Hmangaih man

Pathianin khawvel a hmangaih em em a, chutichuan a fapa mal neih chhun a pe a… John 3:16

Hmangaihna hi kan sawi ve sek tak a, a tak leh a lem thlengin kan hre tawk viau hlawm a, hmanraw tangkai tak a ni chek a ni ang, a tha lamin leh a chhe lamin kan nun a luhchhuak hneh viau. Thenkhatin nunna chhan nan hial te pawh an hman laiin inbumnana lo hmang ta mai mai pawh kan bang chuang lo. Pathian pawh hian hmangaihna hi a lo la thutak viau a, Pathian thu engkim mai hi hmangaihnaah hian a infun khawm vek ti ila kan tisual lo ang.Hmangaihna tak tak chungchang bik lo khel ta ila, Hmangaihna hi a dawngtu tan leh a pe tu tan a man a to far far hle tih kan ngaihtuah ngai em? Kan nuna thil kal telve zel pakhat anih avang hian kan ngaihtuah chiang ngailo te pawh a ni thei e. A pe chhuaktu hian hmangaihna tak tak a pe dawn anih chuan amah lamah nghawng a nei a, mahni inphat te, mahni inhlanna te, chung kaihhnawih thil hrang hrang, taksa leh neih sum leh pai thlengin a ni ang, chung ang zawng zawng thap ngamna a keng tel a ni. Bazara thil duhzawng va lei mai ang ngawt chu a ni hauhlo mai.Hmangaihna dawngtu lamah a va lawmawm em tih maiah a tawp anih chuan hmangaihna chhanletloh, a hmangaihna dawn ang a pe let ve lo tihna a ni. A petu lamah a man a to ang bawkin a dawngtu pawhin manto taka alo dawnsawn a ngai. Hmangaihna chu a dawn rualin a petu tan a inhlan ve nghal a, tawrh angai emaw chan angai emaw, engmah mahni tan a khek theilo ang. Zep nak emaw mihring tupawh mai inkara hmangaihna tluantlinloh chhan fo chu a dawngtu lamin kan thatchhiatsan vang, a manto zia kan ngaihtuahloh vang a niKan hmangaihna hriat ve hi chu mahni tana hlawkna tur hmangaihna emaw kan ti a, hmangaihna kan dawn chu pheichham manna ang maia vanneihnaah kan ngai a, a man lam kan ngaihthah avangin kan chhanglet emaw kan tih hi kan lo ngaihthah a lo ni a, kan dawn rualin khawilai kil khatah emaw kan dahtha hlauh a, hmanchhuahna lam, nunchhuahpuina lam kan ngaihtuah tello a, hun lokal zelah a thamral fo.I ngaihzawng hmangaihna che kha kil khatah I dahtha mai mai anih emaw, a chhanletna lam i thatchhiatsan emaw, a man pek let tur lamah ui i nei emaw anih ngat chuan chu hmangaihna chu a hlawhtling ngailo ang. Pathianin min hmangaihna pawh hi kil khata dahthat mai mai tura kan dawn a ni lo a, a petu lamin min pek tawh miau avangin a chhanletna lama kan thatchhiat chuan kan hnawl tihna a ni tawp mai.A tawp berah chuan hmangaihna hi a petu lamin a pek anga a dawngsawngtu lamin a dawnsawn loh chuan channa nasa tak a ni tih kan hriat a tha, a petu tan leh a dawngtu tan, a tawn tawnin hlohna nasa tak a ni a, chu hmangaihna chu awmze neilo, engmahloah kan chhuah tih kan hriat a ngai. Chuvang chuan Pathian hmangaihna kan dawn hi awmze neia a parchhuah theihnan theihtawp i chhuah ve zel teh ang.

