Uire lai an man hmeichhe pakhat

     Isua erawh chu Oliv tlangah a kal ta zawk a, Tin, zingah Pathian biak inah a lut leh a, mi zawng zawng a hnenah an lo kal a; tin, ani chu a thu a, anmahni a zirtir a. Tin, lehkhaziaktute leh Pharisaiten hmeichhe pakhat a uire lai an man an rawn hruai a, tin, a laiah an dintir a, Isua hnenah, ‘Zirtirtu, he hmeichhia hi a uire lai an man a ni, a uire lai takin. Dan lehkhabuah, Mosian hetiang mi hi lunga den hlum thu min pe a., nangin engtin nge I ngaih?’ an ti a, chu thu chu amah fiah nan an ti a, a hekna tur an hmuh theih nan, chutichuan Isua a kun a, a kut zungin leiah a ziak a, tin, an zawh sek sek avangin ani chu a tho va, an hnenah ‘In zinga sual nei lo apiangin amah chu lungin deng hmasa rawh se’ a ti a, tin a kun leh a, a kutzungin leiah a ziak leh a. Tin, anni chuan a thusawi chu an hriatin, upa berin a tan a, a tawp thlengin, pakhat khatin an relh chhuak ta zel a, chutichuan Isua chauh a awm ta a, hmeichhia a laia a awmna ngaia awm nen khan. Tin, Isua a tho va, a hnenah “Hmeichhia, khawiah nge an awm tak? Tuman thiam loh an chantir na che nge?” a ti a. Tin, ani chuan, “Lalpa, tuman mi chantir lo ve,” a ti a. Tin, Isuan, “Kei pawhin thiam loh ka chantir lo va che; kal la, tun hnuah tisual leh tawh suh,” a ti a (Johana 8:1)

Kan sawi thin a, ka’n sawi leh teh ang. Nang leh kei hi hetia en mai chuan kan that hmel, kan fel hmel, chhandam kan nih hmel, mahse, chu nih hmel ringawta chu Lalpa min tehna tur a ni lo. Min tehna tur chu kan felna tak takah zawk pawh ala ni lo, kan fel leh sualah a ni lo hrim hrim. Lal Isua, kan thiamchannna, Lal Isua, thiam min chantirtu, kan thiamlohna min thaibosaktuah zawk a ni teh kan nihna tur chu. Tunhma chuan misual buru I ni thin a, zu leh ruihtheih thil zawng zawng I rui kim vek thin a, motor ruih chiah hi I ruih theihloh awmchhun a ni a, in inchhung tan mai nilo khawtlang tan pawh ‘Hlep tur awmloa’ i ni a, hralh theih zawng zawng i hralh zo zel thin a, I hralh tawh hnu pawh nangmah bawkin i hralh leh thei hial a, chutianga sual buru khawlaia i awmlai chu Pathian hmangaihna chuan a rawn zawng chhuak ta che a, sunhlu kungah thei dang an lo ngai lo. Sunhlu chi i nih avangin sunhlu in i lo rah thin a, theihai chi i nih avangin theihaiin i rah thin a, sual chi, I pa pawh diabola a nih miau avangin sualin i rah thin a, sual rah, eiruk, hlemhlet, zu leh ruihtheih thil tih, duham, mi rel, tumah ngeihlo khan i lo rah thin a, mahse, Pathian hmangaihna chuan a rawn zawnchhuah takah che chuan i chi, I nihna kha Lal Isua chi, chithar in thlak i lo ni ta a, sual chi kha fel chi hmanga thlak i nih tak avangin felna rah a rah tura beisei i ni ta a, leiah i tla ang a,  I thi ang a, I tawihral ang a, ‘buh chi chu leia a tlaka, a ral vek loh chuan angaiin a awm reng thin, a thih erawh chuan tam takin a rah thin’ tih ziak ang khan, leia i tlak a, nangmah i ral zelna, I thih zelnaah Lal Isua chi chu a lo to ang a, kung te a lo chhuah ang a, buh kung atanga apar, apar atanga arah a lo chhuak ang hian Lal Isua felna kung a lo thanglian zel ang a, felna par, felna rah an lo lang chho zel ang.

