Pathian thu nung leh thiltithei

Lalpa thu zawng zawng chu fiah a ni tawh. Amah ringtu zawng zawngte tan a ni chu phaw a ni. A thute chu belhchhah suh. Chutilo chuan a lailang ang che a, dawthei i lo ni dah ang e. (Thufingte 30:5)

             Pathian thu hi a nung a, thil a tithei a, khandaih hriam tawn eng ang ai pawhin a hriam zawk a ni.  Nunna leh thlarau, ruhtuah leh thling phel hrang khawp hialin a chhun thei a, thinlunga ngaihtuah leh tumte hi a hrenghal thei a ni. (Hebrai 4:12)

Khawvelah hian lehkhabu sang tam tak, chhiar sen rualloh a lo chhuak ta a, thu fing leh awmze nei, zir tlak tak tak te pawh a awm. Mahse, amah ngawt pawha nung leh thiltithei chu Bible thu chauh hi a ni. Hman atanga tun thlengin mihring mize hrang hrang, hausa leh rethei laka danglam lo, hmun changkang ber atanga hmun kilkhawr ber thleng, a thlenna hmun apianga a thiltihtheihzia hmuh tura awm zel chu Bible hi a ni. Mi sang tam nunna a lo chhanhim tawh a, misual ber nun a lo thlak danglam tawh a, a ringtu te a tithlawn ngailo. Kan lei damchhung atan mai a ni lo a, thihhnu thleng pawh a a thiltihtheina hmuh tura awm zui tur a la ni cheu.

 Chutiang taka thiltihtheihna nei a nih lai chuan mahni duh ang anga hman kawi theih erawh a ni lo. Zuam sual awl tak, hman dan diklo a hman anih chuan hlauhawm tak a ni ve thung. Chu chu hrethiamlo a mahni duh ang leh mahni hamthatna tur ang zawnga lo hman tum kan awm leh thin. Mahni ngaihdan anga kalpuitu hlawhtling an la awm ngailo a, hman atang tawhin chutianga remchanna zawngtu chuan boralna a seng thin a, an beiseiloh lamah mualphona a seng tir thin. Kan ngaihtuahna te a tawi thin avang te, kan damchhung hun a tawi thin avang te in kan hmu thui lo thin a, mahse, Pathian thu dikzia leh rintlakzia hi chu chhuan lo awm lehzel thleng hian a fiah ngam a ni.

Pathian thu hi amah mai chuan Nunna a ni a, a hmangtu lam hian boralna atan kan lo hmang ve thei tlat erawh kan fimkhurna tur a ni. Kan ram hruaitu te, pawl leh kohhran thleng pawhin mahni hmanthatna tur atan te, mahni hlawkna tur atante a Pathian thu kan hmang hi kan sim a hun takzet. Chu chu kan tan thang hlauhawm a ni a, Setana ngei pawh khan Lal Isua thlemnan Pathian thu a hmang tih kan hriat a pawimawh khawp mai. Engemaw hlekah Pathian thu leh a hnena inhlanna kan han ti thla zen a, a chhunzawmna erawh Pathian thu lam ni ta reng renglo, thiamchanna tur atan leka kan hmang thin hi chu a thiltihtheihna thalo lam kan dawng ang tih a hlauhawm.

Pathian thu hi khandaih hriam tawn ang anih avangin a tha lam leh a tha lo lamah a hlauhawm dan a inang reng tih kan hriat a tul khawp mai. Hman atang tawhin a hmusittu te hremlohin a chhuah ngai lo a, a nunpuitu te a hlamchhiah ngai hek lo. Chu chuan kan hman dan zirin rah kan seng tih a tichiang a, mimal leh pawl, ram leh hnam hian dampuinan nge kan hman dawn chhiatpuinan kan hmang ang tih hi keimahni a innghat a ni. Kan hman dan tlanglawn chu pawnlam landana thiamchannan a ni deuh mai a, hei hi chuan ram ropui min thlen dawnlo khawp mai. A taka nunpuitu kan nih a, thinlung leh tih tak zeta kan zawm hunah chawisanin kan awm ang.

Pathian thu hi kan mimal nun kawng hrang hrangah, kan zirnaah te, kan hnathawhnaah te, kan chhungkaw nunah te, kawng engkimah rintlak anih hi hria ang u. Incheimawinan mai a ni lo a, pawnlam landana felnan mai a ni lo. Kan duh ang zawnga her rem chi a ni lo a, kan duh loh avanga kan hmaih then chi a ni hek lo. Anihna ang taka kan pawm a, kan zawm a, kan nunpui tur a ni. Chuti anih loh chuan kan tan anchhia a ni thei tih hi kan hre reng dawn nia.