Kumthar atan

 ‘Tin, ngai teh, awin a hnênah, “Hetah hian engnge i tih, Elija?” a rawn ti a. Tin, ani chuan, LALPA, sipaihote Pathian tan hian thahnem ka ngai êm êm thîn a, Israela thlahte lah i thuthlung an hawisan a, i maichâmte an tichim a, i zâwlneite khandaihin an sathlum si a; a la awm chu keimah chauh hi ka ni a, ka nunna mi laksak an tum a ni,” a ti a’ I Lalte 19:14 

Chung Pathian zahngaihna hnuaiah kumthar kan lo chuangkai ta a, kan damchhung huna rahbi thar pawimawh tak pawh a ni. Kum lo tharah rilru thar leh ngaihtuahna thar hmanga nun bul tan that leh tum te pawh kan awm thin. Kum thar a ni emaw, ni thar a ni emaw, eng hun pawh nise, bul tan that nan hi chuan tlai lua a awm lo ang. A kum ang zawng mai ni lo in, a nitin ang zawng te pawh hian mahni infuih thar fo ila a va duhthusam lehzual dawn em! 

Kan hringnun zinkawng hi kawng awlsam leh ‘parmawi tin vulna’ a lo ni ngawt lo a, Eden huan atang tawh khan tlukna hri thalo tak chu kan la chhawm nung zel a, kan bul tan that zat zet hi kan tawlhthluk zat a ni in, kan hriat reng leh hriat lemlohah te hian kan dai sual pheng phung fo mai. Chutiang tak chu mihring te hi kan lo ni a ni ang, Kan Bible pawh hian ding ngheta kan inngaih lai hlei hlei te hian fimkhur turin min la chah ta deuh deuh chu mawle! 

Lalpa zawlnei Elija, Pathian nung a nihzia mit ngeia hmu a, a thiltihtheihna tawmpui tu hi pa namai lo tak chu a ni ve e. Lal hmachhawn ngam a ni mai lo a, a sakhaw rawngbawltu zatela cho chhuak ngam, a Pathian leh an rin pathian inchaltauh tir ngam ngat, kan tunlai hun angah chuan nise, Hindu kulmuk puithiam ho cho chhuak a, kan Pathian nung nena inchaltauh tir ngam ngat tur ang hi a ni a, kan tunlai khawvel dinhmun angah hi chuan a tina tin ngam chi pawh va ni suh! 

Mahse, chumi hnu lawkah Pathian thiltihtheihna au thla tu kha khawiah nge a awm? Chutiang taka sulhnu ropui tak hnutchhiah tu nimahse, a sulhnu ai chuan a tun dinhmun kha Pathianin a en chu a ni si a, Eden huan atanga Pathian kohna ‘Khawnge i awm?’ tih kha a ni tan pawh hian a lo ni ve tho mai. A thiltih that leh a dinhmun hlauhawmzia te chu an sawi ve bawk taka, Pathian tan chuan enge lem chuang ang. ‘Tun’ dinhmunah lungpui kara biru chung chuan Pathian tana thahnemngai a inti thei lo. Hei hi keini tan pawh chona a ni. 

Mahni leh mahni kan in tehna thin leh eng dinhmun emaw a kan indin tir ve na thin chu kan tunhma huna kan lo thawh that tawh thil eng eng emaw avang a ni a, mahni ngaiha thiltha engemaw kan lo tih te hmangin kan inthlamuan thin. A sualna hranpa a awm lo. Chutiang chu khawvel thlir dan pawh a ni a, engti kawng zawng emaw taka khawvela sulhnu hnutchhiah te hi mi ropui kan ti thin. Mahse, Pathian hmaa kan ropuina tur erawh chu ‘tun’ atanga teh a ni thung ang. Rawngbawlna kawngah te kan lo thawhhlawk tawh thin a ni thei. Mite tan pawh malsawmna thlentu kan lo ni fo tawh thei e. Anih loh leh kan hma hunah tum ropui tak tak kan nei pawh a ni thei. Mahse, chung zawng zawng ai chuan ‘Tunah’ enge i tih? Khawiah nge i awm? tih hi a pawimawh. I tana bukna awmchhun leh i thiamchanna tur chu tuna i awmna leh i thiltih a ni ang. 

Pathian ngeiin Ezekiela kaah ‘Misual chu a sualna hawisan a, felna kawng a lo hawi chuan a sualna chu hriatreng a ni lo ang a, mi fel chuan a felna hawisana sualna kawng a zawh chuan a felna chu hriatreng a ni lo ang’ a tih hi he kum lo tharah hian kan ngaihtuahna kaihruaitu nise, ‘tunah khawiah nge ka awm?’ tih leh ‘enge ka tih?’ tih hi mahni inzawt fo ila, kan nitin hun hmang tha in kan kawngte i chhut ngun lehzual ang u.