Khawlaia suala i leh reng lai khan Pathian felna chu i innghahna, i chhuan tur awm chhun, i rin tur awm chhun a ni. I han fel chho a, kohhran i bel a, an lo duhsak che a, tantu te, Nilai thupui sawitu te i lo ni chho a, Sunday school kaikim lawmman te pawh i la ta hial a, zu leh ruihtheih thil te chu i lungtilengtu pawh an ni pha ta lo a, mahse i rintur leh i inghahna tur chu Lal Isua felna kha a la ni reng a, khawlaia bawlhlawh bawm nen in mut dun reng laia Lal Isua felna i mamawh ang chen chiah khan Sunday school kaikim lawmman la thei i nih hnuah pawh i la mamawh. I fel tawh em avangin Lal Isua felna kha i mamawh vak tawhlo ngawtlo. Nangma felna han chhuang vaih teh, i tla nghal vang vang a nimai, eng atangin maw i tlak ang? Pathian tehna atangin mawle. Chutichuan i felna chu a lo thang zel a, Bible te i zir thar leh a, Pastor hial i lo ni ta, KTP Leader i lo ni ta, Upa te i lo ni ta. A enga pawh lo ni chho rawh, Kohhran Pa tih hial tur pawh lo ni rawh, heta khawlaia i leh reng laia Lal Isua felna i mamawhna ang chen chiah tho khan i la mamawh reng.

Chutichuan misual ber atanga mi fel ber ni a kan hriat te pawh hian Lal Isua felna hi kan mamawh dan a inchen chiah a, he hmeichhe uire leh nang Pathian Biakina inkhawm thin leh, kei helaia thusawi mek hian Lal Isua kan felna zawk kan mamawh dan hi a inchen chiah a, tumah han inkawk tur bik kan awm lo, tumah sual hmel bik deuha inmelh tur pawh kan awmlo. Kan pastor tak hi chu ahmel te pawh a tha deuh a tih bik tur pawh a awm chuang lo. Chulaia hmeichhe uire, a lai taka an dintir leh a rawn hruaitu zawng zawng chuan Lal Isua, an felna leh thiamchanna an mamawhna kha a inchen reng, tumah lunga han indeng tur an awm lo. A chiang tiraw

Kan zir tan tang. Lehkhabu chu a thuhmahruai a awm hian a chhungthu a fiah awlsam, chuvang chuan a thuhmahruai kan han sawi hmasa a ni.

Lal Isuan Pathian thu a zirtir a, a sermon mek a, ngaithlatu pawh an tam a niang, mi zawng zawng a ti, chutia mi zawng zawng awmlai tak mai chuan sual bik em em mai hmeichhe uire an rawn hruai a, a mipa uire lam chu sawiloh, a lang lo hrim hrim. A uire lai tak an man a ni. Chat chat mai a, a chiang teh e maw.

Mizo customary law, Mizoram gazette a chhuah ah chuan Uire chu tihian a inhrilhfiah.

‘UIRE chu Pasal nei laiin mipa dang ngai sela, Uire a ni. Uirena hi hmeichhe sualna chungchuang tak a nih avangin a man pek tawh zawng zawng lak kir leh vek tur a ni a, a bungrua leh a thuam zawng zawng a chan vek bawk ang. Pipute atangin ‘vun inhlihsak’ em chu an ti ngai lo va, hak lai an chhuahpui thei’ tiin.

Uire chu enge ni? Pasal nei laiin mi dang ngai sela tih a ni, a neih mek kha nei chungin a dang va duh sela, a rinawm mekna lakah rinawm belh se la, a neih mek kha thlauhthla thak in mi dang va nei law law se tih a ni lo, a neih mek lai nen a dang nen tihna a ni, mi dang va nei law law sela tih a ni lo, midang ava neih law law chuan a dan a dang leh daih, va ngai tih chuan va nei chiah lo, mahse va inzawmpui si ti mai ang aw, a ril em a, sawi ril chi pawh a ni lo. Nula a uire theih em? Theihloh, a chetsual theih, mahse hmeichhe ho hi in vanduai khawp a, a chhia zawng zawng, hmeichhia, hming atang renga ‘chhia’ hi in chhawm a, nula in mi pa a lo chetsualpui pawhin ‘mi pa a uire a’ te an la ti hram a, uire chu pasal nei lai hmeichhia, a pasal laka rinawm lo a, midang va pawm, va chetsualpui kha uire diktak chu a ni.

