Kan nun leh Pathian inlaichinna

Kei Lalpa I Pathian, Aigupta ram ata, bawih ata hruai chhuaktu che u ka ni. Keimah lo chu Pathian dang reng reng I nei tur a ni lo. Exodus 20:2

Aw, thangtharte u, Lalpa thu hi hre rawh u. Israel tan thlaler ram ang ka ni em ni? Thim chhah mup ram ka ni em ni? Ka mite chuan engah nge ‘Kan chhuak fel ta, I hnenah kan let leh lo ang’ antih ni? Jeremia 2:31

‘Ka nun ania, ka thu a ni’ tih tawngkam, a saptawng takin ‘Its my life’ hi tunlai thangthar te hian a lang chuan sawi dum dum lo mah ila, atakin kan nunpui a, hei hian kan inthenawm khawvenna te, kan mihringpui te karah te, keimahni theuh leh Pathian inkarah te nghawng thui tak a nei a, mahni duhdan leh mahni thu ang zela kan nun hi kan dikna niin kan ngai a, mi-dangin min rawn daikalh hian thil tisualah kan puh deuh tlat tawh a, chutiang ang hawi zawng chuan Pathian pawh hi kan dawr tan ta.

Khawvel a changkang chho zel a, thiamna leh finna a sang zel a, kan khawsak phung leh nundan pawh a changkang khawp tawh mai. Changkanna hi a lawmawm rualin changkanna in a ken tel ber chu mihringte nun nuam zawk leh awlsam zawka min nuntir a ni a, chu chuan midang mamawhloin min siam a, mahniin min awmtlei a, mahni tawkah nung ve thei, midang te tello pawha dam khawchhuak ve thei niin kan inngai a, chutiang bawk chuan Pathian tello a tlei zo nun hian min chiahpiah tan ta.

Social Media kan tihah pawh hian thu post leh sawihona tam tak kan chhiar thinin a rinawm. Chungah chuan midang khei zawng emaw midang tihdik tum zawng emaw, an diklohna va sawi a, kawng dik zawk tur ni a ngaih va sawi emaw hian heng a chunga kan han sawi tak dikzia hi a chiang khawp mai. A lehlingin min rawn chilh hrep tawh zawk a, a dik emaw diklo emaw midang nunah hian sawi theih kan nei tlem sawt khawp mai. Chu chuan kan mimal nun theuh hi a thalo zawngin min kaihruai nasa em em a, langlo lamah bumin kan awm mek a ni te pawhin a hriat.

Tunhmaa sualna hrang hrang lar thin te chuan mual min liamsan mek a, mahse, chungah chuan fihlim si hian sual bumna hnuaiah hian kan lo leng reng thei tlat mai. Mahni tawkah fel ve ni a kan inhriat hian Pathian kan mamawhna min ngaihthah tir a, midangin kan nuna thu an neih kan ngai-htheihloh viau chuan Pathianin kan chunga thu a nei tur pawh hi kan hriat hauhlo hian sirah kan lo hnawl daih a, kan phak tawk leh peih tawkah, a awm leh mawi tawkah Pathian chu kan inrawlh tir chauh thin a lo ni. Hei tak mai hi kan fimkhurna tur chu a ni ta.

Amah Pathian lo chu Pathian dang reng reng neilo tur kan ni. Chumi awmzia chu mahni ngei pawh a thuhnuaia kun tlat a, mahni duhdan leh mahni thu te chu hnawl a, a duh dan zawm tur kan ni. Pathianin zalenna min-pek hi keimahni duh dan dana nunna tura zalenna a ni lo a, amah ngei Pathi-ana kan thlan a, keimahni duhthu ngeia a thuhnuaia kan intukluhna tur zawk a ni. Chuti nilo a mahni kan indah chungnun vaih chuan Pathianah hian beisei tur dang kan nei lo ang

Thalaite abikin helam kawngah hian fimkhur a ngai. Kohhran leh khawtlang mithmuha thiamchanna mai hi thiamchanna famkim a ni lo tih hria ila, mahni leh mahni hi kan inbum thei tih hi hria ila, Pathian nena kan inlaichinna hi mahni ngeiin i fiah thin ang u. Chutilo zawng kan hriatloh hian bumna thangah kan lo tang reng dah ang e.

Thiltih leh thinlung

Nimahsela Lalpa chuan Samuela hnenah ‘A hmêl lam emaw, a sân lam emaw en suh; ani hi chu ka duhlo a ni; Lalpa chuan mihring en dân an-gin a en ve si lo va, mihring chuan pawn lam lan dân an en ṭhin a, Lalpa erawh chuan thinlung lam a en zawk ṭhin a ni’ (I Samuel 16:7)

Aw Jerusalem. Suahsualna ata i thinlung tlêngfai la, chhan-dama i awm theihna turin eng chen nge i ngaihtuahna sual chu i pai dawn? (Jeremia 4:14)

Kan Pathian thu chuan „pawnlam aṭanga lût hian mihring min ti-bawlhhlawh lo a, chhunglam aṭanga lo chhuak hi mihring tibawlhhlawhtu chu a ni‟ tiin a sawi a, kan nihna diktak buk nan chuan kan incheina emaw kan hmêl landan emaw ai chuan kan ṭawngka leh chet chhuah dan hi a lo pawi-mawh zawk a, kan Pathian chuan chu chu min hmuhsak avangin pawnlam atangin min têh lo a, chhûnglam aṭangin min the zawk a, mihring tân chuan chhûnglam ngaihtuahna te chu inhriatsak rual nilo mahse, kan thinlunga khatliam hi kan nunchhuahpui tlat avangin kan awmdan hian kan chhunglam nihna a lo phochhuak ṭhin.