Nghehna nun

Ni te hi athat loh avangin remchanna lei zel rawh u. Chu mi avang chuan a duh suh ula, Lalpa duhzawng enge ni tih lo hre zel zawk rawh u. Ephesi 5:15

Kan tunlai thu thang lengvel chu a chiri thin ngei e. Thu thar pawh a awm hman meuh lo a, thudang zawkin min hliahkhuh chak avangin kan theihnghilh zung zung a, Nimina lama kan ngaihdan kha vawiinah chuan kan lo hre leh bar tawh lo a, Nimin lama kan dinna kha facebook thu leh hla, tu sawi emaw avangin kan lo sawhsawh leh daih tawh a, tuemaw kan huat pawh kan lo hmu dik leh em em tawh a, a sawi thiam leh awihawm lamah hian kan thle dual dual a ni ber mai.

Heng karah hian keini ringtu, Pathianin khawvel bawlhlawh karah pawha danglam tura a koh leh beisei te hian engtin nge chet kan lak ve zel tih hi mahni ngei pawh kan inzawh fo a tul. Ni thalo karah hian remchanna leiin danglam ngam kan ni zel em? Nge ni a, a tui fawn ang zelin kan inlen kual tir ve zel zawk?

Thil engkim maiah hian a lehlam atanga thlir dan a awm zel ngei tak a, chutiang chu tunlaiah kan hmatheh ber leh kan insawi thiamna pawh a ni. Engemaw thil thleng a awm apiangin a dik zawk leh a dingchang tur zawka ngaih pawh thlirna tlang dang atanga rawn vawmhnawktu te avang hian a dingchang tur ngei ngei pawh a dingchang hleitheilo fo. Chutiang dinchan tir tumtu pawh kil khatah duhthlang hleitheilo kan dangchep thin.

Zirlai naupang zawkte kan ni a, kan rilru leh ngaihtuahna te pawh thuthlukna fumfe leh nghahchhan nghet a innghat a ni kherlo ang. Chutiang anih avang tak chuan thlirna tlang dang atanga thlirna hian kan ngaihdan a sawhsawn thei viau mai a, a tha ni a kan lo hriat ve te, a dik ni a kan lo hriat ve te kha sawinghinin a awm fo. Khawvel changkanna leh finna sang zelah kan naupan laia kan lo sahuai thingvawn ve ngawt te kha sawinghinin a awm fo dawn.

Hei tak mai hi sual pawh hian remchangah a hmang ve tlat mai a, Pathian thu atanga kan han thlir pawha dinpui ngam kan tih kha achang chuan kan buaina belhchhahtu a ni thin. Kan Pathian thu chuan ‘chungte avang chuan a duh suh u’ a lo ti a, a tehna tur atana pawimawh ber chu Pathian duhzawng a ni ang em? Tih inzawh thin hi a ni. Pathian hian thlirna tlang dang a neilo a, a dik chu dik, diklo chu diklo nimai rawh se a lo ti a ni.

Kan Pathian tehna chu tehna dik, diklo theilo anih avangin kan nitin thil tawn hrang hrangah thlirna tlang dang emaw, insawi thiamna emaw hian min tibuailo se, Pathian thu dik leh diklo hian kan nun kaihruai se, mahni ngei pawh thiamchang tlak ka ni em tih zawhna ah ‘ka ni e’ ti fak ngam khawp hian dinngheh zel i tum ang u.

Rinna leh Hnehna

‘I rin chuan Pathian ropuizia I hmu ang ka ti lo che em ni’ Johana 11:40

‘Rinna hi thil beiseite awm ngeia hriatna, thil hmuhlohte hriat fiahna a ni’ Hebrai 11:1

Zirlai leh vanglai hun hmang mek, kan rilru leh ngaihtuahna te chu zirna leh khawvel thilin a chiah tam zawk takah chuan Pathian kan hriatna leh kan rinna kawngah kan sang lua lo ang tih chu a rintheih a, mahse, Pathian hian Rinna lian pui emaw Rinna sang em em emaw hi a lo phut lem lo a, kan phak tawkah, kan thlen chin zelah rinna te tak te ‘Rinna antam mu fang’ tia lek kan nei anih pawhin tlang sawn theihna khawp a ni a lo ti tlat mai.

