Mahni inhriatna

 Tin, Lalpa thu chu ka hnenah a lo thleng leh a, ‘Israel ram chungchangah he thufing tawi an hman hi eng tihna nge, ‘pate chuan grep thur an ei a, an fate ha a tim e’ tih hi. A nuna ka nun chhung chu, Israel-ah he thufing tawi hi hman leh tih in nei tawh lo vang, tih hi Lalpa Pathian thu chhuak a ni. Ngai rawh u, Nunna zawng zawng ka ta vek a ni, pa nunna ka ta a ni ang bawkin fapa nunna pawh ka ta a ni. Thil tisual tu apiang an thi ang. (Ezekiel 18:1)

 

Mahni inthiam tumna hi mihring mize pakhat a ni a, kan tihsual hi hmuh har kan ti em em a, midang tihsual erawh chu kan hmufiah em em thung. Kan inchhung khur, kan mimal nun leh khawtlanga kan thil tawh hrang hrangah mawhpuh tur kan dap a, ram hruaitu te, khawtlang hruaitu te, an fellohna kan dap chhuak chiam thin. Mahni fel tum lam aiin midang hi fel se kan ti a, keini chu kan awmdanah kan lungawi a, midang awmdanah kan lungawilo thin. Thu tha tak tak te kan sawi a, kan ngaithla a, midangtan kan hmehbel zel a, mahniin tih leh zawm kan tum lem hleilo. Lemchanna khawvel tih takah mahni theuh fel inti midang sual ti bawk si hi kan inpel suau suau mai chu a nih hi.

Chutiang ang kan nih mek lai chuan Lalpa chuan mitin kan thiltih ang zelin min buk dawn a, kan bula mite felna emaw sualna emaw avangin kan dinhmun a danglam dawn lo. Kan sual leh thatah kan nu leh pa ten mawhphurna chu an nei ve bawk a ni thei a, kan khawtlang leh ram hruaitu ten min kaihhruai danin engemaw chen chu a hril a ni thei a, mahse rorelnaah kan ai an awh dawnlo tlat mai. Hei vang hian kan mimal nun theuh hi kan uluk a, kan inven fimkhur a ngai tak meuh meuh. Mahni pawh in enlet theilo kan nih chhung chuan midang hi chu enlo law law ang u.

Kan nun danah hian mahni inbum hi thil awmthei a ni. Mahni inthiam tlat kan nih fo chhan chu kan bula mite kan en vang a ni chawk. Mahse, chu kan inthiam avang ngawt chuan midangin thiam minlo chantir ve kher lo. Kan khawilo chhuahvah dawnah darthlalangah kan inen thin a, kan lung a awi a, hmeltha kan inti a, kan hmelthat leh thatloh erawh chu midangah a hriat thung. Kan felna tur hian midang tlinlohna kan en a, felah kan inchhiar zung zung a, kan sualnaah midang aia kan sual bikna hre duhlo khawpin kan inteh tling zung zung bawk a, kan nihna dik tak erawh chu midangah hian a lo chiang. I bula mite mit tlung zolo leh sawisep i nih chuan mahni indah sang mahla, in enletna tur leh insiam thatna tur i nei tih inhriat a tha ang.

Anih chuan mi min hmuh dan leh tehdanin kan nung dawn tihna em ni? Ni lo e, midang min hmuh dan leh tehdan hi kan nun kawng hruaitu a ni lo a, kan nun thlirletnan erawh chuan hmang thin ang u. Kan bula mite hi kan nun darthlalang an ni thei a, insiam that kan ngaihna lai te inhmuh fiahnan min puitu an ni. ‘Ka nun ania, ka thu alawm’ tih ngaihdan hi sual khurpuia min hnukluttu lian ber a ni. Famkimna hi kan lei damchhung chuan kan thleng dawnlo a, mahse famkim tur erawh chuan kan beih a ngai. Mahni awm ang anga lungawi mai tur kan ni lo a, kan rin Lalpa duhdan leh lungawina tur ngaihtuah chunga kan damchhung ni kan hman tawk tawk a ngai.

Zirlai kan ni emaw hnathawk kan ni emaw kan thiltih rah zel hi kan la seng tur a ni a, mi tupawh a sualnaa awm reng chu chu sualnaah chuan an thi ang. A sualna kalsana felna umtu chuan nunna a chang ang. Kan lei damchhung taksaah chuan thuneihna engemaw chen kan nei ve a ni thei. Kan taksa tinungtu NUNNA erawh kan ta a ni lo a, nunna zawng zawng neitu chu Lalpa a ni a, a hnenah chatuan hun atana kan kir leh hma hian rorelna hmaa ding tlak turin i inpeih ang u.