Mihring hriatna leh finna chu a tlem êm a, kan hmuh leh hriat atang hian ngaihdan kan siam a ni chauh a, Pathian erawh chuan chutianga hmuh leh hriat theih piahlamah chuan kan nihna dik tak min hriatsak vek a, chumi vang chu a ni mahna „thinlunga thianghlimte chuan Pathian an hmu dawn a ni‟ ti a min lo hrilh. Kan tihsual fo ṭhin chu kan pâwnlam landan ang hi Pathian lakah pawh kan landan tur emaw kan ti ṭhin a, midang mai nilo hian mahni pawh kan inbum tel ṭhin a, kan thiltih leh rawngbawlna ve chhun chhun avang hian lawmman beisei tur emaw kan inti ṭhin a, chhunglam buktu lakah hian engtinnge kan lan tih kan ngaihtuah tel a va ṭul em! Chuti anih loh chuan kan thiltih te hian ram ropui min thlen zolo ang tih a hlawuhawm

Kan infuihna ṭhin pawimawh tak chu kan thiltih ve theih chhun chhun te rawngbawlnaa ngaia ṭhahnemngaia hlenchhuah hi a ni a, a pawimawh khawp mai. Chumi piahlamah chuan kan thiltih ringawt hi chu kan chham-damna tur emaw Pathian hmaa kan thiamchanna tur emaw atan a tâwk zo lo tih kan hriattel a ṭul. Kan rawngbawlna kawngah hian a châng chuan kan ṭhahnemngaih luatah midangte lakah rilru fello te kan pu hial ṭhin a, ṭhahnemngaihna vang chu nimahse, thinlung buktu hmaah hian a felhlel ang tih a hlauhawm. Kan thawh avanga felna hlawhchhuak kan ni lo a, a zahngai-hna avang zawka thiamchang kan nih kan hriat reng a ṭul. Chutiang anihloh chuan kan hahthlawn mai ang tih a hlauhawm.

Midang kan ṭanpui dan te, midangte tâna kan ṭhahnemngaih dan te hi Pathian rilrem zawng, Pathian hmaa dinpui tlak anih theihnan kan inenfiah fo tur a ni. Mahni lama lo let leh tur sawhkhawk beisei vang emaw, midangte mithmuha lan mawi tumna vang emaw, dinhmun ṭha zâwk beiseina avang mai emaw te a tha thawh ṭhin kan nih chuan rawngbawlnaa kan ngaihte hian Pathian a tilawm zo lo ang tih a hlauhawm a, kumin kum hmawr kan bawk mek lai leh kum thar hun kan hmathlir mek lai hian kan thiltih tawhte thlir let ila, awmze nei zawk leh rahtha zawk chhuah tur hian mahni theuh inbuatsaih zel ang u.

Neitu Nihna

           Taksa pumkhatah peng tam tak kan nei a, peng zawng zawng thiltih erawh a inang lo a, chutiang bawkin keini tamtak ni mah ila, Kristaah chuan taksa pumkhat kan ni a, a mal malin inpeng tawn theuh kan ni…. Rom 12:4

           Mit hian kut hnenah ‘Engahmah ka duh lo a che’ a ti thei lo. Lu pawh hian kephahte hnenah ‘engahmah ka duh lo a che u’ a ti thei bawk hek lo. Korinth 12:12

‘Mahni i inhmangaih ang bawkin midangte pawh i hmangaih tur a ni’ tih hian midang te hi keini ang bawka pawimawh leh tangkai annih chu a sawi fiah khawp mai a, tumah mahni a dam khaw chhuak thei kan awm lo a, in mamawh tawn vek kan ni. Dam khawchhuak thei pawh ni ila, mahni a awmpeih chu kan awm kherlo ang. Midangte hlutna leh midangte tangkaina hi an awmloh hian kan hrethiam chauh thin a, an awm lai hi chuan a tur ve renga ngaiin kan enliam mai mai thin. Hei hian kan nitin nuna kan thiltih kawng hrang hrangah nghawng a lo nei ve zel a, kan zirna kawngah te, kan hnathawhna kawngah te a dingchangzawk nih kan tum a, kan bula mite chu awmlo pawh nise ‘keimah ka dinchhuah chuan a tawk’ tihna rilru hi kan nei. Mahse, kan tum ang takin dingchhuakin midangte chu lo ral nita se, mahni tawkah thei rual thah, midangte neksawra midangte nek rala rawn dingchhuak vek ni ta ila, kan nuamsa lo ngawt ang. Kan vanneih asiamin heng mi te zawk leh chaklo zawkte hi kan kiangah an la awm ve zel a, kan nun min tinuamtu, dam man ti awmtu te an la ni zawk a, anni hi awmlose chu kan nuamsa biklo viau ang.

He mahni dinchan tumna khawvel hian min luah tlat avang hian thil tam takah telve lo tura inngaihna te kan neih phah a, chu chuan mahni chu a thlirtu, a lo sawiseltu, a kotlang atanga lo entu dinhmunah min dah thin. Kan zirna kawngah leh kan hnathawhnaah te pawh kan tihtur chin kan hre em em a, a bak tih tumna kan nei lo fo. Kan hnathawhna office emaw company emaw pawh nise mahni ta ena en nachang kan hre ngailo. Kan zirna kawngah pawh zirlai zir bak tih kan tum lo a, kan zirna school atana neitu nihna kan inpe ngailo.