Marthi hnenah ‘I rin chuan Pathian ropuizia i hmu ang ka ti lo che em ni’ a tih hian a rinna tur tawk a bithliah sak lo a, ama tawkah rinna chhe te a neih ve hram hram chuan Pathian ropuizia hmuhnan a tawk tih a hrilh zawk a ni. Tih tak emah chuan keini te pawh kan rinna len angzia zela Pathian ropuizia hmu tur ni ila, rinna awmzia pawh hre mumal lo hian Pathian ropuizia hmu tur khawp rinna chu kan nei thiam ngut lo ang. Kan nitin nuna thil te tham te te ah Pathian kan lo rin ve thinna te, kan damloh nikhua te, kan thlawhna chuan lai te, kan exam dawn te a Pathian hnena tawngtai ngam tura rinna kan han neih ve te hi Pathian chuan min lo pawmsak em em a, kan dilna te chu min lo ngaihthlaksakin min lo chhansak thin a lo ni.

Kan riltam chuan engemaw ei ila ka puar mai ang kan ti a, khawi khawi ami emaw eitur kan han dap khawl a, thil chi hrang hrang kan la ei ngailoh thlengin ei theih anih chuan kan ei a, kan puar phah dawn ngei tih RING chungin ngaihngam takin kan ei a, kan RINNA chuan min tipuar lo a, kan thil ei khan min tipuar a ni. Mahse, ringlo chu ni ila, kan ei hauhlo ang a, kan eiloh na na na chuan kan puar heklo ang. Pathian ropuizia hmu tur hian Rinna a ngai a, tawngtai ila Pathianin min tihsak thei tih ringin kan tawngtai a, Pathianin kan rinna fahrah te te kan han khawnkhawm kha min lo pawmsak a, kan mamawhna zawnah a ropuina a rawn puangchhuak thin. A tawpa min tipuartu, min titlaitu chu kan rinna niloin Pathian a ni a, Pathian min belhtirtu erawh Rinna a ni

He kan rinna te tak te hi Pathian hnen atanga thiltihtheihna au thla tur te, kan nitin nuna hnehna kan chan theihna tur te, mahni ngei pawh kan inhneh a, a duh anga kan nun theihna tur te a min puitu a lo ni a, ‘kei zawng Pathian hriatna kawngah ka hniam em mai’, ‘Pathian thu pawh ka hrefiah thiamlo’, ‘ka sual em mai’ kan tihna zawng zawngah hian a nghing thin chu kan rinna hi a lo ni daih a, kan han sual ve deuh avangin Pathian kan rinna hi kan ringngam zo lo thin a, Pathian thu hriatna lama kan hniam avangin Pathian kan rinna hi a lo nghing a, Pathian hi rin tlaklohah kan lo chhuah thin a lo ni.

Heng zawng zawng avang hian Hebrai ziaktu chuan ‘Rinna chu thil hmuh leh hriat, kan tawn tawh ngei avanga rinna hi nilo in, kan hmuhloh te, kan hriatloh te annih lai pawha a ni thei ang tih ngaihdan kan neih hi Rinna chu a ni e’ min lo tihsak a ni. I rinna a beitham avangin sualin remchangah hmangin rinhlehna hmangin a hneh thei che. Mahse, rinna beitham te pawha kan din nghehnaah hian Pathianin a ropuina a lantir thei a, hnehna min chan tir thei bawk tih hria ang u.

Kan rinna tlemte hi

‘I rin chuan Pathian ropuizia I hmu ang ka ti lo che em ni’ Johana 11:40

‘Rinna hi thil beiseite awm ngeia hriatna, thil hmuhlohte hriat fiahna a ni’ Hebrai 11:1

Zirlai leh vanglai hun hmang mek, kan rilru leh ngaihtuahna te chu zirna leh khawvel thilin a chiah tam zawk takah chuan Pathian kan hriatna leh kan rinna kawngah kan sang lua lo ang tih chu a rintheih a, mahse, Pathian hian Rinna lian pui emaw Rinna sang em em emaw hi a lo phut lem lo a, kan phak tawkah, kan thlen chin zelah rinna te tak te ‘Rinna antam mu fang’ tia lek kan nei anih pawhin tlang sawn theihna khawp a ni a lo ti tlat mai.