I uire ve ngai em? Eeee.. tehreng e le, Eden huan atang khan la uire tluang zel… kan uire na hi e ril rem rem tak a ni. Pathianin ama anpuiin mihring a siam a, ama anpui ngeiin a ni a siam ni, mahse ama anpui kan nihna duhkhawp loin Pathian anpui nih duhin kan uire a, Evi atang reng a hmeichhe ho awmherh dan hi chu aw.. pui tak a ni pui tak, an nihna duhkhawploin an nihna kha nih an tum, an mithmul te hi an duhlo a, an ziat kawng vek a, an pawt kawng vek a, mithmul tho an ziak dum leh a, zing thawh atanga an in hnawih hlarh hlarh thin hi, enge an an tum i tih chuan anmahni kha an an tum lek a lo nia, an nihna kha nih an tum anih chu, mipa hi chu kan vannei a, kan nihna ah hian kan lungawi a, kan nihnaah kan ni mai a, zing kan tho a, kan han tuai pawk a, kan lung hi awi hliah hliah zel mai ni.

Tak taka, mihring zinga kan tel chuan ‘Ama anpuiin mihring a siam a’ a tih avangin mipa pawh kan tel ve tho tak tak a, chu mihring chuan a nihna Pathian anpuia siam anihna chu duhkhawp loin Pathian anpui nih a tum a, min bum pawh a ni lo, bum leh chuan tur awmlo a mawl chhah bial pawp kan ni e, mahni nihnaa lungawiloin, min siamtu min siamdanah lungawi zo lo in, duhkhawp lo in, min siamtu kan uire san ta a, Uire chu engtin nge a hrilhfiah kha, pasal nei laiin mi dang va ngai se tih kha a ni, pasal nei lai, pawmlai nei, Pathian nena lengdun thin, Amah nena inzawm tlat tura A anpuia siam chuan mahni nihna duhkhawp loin midang kan va duh ta a, midang nih kan duh ta a, Pathianah lakah chuah kan lo rinawm zo ta lo a, Pathian chauh kan duh khawp ta lo a, a thu zawmloin midang thu kan lo zawm ta zawk a, tisa taka midang va mutpui tihlam chauh a ni lo, kan rinawmna kan hralh, a thuawihna bawih ata talchhuah a mahni duhdan lama inhralhna, ei suh ei talhna kha midang a va zawmna chu a ni daih, chuan pasal in atangin hnawhchhuah kan lo ni ta a ni.

Lal Isua a piangthar, chi thara thlak kan lo nih tawh hnu phei hi chuan kan uirena hi a chiang. Mahni pawmlai Lal Isua, rinawmna thutiam i lakna, a nuamah pawh a hreawmah pawh Lalpa ka thlah lo ang che, ka phatsan lo ang che, kawng tluanin Isua ka zui zel ang, a peng zawng zawngah te pawh tih tel zeuh ang kan ni. Lalpa tan hian rinawm chu kan tiam a, kan rinawm lutuka a peng zawng zawng ah te pawh Lal Isua tana rinawm kan inti vek tawh mai, hahthlak ngaih ngaih tiru hringnun hi

Zu leh ruih theih lam ngawr ngawr, sum leh pai duhamna, eirukna ngawr ngawr hi sual huanga khung tur a ni lo. Mi ngaihmelh chu a uire a ni a tih ang chiah hi kan ni a, kan hmeichhia te an inti chhelo tulh tulh a, kan mithmuh theihna hi a ril tulh tulh mai nih hi, awt suh a tih reng lai hian kan thinlung hian awh tur a lo dap leh thin a, a unau hawtu chu tualthat a tih ang mai hian a hmel saw ka huat zawng tak a ni kan ti leh thin a, I kate chuan thu lawilo a sawi chu rorelna niah sawifiah angai ang a tih ang mai hian kan ka te hian thu lawilo lo chu sawitur a hrelo thin a, awmna tur a awm hi a tha, awmna tura awmlo erawh mi bo kan ni, kan va bo zing thin tak em, tih tur tih a tha, tihtur tihloh erawh sual a ni, tihloh tur chu tihloh mai tur, kan tih luih talh hi a va tam em! tihlohtur a tih reng laia kan lo tih chu Eden huana ‘ei suh’ tih ei talh nan thuhmun a ni.