Heng hian kan rawngbawlna kawngah pawh nghawng lian tak a nei mek a, Kohhranah pawh a neitu nih ai chuan a thlirtu, a kotlang lama awmah kan indah tlat a, pastor te upa te tihtur, leader leh comt memberte tihtur ang zawngin thil kan thlir a, a sir atangin kan lo sawisel thin. Chu chuan kan rawngbawlhona kawngah min puilo khawp mai. A neitu nihna kan rilruah a awm lo a, kan tih tur bakah kan ngai thin. Mahse, anni leh keini hi inpeng tawn theuh kan nih avangin kan tangkaina a inthlau reng reng lo a, Kohhran rawngbawlna kawng hrang hrangah hian a tello tur kan lo awm chuanglo.

Heng lai vairamah pawh kan inpawh tlanna tur atanah, kan rawngbawlhona tur atanah Kohhran leh fellowship te kan nei a, a peng pawimawh kan nih hi kan hre duhlo tlat thin hi a buaithlakna a ni. Kan theih tawk atam lua lo pawh a ni thei a, mahse, a neitu ka nih avang erawh chuan ka theihtawk chu ka ti tur a ni tihna rilru hi nei theuh thei ila  hei aia nasa hian hma kan sawn ngei ang.

Tuhrah seng

           Mi tin an chunga roreltute thu thuin awm rawh se. Pathian thu lovin tumah roreltu an awm si lo. Roreltua awmte hi Pathian ruat an ni. Rom 13:1

           Mite an thiltih ang zelin a thungrul ang a, mi tin, an awm dan ang zelin an chungah a thlentir dawn si a Joba 34:11

Bible a roreltu te hi ‘Pathian ruat an ni’ tih lo inziak hi chu a chang chuan a pawmawmloh lek lek fo ta mai. Pathian ruat atanah chuan a ni theilo ang tihtur te pawh kan hre nuk awm e. Mahse, roreltu te hi ruat annih dan kan ngaihtuah tel a pawimawh khawp mai. Roreltute kan han cho thar thar thin te pawh hi lehlamah chuan Pathian finna kan cho a nihna lai te pawh a awm hial zawk a, Pathian hian a tidiklo a ni ti ang zia zanga roreltu tura min pekte kan han khing thin pawh hi ngaihtuah chian a tul. Roreltu ruat hi a hun lai atana tha, nakin hun atana tha tur, thil awm mek leh lo la awmtur atana Pathian remruat kawng khat a ni ve tlat mai a, kan hriatthiam chin atang maia kan teh thin hi kan tihfuh theihloh pakhat a ni.

Roreltute lam dinhmun atangin thil kan thlir a, an tihawm tak an tihloh te, an tihloh tur an tih te, an tihsual hnawk neih nuaih te kan hmuh hmaih lo. ‘Kei chu ni ila…’ tiin duhthu te pawh kan sam thin. Mahse, keini a thlirtute hian roreltute dinhmun atang nilo, mahni dinhmun atang zawk hian thil awmdan hi kan thlir mawh khawp mai. Pathian chuan mitin an thiltih ang zelin a relsak tih hi kan pawm anih chuan roreltu tura min ruatsak pawh hi kan thiltih rah kan sengnaah kan pawm ava ngai si em. Kan chunga roreltu te an thalo kan tih mek lai hian hetiang roreltu nei tur tawk lek hi ka lo ni kan ti ngai em? Pathianin van atangin hei in roreltu tur a rawn ti lo a, Lal Saula hunlai ang chauh khan keimahni ngei hian kan chunga ro min relsaktu tur hi kan thlang a, kan thlang sual ta zawk a ni.

Roreltute hi ruat annih dan kawng te pawh kan ngaihtuah tel a tha awm e. Pathianin duhthlanna min pe a, a chhia leh tha chu hria a, a tha lam kawng zawh tur pawhin min duh. Mahse, keimahni duhthu ngeiin a tha tur zawk lam chu thlangloin mahni hmasialna nen, duhamna nen roreltu tur kan thlang a, kan tuhrah kan seng a, mahni hmasial leh duham te kan thlang chhuak ta nuk mai. Pathian tih chunga Pathian rawn chunga hreawm huama roreltu tur hi thlang ni ta ila, Pathian tihmi hi kan nei mai tur a ni dawn lawm ni!

Thil reng rengah hian mahni indahtha a, midang thiamloh chantir hi mihring mizia pakhat a ni. Chutiang avang chuan roreltu kan han neih thinah pawh hian mahni inthiamlohna emaw mahni lam diklohna emaw kan hmu fuh thin lo. Midang avanga tuarah kan inngai a, midang tihdikloh rah sengah kan inngai thin. Mahse, chuti ngawt chu a ni lo tih hi mahni ngei kan inbihchian a, kan hriatfiah a pawimawh. Roreltute hi nang leh keia tan darthlang pakhat a ni. Engang chhungkua nge kan nih tih chu kan khawlai nun hian a tarlang angin, eng ang roreltu nge kan neih tih hian engang mipui nge kan nih tih hi a tichiang a, kan thiltih angzelin Pathianin kan chantawk tur min chantir tih hi phat rual a ni lo. Roreltute hi nang leh kei atana Pathian ruat an ni si a.

