Nghehna nun

Ni te hi athat loh avangin remchanna lei zel rawh u. Chu mi avang chuan a duh suh ula, Lalpa duhzawng enge ni tih lo hre zel zawk rawh u. Ephesi 5:15

Kan tunlai thu thang lengvel chu a chiri thin ngei e. Thu thar pawh a awm hman meuh lo a, thudang zawkin min hliahkhuh chak avangin kan theihnghilh zung zung a, Nimina lama kan ngaihdan kha vawiinah chuan kan lo hre leh bar tawh lo a, Nimin lama kan dinna kha facebook thu leh hla, tu sawi emaw avangin kan lo sawhsawh leh daih tawh a, tuemaw kan huat pawh kan lo hmu dik leh em em tawh a, a sawi thiam leh awihawm lamah hian kan thle dual dual a ni ber mai.

Heng karah hian keini ringtu, Pathianin khawvel bawlhlawh karah pawha danglam tura a koh leh beisei te hian engtin nge chet kan lak ve zel tih hi mahni ngei pawh kan inzawh fo a tul. Ni thalo karah hian remchanna leiin danglam ngam kan ni zel em? Nge ni a, a tui fawn ang zelin kan inlen kual tir ve zel zawk?

Thil engkim maiah hian a lehlam atanga thlir dan a awm zel ngei tak a, chutiang chu tunlaiah kan hmatheh ber leh kan insawi thiamna pawh a ni. Engemaw thil thleng a awm apiangin a dik zawk leh a dingchang tur zawka ngaih pawh thlirna tlang dang atanga rawn vawmhnawktu te avang hian a dingchang tur ngei ngei pawh a dingchang hleitheilo fo. Chutiang dinchan tir tumtu pawh kil khatah duhthlang hleitheilo kan dangchep thin.

Zirlai naupang zawkte kan ni a, kan rilru leh ngaihtuahna te pawh thuthlukna fumfe leh nghahchhan nghet a innghat a ni kherlo ang. Chutiang anih avang tak chuan thlirna tlang dang atanga thlirna hian kan ngaihdan a sawhsawn thei viau mai a, a tha ni a kan lo hriat ve te, a dik ni a kan lo hriat ve te kha sawinghinin a awm fo. Khawvel changkanna leh finna sang zelah kan naupan laia kan lo sahuai thingvawn ve ngawt te kha sawinghinin a awm fo dawn.

Hei tak mai hi sual pawh hian remchangah a hmang ve tlat mai a, Pathian thu atanga kan han thlir pawha dinpui ngam kan tih kha achang chuan kan buaina belhchhahtu a ni thin. Kan Pathian thu chuan ‘chungte avang chuan a duh suh u’ a lo ti a, a tehna tur atana pawimawh ber chu Pathian duhzawng a ni ang em? Tih inzawh thin hi a ni. Pathian hian thlirna tlang dang a neilo a, a dik chu dik, diklo chu diklo nimai rawh se a lo ti a ni.

Kan Pathian tehna chu tehna dik, diklo theilo anih avangin kan nitin thil tawn hrang hrangah thlirna tlang dang emaw, insawi thiamna emaw hian min tibuailo se, Pathian thu dik leh diklo hian kan nun kaihruai se, mahni ngei pawh thiamchang tlak ka ni em tih zawhna ah ‘ka ni e’ ti fak ngam khawp hian dinngheh zel i tum ang u.