Lalpa ropuina atana thlan mihring te

Tin, sabengtungno chu Isua hnênah an rawn kai a, a chungah chuan an puante an phah a; tichuan, a chungah a chuang ta a. Tin, mi tam takin kalkawngah chuan an puan an phah a; mi dangin lova mi chhâwl sâtin an phah bawk a…… “Hosanna! Lalpa hminga lo kal chu fakin awm rawh se… (Marka 11:7)

Lal Isuan chawimawia a awmna tur atan Sabengtung a thlang ang hian; Thu maia he khawvel leh a chhunga awm zawng zawng siamtu hian a tih duh leh thawh duh chu thu bawkin a ti thei dawn lo vem ni? Anih loh leh A van Angel te pawh a tir chhuak thei mai dawn lo vem ni? A thei ngei tur a ni. Mahse, chuti zawnga chawimawina dawn chu a remruat a ni lo a, ‘Keimahni ang takin Mihring siam ila’ a tih; Amah anga din, lei vaivuta siam, hun reilote atana lo awm a, mitkhap karloa bo leh mai tur mah ni ila; chawimawia a awm theihna tur atana a thlan chhuah A thiltihtheihna aia a thlan, A van Angel te aia a thlan kan lo ni ve reng mai.

Lal Isuan chawimawia a awmna tur atan; Ngawiteh, Lal Isua kalnan khan puan te pawh an phah ve bawk alawm, mi te hmuhsit leh endawng, rah hrual, dinhmun hnuaihnung, a mawngphah tih tawk lek kan lo ni anih pawhin, Sabengtung rah hrual mai tur puan te pawh khan Lal Isua chawimawia a awmna tur atanah khan an thawhhlawk ve tho mai. A chuanna kan ni pha lo anih pawhin a puan phah tal chu kan ni pha ang a, midang dinhmun nena khaikhin chuan kan dinhmun chu a hnuaihnung ber tih tur a ni maithei e, Mahse, Lal Isua chawimawia a awmna tur hian thlan tel, phah tel kan ni tho tho.

Sabengtung chu a neitu hnenah an la pekir ang a, puan pawh a neituin a la thingfai leh chuan a rinawm, Chhawl, hnah kuang pakhat, a kungpui atanga sah thlak, hman zui lehna tur awmlo, kalsan leh kawngsira paih mai tur, ro zui mai tur dinhmun aia dinhmun hlu lo hi chu kan awm em em lo ang a, chupawh chuan Lal Isua ropui taka chawimawia a awmna tur atana tangkaina anei anih ngai chuan chhuanlam tur hi kan nei bik dawn em ni?

Kan thiltih len leh ropui lam a ni lo, a hminga kan tih anihna zawkah hian; Tantu, Usher, Thawhlawm Khawntu, Biakin Dar vawtu, Thuhriltu, inkhawm hmanlo chung pawha Lalpa tana che chhuak thin, tawngtai leh thilpek thlengin a ni ang, tumah a lian leh te awmlo hian kan chet chhuahna zawng zawngah hian Lalpa hian a ropuina kaltlangnan min lo thlang a, Sabengtung dinhmun chu ropui lua lo mahse, keimahni a chuang Lalpa hi a ropui miau a, kawng laia puan phah chu bal mahse, kan chunga kal Lalpa hi a ropui miau a, kawngsira chhawl sah thlak chu tangkaina dang neilo viau mahse, a chawimawi Lalpa hi a ropui miau a, Lalpa hminga lokal chawimawinan nang leh kei pawh hi kan tawk em em dawn lo em ni?

Chu aia dinhmun duhawmloh zawk pawh lo awm se, Van Angel te chuan chu chu min luah tir rawh an ti lawm lawm ang, mahse, an tan ruat a ni lo, Khawvelah ‘Kan pa Davida ram hi chawimawi’ a a awm theihna tur chuan nang leh kei chauh ruat kan ni, hawh u, lawm takin, tlanchhe lo in Lalpa chawimawia a awmna tur hian i tel ve zel ang hmiang.