Kawng hrang hrang hian nitin mai hian uire huanga khung tlak kan ni. ‘Tupawhin mi zui a duh chuan mahni hrehawm pawisa lo in a kraws pu in mi zui rawh se’ a tih mek laiin mahni nawmsakna tur tello chuan kan zui peih tawhlo a, ringtu te hian mahni nawmsakna tur um chungin kraws put kan tum a, kan uire puipa nen pasala in a chen, nawmchen kan tum a ni ta ber, a ruka va uire mai kan ni ta lo, a lang apauin kan uire a ni tawh zawk, kan huangtau dan hi pui tak a ni, in leh lo neih mai a ni lo, a mawi, a tha, mite awh tham kan duh ta hial a, ‘Tangka Sum ngainat hi sual tinreng bul a ni’ a tih laiin sum ngainat hi sual tinreng chinfelna bul a ni tih kan hriatthiam dan a ni tawh a, aw kan sualna te hian min umpha a ni mai tawhlo, min chiahpiah lutuk a, sualah pawh kan inngai tawhlo, a dan tur reng emaw kan ti hial tawh.

Chutichuan chu Uire nu pawh chu a uire lai tak an man a ni a, a chiang bel bawl a ni ang, amah pawhin thiamthu sawi a tum eihlo niturah ka ngai. Kan tlukloh Uire zu ni tal a chulaiah chuan, a tunhma nun emaw an inchhungkhur dinhmun emaw kan hriatpui lo a, chutiang dinhmuna ding tur chuan a rahbi a lo tleu pawh a nimahna, a vawikhat tihna, a vawikhat uirena chu nilo turah ka ngai, vawikhatnaah na na na hi chuan kan chesual mawh em mai, vawi hnih vawithumna lai pawh ni ta ve ang, chutianga duh hun taka man theiha awm ta chu a tlangnel viau tawh pawh a ni ang e. Chutiang anih vang te pawh chuan a nimahna, thiamthu sawi theiah pawh a inngai tawhlo a ni thei a, amah leh amah a in en a, a thiamlohna a hmu pha ve a ni tawh mahna. Kan tluklohna lai a ni ka ti ve tlat chulai chu.

Keini Uire ve chu kan uire lai tak hi a lang chiang a, mi zawng zawng mithmuhah a lang chiang a, kan pawnlam landan hian kan uire na chu a puangchhuak a, police man a inman ang niloin mi thinlung hian kan uire lai tak hi min man chiang teh zawng a nih hi tiru, Zu ruih lai tak mai min man a, a chiang ang hian, kan eiru lai tak mai chu kan in leh lo hian a puang chhuak a, kan duhamna leh kan hlepruk uirena te chu kan sumdawnnaah a lang chhuak a, kan uirena sual chu kan nupa inkarah a lang chhuak a, kan fa te nena kan inkarah a rah chhuak a, rawngbawltu zawk pawh kan bang chuang em ni, a ban nghet, a ding hram hram, a hma tawng tu tur zawk hi a tlanchhe nasa zawk, a hlau hlau, a thatchhia chhia, khawvel mite thahnemngaih lai a chawlh dan hram zawng, ‘Hlau suh’ tina reng a, hlauh dan tur dap tlat, milem bia ringtu ten an milem an rin aimaha Pathian nung kan nei tih ringzolo tu ni tawh hiala mawi, Pathian nung pawhin a nun zia tarlan ngaihna a hriat theih tawhlohna…. mahse, chutiang taka chianga tarlan, man kan nih tawh hnu pawhin keini zawng kan tawng zuap zuap a, kan insawi thiam a, kan aia thiamlo zawk, tive tho zawk, kan aia tinasa zawk sawi tur kan hria a, chungmite avang chuan thiamthu sawi theiah kan inngai a, mite pawhin an tilo bik hleinem, an eiru lo bik hleinem, an duham lo bik hleinem, aikal an la lo bik hleinem, an inkhawm bik hleinem, kan inchhungkhur khawsak a in anglo em mai, keini anga harsa chu nise keini aiin an ti nasa zawk ang, a hmelchhe em alawm, hmeltha ve se chu a lerh ve tho ang chu kan ti a, Kan insawithiamna hian ram ropui min thlen lo, midangten an tih avanga kan tihve hian thiamthu min thlen lo. Mahni fellohna, mahni uire na hmu theilo khawpa kan mit tihdela a awm hi kan ngawng tawh. A sila silfai mai theih kan ni tawhlo, rawhluma vuak khawh hlawk hlawk kan ngai tawh nih hi.