Thuawihna

                Tin, Samuela chuan ‘Lalpa chuan Lalpa thu zawm chu a lawm angin halral thilhlante leh inthawina te hi a lawm em ni? Ngaiteh, inthawina aiin thuawih chu a tha zawk a, berampa thau aiin a thu pawm chu a tha zawk a ni. Lalpa thu i duh loh avangin a ni pawhin lal atan a duh bik ta lo che a ni’ a ti a

                ‘Nimahsela, tunlai chhuante hi engnen nge ka tehkhin ang? naupang dawr hmunah te thu a, an thiante au a, phenglawng ka tumsak che u a, in lam si lo a.. Mathaia 11:16

                Pathian hian a mihring siamte hi van atang hian rawn thlir se la, a rilru a buai ve thin ngawt ang. Kan pawnlam landanah chuan Pathian mi, Pathian nena lengdun thin kan ni vek mai a, kan phak tawk ang te te chuan a thuzawm niin kan inhre ve thin. Mahse, hetih lai reng hian bumna thangah hian kan lo awk reng lo maw tih hi ngaihtuah tham tak chu a ni si. Kohhran leh khawtlang pawl te pawh hi han en thuak chuan Pathian rinchhana kal, Pathian duhdan a ram kaihhruai tum te pawh an ang ngei tak a, mahse, a tak takah chuan thuawihna nen Pathian hi an ngaichang meuh em aw tih tur a ni. Kan duhdan leh kan hmanhlelna hrang hrang te, rawngbawlna kawngah kan thahnemngaihna tam tak te hian Thuawihna aiin inthawina lamah hian kan inhmang ta deuh lo maw tih mai a va awl em!

                Pathiana kan rinna hi thuawihna nen hian a inthlung kawp tlat mai a, thuawihna tak tak nen lo chuan rinna pawh engmah lo mai a lo ni. Mi tu emawin Pathian ka ring ti se, a nunah engmah hmuh tur awmlo si sela, chu chu rinna dik emaw rinna nung emaw a ni theilo ang. Lal Isua hunlai a ‘phenglawng tum a lam silo’ a tih ang deuh hian khatih huna thangthar te leh tunlai a thangthar te hi kan lo la danglam lo a ni ang. Anih dan tur ang taka nih ai chuan a lem leh der nun hi kan thiam tlat. Thing chu a rah zirin a hriat a ni tih ang maiin kan nihna lo a lan kan tum a, kan rahah kan nihna a lang leh lawi si

                Mahni ngaiha tha te, mahni ngaiha dik te hi Pathian ngaihah a tha in a dik em tih te hi kan ngaihtuah fo a pawimawh khawp mai. Kan phak ang tawk chuan rawngbawlna kawngah pawh kan inhmang ve a ni thei a, mahse, keimahni ngaiha tha leh fel ngawt hmanga rawng kan lo bawl anih chuan kan hahthlawn viau dawn a ni. Lal Saula pawh hian ama ngaiha tha chu a thawk a, mahse, chu chu Pathian thupek leh Pathian duhdan a ni lo. Kan rawngbawlna kawngah, kohhran a ni emaw khawtlang a ni emaw Pathianin min dahna hmun anih ang taka a thu zawm a, a duhdana kan kalloh chuan hremna bak kan hlawhchhuak lo ang

                Zirlai te, hnathawk te kan ni a, kan zirnaah te, kan hnathawhnaah te Pathian thu zawm hi kan dah pawimawh hmasa fo tur a ni. Thil tha leh thil tha inkarah thlan tur zawk kan buai fo thin maithei a, chung hunah chuan Pathian duhdan leh Pathian in min duhdan tur eng zawk nge ni ang tih mai hian a chingfel lo. Pathian duhdan ngaichang hmanlo khawpin kan hnaah te, kan zirnaah te kan lo buai hlauh dah ang e. Chuti anih chuan mahni duhdana vanglai hun chen mek te nen hian danglamna reng kan nei lo ang. Engtik lai pawhin kan duhdan aia Pathian duhdana nung tur kan ni si a

Lalna leh Ropuina

Tin, Saula chuan ‘Halral thilhlan leh remna thilhlan turte chu hetah ka hnenah han la rawh u’ a ti a, chutichuan halral thilhlan chu a hlan a, tin, halral thilhlan a hlan zo chauh a, Samuela chu a lo thleng ta a, … tin, Samuela chuan Saula hnenah ‘ I thiltih dan hi a atthlak hle mai. Lalpa i Pathian thupek hi i zawm lo a ni. I lalna chu kumkhuaa tihngheh tum zawng a ni na ale, i lalna chu a kin tawh ang. Lalpa thupek chu i zawm loh avangin’ a ti a… I Samuela 13:9

Mihring te tana thang hlauhawm ber chu lalna leh thuneihna hi a ni an ti thin. Thang hlauhawm tak anih rualin thang it awm tak, awhna atana chakawm tak mai a ni roh a, he thanga awk tan chhuah leh a har tawh thin. Lalpa tan pawh hian he thanga awk tawhte hi chu an deh a khirh thin hian ka ring. Khawvel mithmuha sualna nisi lo, ruih bung bungna emaw nawmchenna emaw lam pawh nisi lo, ruih theih thil anga han sim maitheih ni bawk si lo. Amah maia sual ni hauhlo, mahse mihringte bum thlu der thei bawk si leh sualna dang zawng aia Pathian hlat tir thei ber a ni a, a mak danglam ve ngawt mai.

Lal Saula chu Pathianin a mi Israel te lal atan hriak a thih a, amah mai nilo a thlah lo la awm lehzel te pawh lal atan a hauh lawk sak a, mahse, chu lalna leh thuneihna a neih chu a petu Pathian duhdan anglo hlir maiin a hmang ta si a, a lalna chu chhuhsakin a awm zui ta a ni. Suala hian Pathian a hriat dan te, Pathian nena an inpawh dan te kan hre tam lo a, han ngaihtuah thuak chuan Pathian hriatna lamah hian a ril vaklo pawh a ang hle. Mahse, Pathianin a mi Israel te lal atan a ko chhuak a, chu dinhmun pawimawh tak mai amah Pathian rinchhana a luah kha a pawimawh lai tak chu a ni.