Marthi hnenah ‘I rin chuan Pathian ropuizia i hmu ang ka ti lo che em ni’ a tih hian a rinna tur tawk a bithliah sak lo a, ama tawkah rinna chhe te a neih ve hram hram chuan Pathian ropuizia hmuhnan a tawk tih a hrilh zawk a ni. Tih tak emah chuan keini te pawh kan rinna len angzia zela Pathian ropuizia hmu tur ni ila, rinna awmzia pawh hre mumal lo hian Pathian ropuizia hmu tur khawp rinna chu kan nei thiam ngut lo ang. Kan nitin nuna thil te tham te te ah Pathian kan lo rin ve thinna te, kan damloh nikhua te, kan thlawhna chuan lai te, kan exam dawn te a Pathian hnena tawngtai ngam tura rinna kan han neih ve te hi Pathian chuan min lo pawmsak em em a, kan dilna te chu min lo ngaihthlaksakin min lo chhansak thin a lo ni.

Kan riltam chuan engemaw ei ila ka puar mai ang kan ti a, khawi khawi ami emaw eitur kan han dap khawl a, thil chi hrang hrang kan la ei ngailoh thlengin ei theih anih chuan kan ei a, kan puar phah dawn ngei tih RING chungin ngaihngam takin kan ei a, kan RINNA chuan min tipuar lo a, kan thil ei khan min tipuar a ni. Mahse, ringlo chu ni ila, kan ei hauhlo ang a, kan eiloh na na na chuan kan puar heklo ang. Pathian ropuizia hmu tur hian Rinna a ngai a, tawngtai ila Pathianin min tihsak thei tih ringin kan tawngtai a, Pathianin kan rinna fahrah te te kan han khawnkhawm kha min lo pawmsak a, kan mamawhna zawnah a ropuina a rawn puangchhuak thin. A tawpa min tipuartu, min titlaitu chu kan rinna niloin Pathian a ni a, Pathian min belhtirtu erawh Rinna a ni

He kan rinna te tak te hi Pathian hnen atanga thiltihtheihna au thla tur te, kan nitin nuna hnehna kan chan theihna tur te, mahni ngei pawh kan inhneh a, a duh anga kan nun theihna tur te a min puitu a lo ni a, ‘kei zawng Pathian hriatna kawngah ka hniam em mai’, ‘Pathian thu pawh ka hrefiah thiamlo’, ‘ka sual em mai’ kan tihna zawng zawngah hian a nghing thin chu kan rinna hi a lo ni daih a, kan han sual ve deuh avangin Pathian kan rinna hi kan ringngam zo lo thin a, Pathian thu hriatna lama kan hniam avangin Pathian kan rinna hi a lo nghing a, Pathian hi rin tlaklohah kan lo chhuah thin a lo ni.

Heng zawng zawng avang hian Hebrai ziaktu chuan ‘Rinna chu thil hmuh leh hriat, kan tawn tawh ngei avanga rinna hi nilo in, kan hmuhloh te, kan hriatloh te annih lai pawha a ni thei ang tih ngaihdan kan neih hi Rinna chu a ni e’ min lo tihsak a ni. I rinna a beitham avangin sualin remchangah hmangin rinhlehna hmangin a hneh thei che. Mahse, rinna beitham te pawha kan din nghehnaah hian Pathianin a ropuina a lantir thei a, hnehna min chan tir thei bawk tih hria ang u.

Thawhrim hi a chhanna a ni

 Mahni inlum chhuahsana thlawhhma thar la tura lo feh chhuak zawng zawngte, a thei leh chak apiang dinchhuahna khawpui Hyderabad ah kan lo lawm a che u. In lo thlen thlak ve takah chuan khualtha lawmin kan lo lawm che u a, mahse, fa tak enkawl chuan kan lo enkawl thei dawnlo che u tih erawh han inchah zui nghal ila, in thlawhhma lakna turah kan tih theih sang ber duhsakna kan hlan tawp mai ang che u.

