Chatuan hawlh thutlukna

Tin, Lalpa Pathianin leia vaivutin mihring a siam a, a hnarah chuan nunna thaw a thaw lut a, tichuan mihring chu minung a lo ni ta a (Genesis 2:7)

Vaivut chu a awm angin leiah a chang leh a, Thlarau chu a petu hnenah a kir leh a ni. (Thuhriltu 12:7)

 

Pathianin a duh taka a din, ama nunna thaw hmanga a tih nun he taksa hi nunpui ngamlo kan awm ta fo mai a, khawvel mai a ni lo a, kan Zoram zimte chhungah ngei pawh hian mahni intihlum hi kan awm ta fo mai. Chhan hrang hrang a awm ang a, mahni leh mahni insitna vang emaw nihtur ni phalo ni a inhriatna vang emaw a ni thei a, hlawhchham leh vanduaina tawh vang te pawh a ni thei ang. Thenkhat erawh chu midangte vang, an hmangaihna chhanlet anih loh vang emaw, midangten an diriamna leh hmusitna tuar zolo emaw avang te pawh a ni ang.

Nunna hlutzia hre tan chuan a chhan chu engpawh nise a hunlo a nunna hlu tak hloh a ni chu a uihawm tak meuh meuh. Kawng lehlamah chuan hetiang taka mahni leh mahni inhlut zo tawh lo, beidawnnain a tuam, hma huna beiseina nei ngam tawh lo, nun aia thih thlang ta hial mai te hi an khawngaihthlak awm a, Hetiang lamah hian kan infinchhuah leh kan inpuih tawn pawh a tul deuh deuh dawn nipawhin a lang.

Nunna hi kan duh a kan tihtawp theih anih rualin kan duha kan siam theih a ni lo a, kan tihtawp theih anih avang hian kan kuta awm a ni lo. Nunna hi thil awmsa, keimahni din leh siam ni hauhlo a ni a, a nun chhoh zelna tur atanah pawh thuneihna kan neilo. Kan tihtawp hian thil siamsa tichhia kan ni chauh zawk a, kan duh a kan din thar leh theih ngawt pawh a ni lo. Kan siam theih nilo, kan tihchhiat theih ringawt anihna hian kan ta anih loh zia pawh chu a tichiang awm e.

Nunna hi engtianga lo insiam anih leh engtianga tawp leh ta anih hi kan hre pha lo a, mihring thiamna leh finna hian a chhut pha lo. Kan taksa atanga kan tihtawp avang ngawt hian a tawp hlen ta tih finfiah a ni lo a, chutih a hnekin nunna chuan taksa chhuahsanin tawp si lo hian a vakvai zui ta pawh a ni daih thei. A titawptu chuan a thih hian a buaina te chu reh ta vekah a ngai a ni maithei a, mahse chutiang anih leh nihloh hi finfiah a ni lo a, a aia hreawm leh inchhirna hi a hmachhawn daih pawh a ni thei tihte thlengin ngaihtuah ngai a ni zawk. He nunna hian taksa a chhuahsan rual hian khawilam nge a pan a, engtiangin nge a awm zui zel tih hi ngaihtuah a pawimawh khawp mai.

Kan Pathian thu chuan mihring hi chihnih inbelhbawm atanga siam kan nih thu chiang takin min zirtir a, pakhat chu lei vaivuta siam taksa hi a ni a, pakhat leh chu chumi tinungtu Nunna hi a ni. A bul tan dan leh a tawp pawh min hrilh chiang a, taksa chu vaivuta din anih angin vaivutah a kir leh a, nunna erawh chu a petu hnenah a kir leh a ni. Taksa chu hun engemawti chhung atan a ni a, Nunna erawh chu chatuan atan a ni. Taksa chungah chuan thunei emaw kan inti maithei a, mahse nunna chungah hi chuan eng thuneihna mah kan nei lo. Mahni intihlumte hian kan hriat sual chu kan thih hian kan taksa chauh kan tihlum a, kan nunna chu kan tihlum tel theilo tih hi a ni. Taksa thihna hian Nunna thihna a ken tel kherloh avangin risk laknan chuan a fuhlo khawp mai.

Vawikhat thihna hian chatuan a daih a, risk lak fuhloh leh inchhir avanga thihna ata nunna a lo let leh theih a ni lo. I buaina chinfel nana i ngaih kha chatuan buaina thlentu che anih hlauh chuan i inchhirna chuan tawpni a nei ngai dawn tawh lo a, chinfel ngaihna a awm tawh dawnlo. Chu Chatuan hmun atanga i lei taksa buaina i rawn thlirlet hun tur ngaihtuah la,  tuna i buaina hi thihpui tham a ni meuh ang em? Thutlukna siam tawh azawnga thuthlukna pawimawh ber Chatuan hawhlh thutlukna i siamah hian i inchhir lo chiah ang maw?