Chu hmeichhe uire leh nang leh kei hian mahni felna chhuantur kan nei lo, kan chhuan tur awm chhun chu Lal Isua felna chauh a ni kan tih kha, Lal Isua felna kan mamawh dan a inchen chiah kan ti tiraw, chutianga mahni thiamthu sawia kan tawng zuap zuap chuan Lal Isua felna chu kan chhuang em? Lal Isua felna chu chhuangin kan inhria em, Lal Isua felnaah chuan tlulutin kan inhria em? Teuhlo, a lai tak thelhin kan thelh lo, a khawpum thelhin kan thelh, Vanram hi van hmuh theih chin zawng zawng pawh khi nise kan thelh. I felna i chhuan hun hunah i tla thla vang vang kan tih kha, hetiang thiamthu, mahni emaw midangte atanga inkhaikhin emaw a kan tawng zuap zuap hian mahni felna, dikna, thatna kan inhmuh tir a, bumna thangah chiang taka awkin kan tal barh barh mek zawk a ni.

Chuti chung chuan khawia awmah nge kan inngaih, Evi leh Adama ang chiah chiah khan Thingkung phenah, theipui hnaha inthuamin kan biru tih kan inhre thiam em? Bible chuan chu hmeichhia chu a laiah an dintir tih min hrilh a, a va langchiang si em. Mi zawng zawng tiin a inziak a, mi zawng zawng chulai hmuna awmthu chu a awmlo, Bible hi dawt a mi, ni lo, Mi zawng zawng, chulaia awm leh chulaia awmlo te pawhin chu hmeichhe uire na chu an hrethiam, thiamthu sawitur aneihloh zia kha ralkhat atang pawhin, tuna chhiar mek nang leh kei thleng tan hian ka hnar tih tluka a chian avangin mi zawng zawng hmaah a lai taka thiamthu telloin a ding a tihna zawk a ni. Tuna chhiar mek te hi khatih hunlai khan khalai hmunah khan kan awm ve em ni? awmlo, mahse a uirena kha a chiang a, thiamthu sawi tur a neilo tih hretu kan ni ve tlat a, mi zawng zawng hian kan hria a, kan la hre zel bawk dawn.

Kan han sawi hrang hrang fellohna te eirukna te, kan dawihzepna te, kan sumdawnna fello zawng zawng mai hi a lang chiang em em a, a lai takah a ding to lurh mai a, a hmu pha leh hmu pha lo, a thawm ri va hrethiam leh hrethiamlo zawng zawng hmaah uire kan nihna hi a pho chhuak chiang em em a, keini pawh Mi zawng zawng hmaah, a lai takah min dintir a nih hi. Aii puk a thlam ropui hi kan la hmu lo, khawiah nge eng mualah nge a awm pawh kan hre lo, mahse, a thawm thangri lengvel hian eirukna, tu emaw chu a eiru a ni tih hi a tichiang a, chulai hmun chu la hmu lo in, la thleng lo in, la belchiang ve lo mah ila, mi zawng zawng hmaah dintir a ni a, a uire na tarlan a ni tlat.