Mahni inlumah kha chuan sem sem dam dam, ei bil thi thi in ti a, a nuam leh hreawmah in indawm nung za ngei a, helaiah zawng ‘a thei thei dinchhuahna khawvel’ tih a ni tawh dawn a, in chenpui leh in fehchhuahpui te nen ngei pawh a dingchang zawk nih in inchuh angai dawn. Israel fate hnenah Lalpan ‘In hmaah nunna leh thihna ka dah e, in duh chu thlang fel rawh u’ a tih ang maiin tunah hian in hmaah hlawhtlinna leh hlawhchhamna dahin a awm a, chu chu taihmakna leh thatchhiatna hmangin i thlang nitin tawh dawn.

Pathian thu pawh hian hei hi min lo zirtir ve bawk ania. Pathianin Adama hnenah “..I dam chhung zawngin rim taka thawkin lei rah chu i ei tawh ang… leia i kir leh hma loh chuan hmaia thlantui luang zawih zawihin chawi i ei tawh ang…’ a tih khan dam khawchhuak tur chuan hmaia thlantui luanga beih angai tih a sawichiang a, thatchhe chung chuan ei hmuh beisei suh a tihna a ni.

Kan tunlai thalai te zingah thawhtur hrelo te, tihtur neilo te kan awm suau suau mai hi a mak khawp mai. Kan chhuanlam tam tak chu awmzia omlo, a hlawklo tih vel a ni tlangpui a, nileng lengin awmze nei leh hlawk zawk chu kan zawng nihmiang, kan leng suau suau a, engmah lah kan hmuchhuak lem hleilo. Hetiang formula hmang hian kan zirlai te hi zir kan lo tum ang e. A awmze awm leh hlawk ber, Pathian ngeiin kawng a ruatsa chu hmaia thlantui luang khawpa beih a ni. Chutih rual chuan thawhrimna tello chuan eng hlawhtlinna mah hi a hlu lo tih te pawh hi zir tel ta ila, a hlutloh piahlamah a tlo lo lehzel bawk tih te phei chu mahni ngei pawh inhrilh nawn fo chi. Hlawhtlinna emaw kan tih a tlo lo tih kan han dai hriat leh meuh hi chuan a lo tlai chhe viau tawh thin a, siamthat leh a har tawh thin.

Lal Isuan tehkhinthu pakhat a sawi a, mifing lungpui chunga in satu leh mi a tiaudup chunga in satu. Lungpui chunga insak hi thil awlai a ni hauhlo ang a, a bankhur laih ringawt pawh a va hautak dawn em! Nia, thlantui luanga beih fat fat ngai, thawhrimna nen takmeuha sak a ngai ang. Tiaudup chunga chuan hahdam takin a sak theih tehmeuh ang chu, mahse, a tlo zawk leh kumhlun zawk chu thlantui nena sak kha a ni tlat mai.

Anihna tak takah chuan awmzia omlo, a hlawklo kan tihte pawh hi awmze nei tham leh hlawk thama kan beih fat fat loh vang a ni. Chutih lai vekin kan hlawhchhamnaah midang dingchhuak an rawn awm leh thei lawi bawk a, Pathian thu ang taka taima taka lungpui chunga bankhur ringawt pawh beidawnpui tham tur bei ngat ngat te hian hlawhtlinna in nuam an lo sa thin a, a hahthlak tur ngaingamlo a tiaudup chunga in sa te hi kan lo hahthlawn thin zawk a lo ni.

He khawpui, mi tinreng mai mahni tana chakai khawrha an liam suau suau na hmunah hian hlawhtlinna nopui i dawm ve duh anih chuan taima taka beih hi a kawng awmchhun a ni. Atthlak khawpa taima nih pawh hreh suh. Atna hmunah pawh finna chhar tur a lo awm zel mai ang. A hlawhchham dawn tih hre chung pawha i bei ngat ngat anih chuan a hlawhtlin dan tur tal i chhar chhuak em em ang. Taihmakna nen chuan engmah hi hlawhchhamna a ni lo a, hlawhtlinna tur kawng dik zawk chharchhuahna zel a ni. Thatchhiatna avanga kawng laka kawng awlsam dap te hian hlawhchhamna an seng zawk thin a ni tih hriain taima takin hlawhtlinna nomawi nen i haw leh kan duhsak a che.