"Tin, a mal chungah a muthilhtir a, tin, mi a ko a, a sam phiar sarih chu a hlepthla ta vek a, tin, a chakna chu a bo ta vek mai a…..tin a mu chu a han harh a….. Lalpan a kalsan tawh tih reng reng a hre lo a” (Roreltute16:19)
“Lalpa chuan Lalpa thu zawm chu a lawm angin halral thilhlante leh inthawinate hi a lawm em ni?...Lalpa thu i duh loh avangin ani pawhin Lal atan a duh bik ta lo che a ni” (I Samuel 15:22)
Kan tunlai khawvela ngaihsak hlawh lem lo tak, kan nitin nuna a serh zinga a mei ang maia inrawlh kim bawk si chu ‘Terms and Conditions Apply’ tih hi a ni awm e, Kan nitin khawsakna thil chi hrang hrangah hian kan hriat lem lohin he dan leh dun hi kan nun tel pui tlat a, a chhiara chhiar sen loh hi kan ‘Accept’ ve reng a ni. Mahse, kan nunah awmzia a nei em em chuang lo a, palh thilthu engemaw thleng thei laka invenna ang chauh a ni ber.
Pathian kan zuina leh Amah nena kan lendunnaah hian kan hriat lem loh leh kan palzut tak mai thin tih tur leh tih loh tur, dan leh dun hrang hrang hian min phuar ve a, mahse, khawvel dan anglo takin Pathian danah chuan heng kan palzut thin hian kan nunah kan rin phak bakin nghawng a nei thuk fo mai. Sual ni a kan zuk hriat lem loh thil tenau deuh kan ngaihzam thin hian kan nunah sual a ti ngampa a, kan hriat loh karin kan nun min lo eichhe thin.
Samsona chakna thuruk hi khawiah nge a awm? Han chhiar liam mai chuan a sam seiah khan ni awm tak a ni a, mahse, a chakna thuruk tak tak zawk chu amaha awm Pathian Thlarau zawk kha a ni. A sam a tan rual hian Pathian thlarau chuan a kalsan tak avangin a chakna leh thiltihtheihna chu lakboin a lo awm ta. Lal Saula, Israel te lal anihna chu a san leh midangte aia a hleitling vang a ni ngawt lo a, Lalpa thlarau hriakthih a nihnaah zawk a ni. Mahse, ama ngaihdana tha ni a a hriatin Pathian thu a lo zawm a, a rin phak bakin nghawng a lo nei a, hriak thih anihna chu hnawlin a awm ta a ni.
Anni chauh hi an ni lo, Bible chhung leh pawnah hian entirna chhawpchhuah tur tam tak an awm, kan hriat phak ngeiah te pawh sawi tur kan nei hlawm ang. A mimal ang zawng chauh a ni lo, a hnam ang zawng pawhin Lalpa hnam thlan Israel chanchin te hi kan ngaihtuah ngai em? Kan Zoram zimte pawh hi Pathian zawnchhuahram kan inti a, a hnam thlan kan inti a, mahse, kan hriat loh chhung hian kan sual khawingampat te hian min ei zo dawn. Keimahni chakna leh thiltihtheihna mai hi chuan khawi mah hi min thlen dawn lo. Kan chhunga awm leh min chenchilhtu Pathian Thlarau hian min chhuahsan chuan ding thei kan awm dawn em ni?
Lalpa thu kan zawm leh zawm loh hi midangte awm dan atanga kan inteh a, tha zawk leh ‘ti ve tho’ ni a kan inhriatna ngawt hi a ni lo a, kan ngaihpawimawh loh thil te tham te te, sual ni pawha kan zuk hriat loh te hian kan hriat phak bakin Pathian min lo hlat tir thin. Kan hriat loh lai hian keimahni a cheng Pathian Thlarau hi kan lo tivui viau thei a, a chhuahsan tawh kan lo ni daih thei bawk. Chuvang chuan kan nitin nun hi uluk lehzuala Lalpa Thlarau hruaina nena hmang turin kan inchah nawn leh a ni e.