan hmuthiam ang a, kan vanneih thuahhnih zia hi kan la hrethiam ngei ang.

Zahngaihna a khat Pathian

 Ngaiteh, kawnga veng zel tur che leh hmun ka buatsaihah chuan hruailut tur chein i hmaah vantirhkoh ka rawn tir dawn e. Ama zai ngai zel ulangin, a thusawi pawm thin ang che u. A chungah hel suh u, in bawhchhiatna te chu a ngaidam duh dawn si lo va, a mahah chuan ka hming a awm a nia, amaherawhchu a thusawi i pawmsak tak meuhva, ka sawi apiang i tih zel chuan i hmelmate hmelma chu ka ni ve ang a, i dote dova chu ka ni ve ang Exodus 23:20 

Khawvel mitin mai hian mahni hriatthiam dan te, mahni rindan te ang zelin Pathian kan nei hlawm a, Kan rindan zawn theuhah hian Pathian chu kan chunga leng, ro min relsaktu, kan inthlamuanna, kan innghahna leh kan tlukluhna a ni theuh mai a, kan mamawhna ang zela min chhanchhuaktu ni tura ngaih a ni. Chutiang anih theih nan chuan thenkhat chuan a tlawn tak meuhin an tlawn a, tih lungawi te pawh an tum thin a, a lungawilohna avanga hrem pumpelh te pawh an tum thin. 

Pathian mizia tur emaw nihphung tur emaw hi keini mihringte hian kan hriatthiam dan ang tawkin kan han zeldin pawp mai a, chu zeldin avang chuan tlawn lungawi mai mai theihah te kan chhuah ta mai a, thilpek hmanga tihlawm theih emaw te kan han ti ngawt a, a duhzawng ang taka nun chu duh duh tih tir theihna emaw te kan han ti mai thin a, kan hriatthiam dan a beitham thin hle mai. Hnamdangtena Pathian an cheibawl dan te hi han chhut neuh neuh ila, a chang hi chuan mihringte hnuaia awm zawkah te hian an chhuah lek lek lo maw tih tur a ni thin. 

Pathian chu pathian anih chhung chuan keini leh kan thil neihte hmanga ropui a ni ngailo ang. A Pathianna chu keimahni lam vang a ni lo va, amah ngau ngau chu engkim bul leh tawp, thiltihtheihna tawp neitu, thuneihna zawng zawng neitu a ni a, anihna takah chuan keini biak leh tlawn phak a ni lo hrim hrim. Kan tello hian anihna chu a nep chuang lo. A thu kan awih emaw kan bawhchhe rem rum a ni emaw, atan kan inhmang emaw, thilpek kan pe maw, engmah hian amahah nghawng a neilo hrim hrim. Amah ngeiin a duh leh a remtih avang zawkin mihringte nen hian kan inpawh a, atana kan nun hian awmzia a nei mai chauh a ni. Kan vannei thuahhnih khawp mai. Kei leh nang tello hian a duh ang zela thilti thei a nih lai hian a thlamuanna thuchah te chu min hnutchhiah zawk a, amah leh amah chungah ngei thutiam rinawm tak hmangin a indelhkilh thlap mai a, a va thlamuanthlak tehlul em! 

I nunna leh i nihna zawng zawng chungah te thuneitu anih laiin thuneihna erawh a chelek kher lo a, kan duh ang zela kan nun theihnan duhthlanna zau tak min hawnsak zawk hlauh mai a, kan nun kawng kawngtluanin a tha lam ang zela kan chunga ro min relsak a tum tlat a, kan harsat leh manganah te min chhanchhuak turin a inpeih reng a, hetiang khawpa Pathian inngaitlawm leh zahngaihnaa khat kan nei hi lawm tur kan va ni em! Kan bawhchhiatna te avang hrem tur kan nih kan inzirtir teh meuh mai a, mahse, kan nitin nun hi han chhut ila, kan phu tawk ang zela hrem tur chu ni ila, nikhat nung zo tur hi kan awmlo. Kan hriat reng lai leh hriat loh lai hian kan bawhchhe tlat a, a hmaa nung zo tura thiamthu dinpui tlak hi kan nei lo hrim hrim. Mahse, min hrem chu sawiloh, a zahngaihna avang liau liau hian kan la nung hram hram zawk a ni. Kan phuloh zahngaihna kan dawn hi kan ngaihtuah fo a, min enkawlna zawng zawng chungah hi theihnghilh lo turin kan inchah a ni e.