Bin Ladena te i hmu tawh em ni? Hmu lo, mahse kan hmulo na a, kan hmaah an rawn dinglo na a, a sualna, hel lalpa a nihna te chu kan awmhmun atanga kan lo hriatchian ve tlat avangin mi zawng zawng hmaah a lai taka dintir a ni tlat. Khawvel lehlama chanchin thar ti a kan lo chhiar thin te hian kha mihring a uire kha a lai takah dintirin mi zawng zawng hmaah tih hi a hrilhfiah tiraw. Chu chu alawm mi zawng zawng hmaah a lai taka din hi a awmzia, a fiahna, a tirah chuan keipawhin mi zawng zawng han tih tawl chu ka ti a, a daw deuh em ni nge, thu a uar ve mai mai ni ang ka ti a, mahse, awmze neia mi zawng zawng a tihna a lo ni. Kan Pathian thu hi chu a va hausa thin em, thenkhat hi chu mi zawng zawng hmaah chawimawia kan awm a, lam tang hlir mai nei kan nih lai hian thenkhat hi chu mi zawng zawng hmaah a uire ngei a ni ang tih tura a lama tan ngamlohna tur hi a awm tlat asin.

Chu hmeichhia chu a va vannei em? A chungah khan dan thuneihna kha lek nghal mai chu nise, Lal Isua hmaah a ding tawp lo ang a, daipawnah an khalh chhuak ang a, an deng hlum nghal a ni awm si a, mahse, rorelna hmun an rawn thlenpui tlat mai. Chupawh a thlenna tur hmun dik tak mai, Lal Isua hmaah lehnghal. Amah hian a hrethiam lo, nang tal chuan hrethiam teh khai. Chutia Lal Isua hmaa an rawn hruai a, an han zawh chuan Lal Isua chuan ‘E.. a dik alawm, Dan thu tiboral tura lokal ka ni hleinem, tifamkim tura lokal alawm ka nih, a phu ve reng anih chu, in man chiang kher bawk a, thiamthu sawitur pawh a neihloh tawp chu, hruai chhuak ula, va denghlum ang che u’ han ti ta se, He Bible hi a buai vek ang. Sawifiah thiam silohin Pathian hmangaihna awmzia tur awm i hrethiam uar uar em! Ka sawifiah thiamlo na a, chutia a chhanglo ringawt te chuan Pathian hmangaihna te hi engtin emaw a tifiah uar uar asin.

‘Lalpa, hei a uire lai tak kan man a, dan thu chuan thi turin a chungthu a lo rel tawh a, nangin engtinge i ngaih’ an ti. Dan thu chuan thiamloh a chantir fel dim diam tawh a, a hremna tur pawh lunga denhlum, thih a ni dim diam tawh a, chutianga an thiamlohna nena daipawna hruai chhuah, khawngaihna dawng hmanloa sualin a denhlum tak hi mi za tam an awm asin, nang leh kei chu kan vannei, kan sualna nena Lal Isua hmaa dinna chance kan nei hi lawmthu sawi mai tur kan ni. Thi tur tho tho, nang leh kei hi daipawnah hruaichhuah a awmin, denhlum daih pawh ni ila, min denghlumtu te thiamlohna khan kan thiamchanna tur a paw chhuak chuang si lo a, thenkhat te hi chu kan thi hmel a chhiat dawn dawn nen..thihna duhawm zawk, second chance hmu fiah thei tura Lal Isua hmaa dinna chance kan nei hi ‘Lalpa ka lawm e’ tih mai loh chu sawi tur dang a awm lo. Chatuan atana thiamloh chang tawh, dan thu pawhin thiamloh a chantir dim diam tawh nang leh kei hi a vawihnihna atan Lal Isua hmaah hruai kan lo ni leh ta. Lal Isua rorelna hnuaiah zawk rorelsakin kan awm leh ta. Kan vanneih zia hi kan man thiam ang chu maw