Kan awmdan te, kan pian leh murna te chuan lalna leh thuneihna nei turin min tlinpui lo a ni thei. Mahni lam tlinlohna en chuan midang zawk tih atan kan duh viau te pawh a awm thei. Mahse, Pathianin min kohna leh tlinga min pawmna hi kan pawm mai tur, tlanchhiatsan loh tur a ni. A chhan chu min kotu a rinawm avangin kan kal chhoh zel danah pawh min hruai ang tih rin tur a ni. Pathian hian hotu dinhmuna min dah rual hian kan kal dan turah amah ringa, a thu ngaichanga kan kal hi a duh ngeiin a rinawm. A buaithlak zawk fo thin chu chutiang dinhmuna kan awm apianga mahni duhdan hmanga kal kan tum thin hi a ni. Lal Saula pawh hian heihi a tihsual lian tak a ni a, Pathianin tih tura a tih te chu thuawih tak zel khan hlenchhuak se a thatpui tur anih laiin ama duhdan leh tha tihdan kha a kalpui tel ta tlat mai a, ama remhriatna zawka a han kal fo takah chuan ‘I lalna chu a kin tawh ang, Lalpa thupek i zawmloh avangin’ tih a hlawh ta a ni. Hei hi keini tan pawh zirlai pawimawh tak mai a ni.

Zirlai te kan ni a, kan zirna kawngah hian Pathianin kal dan tur min ruatsak kawng hi kan ngaihchan fo a pawimawh. Pathian min duhdan aia kan duhdana kan zirlai kan zir chuan kan tisual ang. Kan rawngbawlna zawn theuhah te hian min kotu Lalpa duhdan angin kan kal em tih te hi ngaihpawimawh a va tul em. Mahni duhdan maia rawng kan lo bawl anih chuan Pathian hian kan rawngbawlna hian min hawisan mai dah ang e. Keimahni mai atan nilo, chhuan lo la awm turte tan pawh malsawmna kan nih theih nan Pathian duhdan i ngaichang ang u

Pathian leh Mihring

Israela thlah mipui ho zawng zawng chu bia la, an hnenah, ‘In thianghlim tur a ni, kei in Pathian hi ka thianghlim si a’ Leviticus 19:2 

Lalpa chuan a rilruin ‘Lei chu mihring avangin anchhia ka lawh leh tawh lo vang. Mihring rilru ngaihtuahna te chu an naupan tet ata a sual si a’ a ti a Genesis 8:21 

Mihringte nuna buaithlak deuh mai pakhat chu Pathian in amah angin min siam a, amah ang tura beisei kan nih lai a kan felna ber pawh Pathian lakah chuan pawnchhe hnangkhai tluk chauh a ni mai hi a ni. Chumi awmzia chu mihringte hi fel famkim thei pawh lo ni ta tehreng ila, sawiselna tur awmlo khawpa fel, hmangaihna kawngah te mahni aia midang hmangaih a mahni inhlan ral raih theih pawh lo ni ila, Pathian felna nena khaikhin chuan engmahlo mai ala ni cheu ang. Chutiang anih ahnu, chutiang taka fel thei chu kan ni der bawk si lo a, Mahse, Pathian engkim hretu, kei-mahni kan inhriat aia min hrechiangtu hian hetiang zawng hian min beisei reng em? Min beisei lo ni ta se, thil theihloh tawp beisei ang a ni dawn bawk si a, a va mak teh nuaih dawn em!

Pathian famkimna hmaah hian engtikah mah mihringte hi kan famkim thei ngailo ang. Kan naupan tet ata kan ngaihtuahna te chu a sual a, chu chu kan rawn thanlenpui a, a lo puitlin meuh chuan hmuh theih sualna hrang hrangah a rawn lang chhuak ta thin a ni. Chu chu kan duhloh avanga kan sim ngawt theih a ni lo. Zu te, ruihtheih thil tih te chu kan sim mai thei. Kan rilrua midang huatna kan han neih ngawt thin te, mahni kan inhmangaihna te, kan mamawh bak pawh kan duh leh awhna te, engemaw chang a kan thimrim a midang aia mahni zawk inthiam tlatna te; Nia, chhunglama kan sualna zawk hi kan sim theihloh kan thih thlenga min chenchilh tlattu, Pathian laka kan bawlhlawhna chu a ni. 

Hei tak mai hi kan thliar thiam a pawimawh khawp mai. Pawnlam landana Pathian dan zawm mai hian kan chhungril nun a siamtha lo. Mite mithmuha fel kan nihna mai hian felna tlangah min chuan tir ngawt lo. Chumi anih avang chuan mahni fel tuma kan inhai buai hian kan nun min tibuai thlawn a ni. Chhunglama damlo, hri vei nei, pawnlama langchhuak silo ang chauh kan ni a, kan hriselna a ziktluak lo. Mahse, mak tak maiin hemi kawngah hian theihtawp kan chhuah a, mahni tawka Pathian thu zawm kan tum a, rawngbawlna kawngah kan inhmang a, fel kan tum em em thung si. 

Pathian min hrechiang tu chuan ‘nangni thawkrim leh phurrit phur te kha lokal teh u, keiman ka lo chawlh tir ang che u’ a tih hian he kan buaina ruam ata hi chhuahsan turin min ko. Pathian leh mi-hring dinhmun hi kan ngaihtuah chiang ngailo a, Pathianin ‘In thianghlim tur a ni’ a tih avang mai hian mihringte hi thianghlim tur a nung a, thianghlim thei emaw kan inti ngawt ang e. A teuh lo mai. Engtikah mah Pathian thianghlimna ang hi chuan i thianghlim thei ngai lo ang. Zu inloh ngawt hi Pathian anga thianghlimna a ni lo. Ruih loh ngawt emaw mipat hmeichhiatna laka thianghlim emaw ngawt hi Pathian thianghlimna tluk anga thianghlimna a ni ngawt lo. 

Chutichuan heti zawng zawk hian han ngaihtuah teh ang. Mahni dinhmun hria a, mihring dinhmun hrechiang a, mahni lama tih tum ai chuan, Pathian thianghlim, sawisel kailo zawkah hian thiangh-lim tum ta ila, mihringin a theihloh avangin Pathian theihna zawk kha tawmpui tum ila, chu chu kan aia a rawn thih chhan pawh a ni. ‘Nangmah chuan a beidawn thlak em mai, keiman ka lo tihsak mai ang che. Ka tihsa chu keng la, Pathian hnenah i va inlan dawn nia’ tiin Lal Isuan (Amah Pathian ngeiin) min tih hi zawm mai zawk teh ang u.

PF Consultancy - PF chungchang

India ram khawpui hrang hrangah thalai te hnathawkin kan chhuak ve ta hlawm a, Sawrkar hna ni lo heng customer service, hotel leh company hrang hrangah.. kan thawhnaah hian Dan in a phut avangin Provident Fund (PF) kan hlawh atangin an cut thin a, hei hi kan ban hnuah lak chhuah leh theih a ni. Thenkhat ten angaihna kan hriat loh avangin kan ngaihthah ta mai thin a, thenkhat lak chhuah duh engemaw avanga lak chhuah ngaihna hre tawhlo emaw te pawh a awm theih ang. Heng anga harsatna emaw puihna mamawh emaw in awm chuan kan lo pui thei che u. Pawisa lak chhuah fel vek hnuah kut hah man lawmman tlem azawng kan inpe ve thin a, lak chhuah ngaihna awm ta lo emaw harsatna avanga kan inpe thei ta lo anih pawhin puih che u kan hreh phah lo ania. Hrechiang / mamawh tan Phone No 8008402064 (whatsapp/Telegram) lamah kan biak theih reng e

Incase If you need any help in matters of settling your PF, we are here to help. Contact me in 8008402064 whatsapp/telegram available.

Samuel Consultancy

Kan ngaihdana Pathian biak

Keimah lo chu Pathian dang reng reng i nei tur a ni lo. Milem siam chawp leh thil, a anpui reng reng—chung lam vana mi emaw, hnuailam leia mi emaw lei hnuai lama tuia mi emaw i tan i siam tur a ni lo a, chung chu chibai i buk tur a ni lo a, an rawng i bawl tur a ni hek lo. Exodus 20:3

             Kan Pathian hi Pathian nung, engkimtithei, mihring ngaihruatna atanga dinchhuah nilo, amah leh amah rawn inpuang a, Pathian anihzia rawn inhriattir ngat mai a ni a, Pathian dang heng kan han hriat theih chin pawh hi atam zawk chu mihring ngaihruatna atanga din a ni a, a thawnthu leh chanchin te pawh mihring rilru puakchhuak atanga dinchawp a ni a, anihloh vek leh he khawvel thil awmsa zinga mi ngaihpawimawh chawp tak mai mai te a ni bawk a, kan Pathian anga finfiah dawl hi chu a awmlo a ni. Thingbul lungbul mahni pawh insaseng theilo te, mihring ai pawha chungnunglo zawk ran mai mai te kan han dahsang tlat thin te hi chu ngaihtuah chian chuan atna pakhat a ni reng mai. Mihring hi kan lo ropui ber mai a, a bak hi chui Pathian a ni deuh tawp zawk a ni.

Chutiang taka Pathian ropui kan nei hi kan vannei khawp mai. Mahse, a chang hi chuan hetiang Pathian kan nei tih hi kan lo theih nghilh leh thin a, anih loh pawhin hnamdang ho pathian biak ang maiin kan rilru ngaihtuahna atanga chhuak ang mai mai tur hian kan lo ngai leh mai thin a, thil te tham te teah te pawh kan ring zo tawklo ta fo mai. Kan nundan atang te pawh hian kan Pathian hi kan khaikhin chang a awm ta nawk mai. Kan ngaihdan a harsa leh nithei lo tura kan ngaih avanga maia engemawti taka Pathian tan pawha harsa tura ngaih mai te pawh kan nei thin.

Kan hriatna te a tlem a, kan rinna pawh a chaklo a, chutiang tak chuan Pathian a kan han innghahna chin pawh hi kan thiam tawklo thin nameuh mai. Mahse, kawng tam takah hi chuan kan ngaihdana tha kan tih avang maia kan Pathian pawh chet tirloh chang, engmah titheilo ang maia siam chang kan nei thin. Kan Pathian hi hmangaihna a khat Pathian a ni a, keiniina engemaw kan han tihfuhloh deuh avanga kan tana dehkhirh ta mai tur anga ngaih ang chi te hi keimahni lam chakloh vang a ni a, kan Pathian nihna tak tak a ni lo. Chutiang ang zawng bawk chuan Pathian pawh hi kan be thin a, a chang hi chuan kan hlauh tlawn bawk a, a chang hi chuan kan felna avanga kan duh zawng han tih tir tum mai chang te pawh kan nei thin.

Party politics lamah te hian kan Pathian hi kan va hmatheh nasa em ve aw. Kan duhna chinah Pathian hming kan lam a, kan duhlohna chinah ramri kan kham sak a, a chang hi chuan kan Pathian biak hi vai pathian ai pawha laktlak lo zawka chhuah chang hi kan nei. Chutiang bawkin mimal nunah pawh a lo ni lehzel a, kan Pathian biak dan hi a chang hi chuan kan uite kaih mai mai ni hian a hriat. Amah Pathian hnuaia intulut tur kan nih laiin keimahni zawk hian Pahian hi kan thuhnuai hlauh a, kan chan min tih thatsak tur te, kan dinhmun min chawikan sak tur te mai hian kan duhtawk fo mai.

Amah Pathian ngeiin a sawi a, khawvel leh a chhunga awm zawng zawng lakah hian khaikhin rual a ni lo. Chumi awmzia chu keimahni ngei pawh hi Pathian dinhmun han luah a, Pathian biak aia biak theih kan ni lo. Pathian aia mahni duhdan te, mahni ngaihdan te kan dah chungnun hian pawn lamah chuan eng thil hnuaiah mah kan kunlo a ni thei a, mahse, mahni ngei hmaah hian kan lo kun reng thei tlat. Chu chu a chianna chu mahni rawng kan inbawlsak em tihah hian a ni. Zep thu chenglo, kawng tam takah hi chuan mahni rawng kan inbawlsak chiang a, hei hi Pathian thupek kalhna pawh a ni tih kan hriat thar leh a tha khawp mai.

Pathian thu nung leh thiltithei

Lalpa thu zawng zawng chu fiah a ni tawh. Amah ringtu zawng zawngte tan a ni chu phaw a ni. A thute chu belhchhah suh. Chutilo chuan a lailang ang che a, dawthei i lo ni dah ang e. (Thufingte 30:5)

             Pathian thu hi a nung a, thil a tithei a, khandaih hriam tawn eng ang ai pawhin a hriam zawk a ni.  Nunna leh thlarau, ruhtuah leh thling phel hrang khawp hialin a chhun thei a, thinlunga ngaihtuah leh tumte hi a hrenghal thei a ni. (Hebrai 4:12)

Khawvelah hian lehkhabu sang tam tak, chhiar sen rualloh a lo chhuak ta a, thu fing leh awmze nei, zir tlak tak tak te pawh a awm. Mahse, amah ngawt pawha nung leh thiltithei chu Bible thu chauh hi a ni. Hman atanga tun thlengin mihring mize hrang hrang, hausa leh rethei laka danglam lo, hmun changkang ber atanga hmun kilkhawr ber thleng, a thlenna hmun apianga a thiltihtheihzia hmuh tura awm zel chu Bible hi a ni. Mi sang tam nunna a lo chhanhim tawh a, misual ber nun a lo thlak danglam tawh a, a ringtu te a tithlawn ngailo. Kan lei damchhung atan mai a ni lo a, thihhnu thleng pawh a a thiltihtheina hmuh tura awm zui tur a la ni cheu.

 Chutiang taka thiltihtheihna nei a nih lai chuan mahni duh ang anga hman kawi theih erawh a ni lo. Zuam sual awl tak, hman dan diklo a hman anih chuan hlauhawm tak a ni ve thung. Chu chu hrethiamlo a mahni duh ang leh mahni hamthatna tur ang zawnga lo hman tum kan awm leh thin. Mahni ngaihdan anga kalpuitu hlawhtling an la awm ngailo a, hman atang tawhin chutianga remchanna zawngtu chuan boralna a seng thin a, an beiseiloh lamah mualphona a seng tir thin. Kan ngaihtuahna te a tawi thin avang te, kan damchhung hun a tawi thin avang te in kan hmu thui lo thin a, mahse, Pathian thu dikzia leh rintlakzia hi chu chhuan lo awm lehzel thleng hian a fiah ngam a ni.

Pathian thu hi amah mai chuan Nunna a ni a, a hmangtu lam hian boralna atan kan lo hmang ve thei tlat erawh kan fimkhurna tur a ni. Kan ram hruaitu te, pawl leh kohhran thleng pawhin mahni hmanthatna tur atan te, mahni hlawkna tur atante a Pathian thu kan hmang hi kan sim a hun takzet. Chu chu kan tan thang hlauhawm a ni a, Setana ngei pawh khan Lal Isua thlemnan Pathian thu a hmang tih kan hriat a pawimawh khawp mai. Engemaw hlekah Pathian thu leh a hnena inhlanna kan han ti thla zen a, a chhunzawmna erawh Pathian thu lam ni ta reng renglo, thiamchanna tur atan leka kan hmang thin hi chu a thiltihtheihna thalo lam kan dawng ang tih a hlauhawm.

Pathian thu hi khandaih hriam tawn ang anih avangin a tha lam leh a tha lo lamah a hlauhawm dan a inang reng tih kan hriat a tul khawp mai. Hman atang tawhin a hmusittu te hremlohin a chhuah ngai lo a, a nunpuitu te a hlamchhiah ngai hek lo. Chu chuan kan hman dan zirin rah kan seng tih a tichiang a, mimal leh pawl, ram leh hnam hian dampuinan nge kan hman dawn chhiatpuinan kan hmang ang tih hi keimahni a innghat a ni. Kan hman dan tlanglawn chu pawnlam landana thiamchannan a ni deuh mai a, hei hi chuan ram ropui min thlen dawnlo khawp mai. A taka nunpuitu kan nih a, thinlung leh tih tak zeta kan zawm hunah chawisanin kan awm ang.

Pathian thu hi kan mimal nun kawng hrang hrangah, kan zirnaah te, kan hnathawhnaah te, kan chhungkaw nunah te, kawng engkimah rintlak anih hi hria ang u. Incheimawinan mai a ni lo a, pawnlam landana felnan mai a ni lo. Kan duh ang zawnga her rem chi a ni lo a, kan duh loh avanga kan hmaih then chi a ni hek lo. Anihna ang taka kan pawm a, kan zawm a, kan nunpui tur a ni. Chuti anih loh chuan kan tan anchhia a ni thei tih hi kan hre reng dawn nia.

Fimkhurna vs Rinna

Lal Isua chu Ni sawmli leh zan sawmli chaw a nghei hnu chuan a ril a lo tam ta a, Thlemtu a lokal a, lung hi chhangah chantir la in eipuar rawh a ti a, a hun tawn mek atana chhanna chu a va awlsam tehlul em, mahse Lal Isuan mihring hi chhang chauhin an nunglo ang a, Pathian ka a thu tin chhuakin an nung zawk ang tiin a chhang.

Tunlaiah kan infuihna ber chu fimkhur la, Pathianin a pui ang che tih a ni. Pathian rin aiin fimkhurna kan dah hmasa tan mek. Kan rinna chu fimkhurna hmangin kan tuah nung mek. Fimkhurna tello chuan Rinna chu engmahloah kan chhuah ta. Pathian leh Setana.. tu tak lawm zawk ang maw! Ni e, fimkhurna chuan min veng dawn teh meuh mai a, Ni lo, min vengtu chu Lalpa a ni. Fimkhur la I nung ang a ti lo, Ring la I nung ang a ti, fimkhur la, I fimkhur ang zia zelin hri vei chu I pumpelh ang a ti lo a, I rin ang zia zelin, I rin zawh poh leh Pathian ropuizia I hmu ang ka ti lo che em ni min ti zawk.

Kan tehkhin thenkhat te hi Rinna huang nena tehkhin chi a ni reng em? Pathian ka ring a, chaw ei a ngai lo, ka puar mai ang tih hi eng ang rinna hrilhfiahna nge ni ta ngai le? Pathian ka ring a, ka thi lo ang tiin khamah zuang thla ila ka him meuh ang maw tih te hi eng ang Rinna hrilhfiahna nge ni ta ngai le? Rinna kan hriat thiam dan te hi a va mak ngai ta ve! Chaw ei tur awmna hmunah nilo, Chaw ei tur awmlohna hmunah pawh Pathianin rem a tih chuan ka thi bik nang ti a amah kan rinna hi rinna a ni a, thihna tur hmun ngei ngeia I zuanluh chuan mahni intihlum I ni ang a, mahse I duh reng vang nilo a nawrluh I nih a, barhluh I nih hunah Pathianin rem a tih chuan ka dam chhuak ang chu, anih loh leh kan thi mai ang chu tih zawk hi Rinna chu a ni asin. Chaw ei tur awm renga ei si lo a puar tum chu Atna a ni a, Rinna thehchhuah hun pawh a ni lo, chu Atna leh Rinna chu angkhata kan ngai ta tlat mai hi hriatthiam a har! kham atanga zuang thla chunga Pathian rinna avanga him tum chu Atna a ni, Rinna in tel vena a neilo.

Hri lengah hian va inbarh luh chu Atna a ni a, mahse tun tum chu at leh fin lam a ni lo. Amah hri leng zawk hian bang kilah min nan chin mek avang zawkin Rinna kan thehchhuah hun a ni. Heti zawng hian sawi awlsam ta ila, kut sil chu a invenna a ni I ti a, vawi engzat fakau nge I sil dawn le! I sil zawh chiaha I thil khawih hmasak ber kha a him chiah maw. Ka leh hnar tuam te a tangkai I ti a, ei leh in dawnah engtin nge I tih tak ang. I ei in mek kha a him chiah maw! I ei zawh chiahah I in chhin phui leh a, I ngaih I ti ngam ngawt a, I thil ei leh in, I hrawk vela tui ti taka lut thla reih reih kha le engtin nge ni dawn! Zing thawh atanga I chetvelna inpui, choka, bathroom leh chakkhai lamna zawng zawngah te fimkhurna hian a chhan zo chiah ang che maw! Ni lo, tun tum chu lu a na a, luna damdawi ei ang a ni ngawt lo. Daniela thiante Meipui zinga vawrhluh an nih khan kan Rinna hi kan dampui loh leh kan thihpui mai ang chu, kan tlanchhe lo phawt ang e an tihna kha kan mamawh chu a ni ta. Meipuiah taksa a kan lohnan blanket huh sin chuan chhan theih bak a nei dawn tho tho ang hian kan fimkhurna te hi chuan chin tawk a nei dawn tho tho a, chutiang a nih zawk laia Rinna aia kan la changchawi tlat mai hi Ringtu tih atan a rinlohthlak ka tih chu a ni! Puipunna leh Midangte nena awm ho loh te kan ti a, Pathian Biakna ngei ngei pawh kan khar tan chu a ni ta der mai. Joba hunlai ang khan Setana nen hian in chaltauh leh mek ni se, Pathian hian sawitur a van khawp ang le! Mi pakhat pawh inkhawm duh an la awm hram hram laia Biakin khar a ni a, a inkhawm theihloh titu nih ai thih huama a inkhawmpuitu nih kha Rinna hman hun chu a ni ka ti ve tlat

Hnial hrat thukhawchang ah Thih hi eng vanga heti taka zuamlo mai nge kan nih tak le… Heti taka kan ralkhel mai hmuh leh hriat hian Thih hi sual em ni ka ti rum rum ta mai. Natna/accident/vanduai vang te, chhan hrang hrang avangin an thi a, Hri avang a thi zingah pawh kan tel a ni mahna.. chu chu sual em ni? Kan tih tur pawh ti hleithei lo kan ralkhel hian nge kan tih tur neih chhun chhun thihna in min rawn nanchin hmaa kan lo tih hian Pathian tilawm zawk ang le, ngaihtuah chian deuh chu a ngai ka ti