Lal Isuan engtinmah a chhanglo. A kuna leiah a ziak a, enge a ziah tihah ngaihdan siam te an awm, thusawm pek kha a ziak tih te a awm, kei chuan engmah a ziak lo ka ti teh ang. A thai kawi ve mai mai a ni. ‘Dan thu chuan’ tiin Dan thu hmangin judgement/rorelna leh thiamloh chantirna an rawn thehchhuak a, engvangin nge amah Lal Isua bawk chuan Dan thu bawkin a lo judge let leh kher ang. A inhne hnai pawh ka ti lo. ‘A kun a’ a ti, a kun chhan chu te han ti ta ila, hmeichhia chu a en chuan amahah thiamlohna a hmu ang, thiamloh tur a hmu ang, mi kan enin judge an awl em asin. A hmeltha hle mai, a fel hmel hle mai, a sual hmel reuh a, zu in thin a ni maw, kuhve heh tak chu a nih ngei saw, kan va en rual hian engemaw zawng taka judge mai hi a awl riau. Chu Chu Lal Isua khan a duhlo a nih ka va ring em, chu hmeichhia chu a en chuan engemaw ti takin a thiamlohna a hmu dawn si a, anihloh leh chu hmeichhe rawn hruaitu te chu han en se la, an hmel reng mai kha mitmeng thip rem rawm, inzuah buk chhep chhup, an hmel ringawt pawh ‘Lalpa I mi siamte zawng zawng sualin an thim e’ tih sakpui tlak an ni tih chi kha an ni zawk mah ang a, anmahniah an thiamlohna  ahmu ve teuh dawn bawk si a, chu chu a duh chuang bawk si lo a, a kun ta ringawt mai a ni, chutia kun ngawt pawh chu a bul vel boruak a rit nasa mai si a, ngaihtuahloh pawh tum se ngaihtuah loh theih a ni nang, a rilru lakpennan a thaikawi ta mai mai a nih ka ring.

Hei ham.. Pathian that zia hi chu aw, a rilru natthlak zawk. Pathian hmangaihna hi a ril em avangin kan hrethiam lo a ni mai lo a, hriatthiam ngaihna a awmlo hial a, mahse, chu ngaihna awmlo hial lai chu a ropuina a ni bawk si. Kan sawi tak ang khan ‘Ni e, va denghlum rawh u’ ti ta se, Pathian hmangaihna te hi engtin nge kan hrilhfiah tak ang. Lal Isua hian min han en vang vang se, aw kan thiamlohna, kan fellohna, kan han sawi tak zawng zawng bawlhlawhna te hi, a hnen ata kan uirena te hi, amah kan pawm emaw kan intih tlat chunga kan fawmkem dang zawng zawng mai hi a va hmu chiang dawn em? A dik leh fel ni a inhre zawk, a uire lai mantu ni a inngai leh tidik zawk, dan lekkawhtu ni a inngai zawkte pawh min han en se, Kohhrana a rawngbawltu inti zawk, a khaipa inti zawk, a kul ataia Kohhran ban inti zawk te min han se ‘Ka chhiahhlawh Joba’ a tih ang tur hi kan vang ngawt ang tiraw, midang avanga thiam kan inchantirna zawng zawng te, ‘mite pawhin’ kan han tih ang chi zawng zawng avanga kan inthiam chawpna te hi… a va langchiang dawn tak em tiru, mahse, chumi zawng a min judge chu Lalpa thiltum a ni si lo, sualna permit min pe a ni lo, kan sualnaah thiamloh min chantir hi a tum a ni lo a ni zawk e, Chuvang chuan alawm Johana ziakah ‘Pathianin khawvel a hmangaih em em a, chutichuan a Fapa mal neih chhun a pe a, Amah chu tupawh a ring apiang an boralloh a, chatuana Nunna an neih zawk nan, Pathianin khawvel thiamloh chantir turin a Fa khawvelah a tir lo, khawvel amah avanga an dam theihna turin a tir a ni zawk e’ a lo tih ni. A chiang em, chianglo deuh anih chuan tihian chhiar nawn leh ang hmiang, ‘Pathianin uirenu a hmangaih em em a, chutichuan a Fapa mal neih chhun a pe a, Amah chu tupawh a ring apiang an boralloh a, chatuana nunna an neih zawk nan, Pathianin uirenu thiamloh chantir turin a Fa khawvelah a tir lo, Uirenu chu amah Lal Isua avanga a dam theihnan a tir a ni zawk e’ a lo ti anih chu.

Chutichuan nang leh kei, mi zawng zawng hmaa kan uirena lang chiang em em mai, Dan thu leh chhia leh tha hriatna zawng zawngin thiamloh min chantir zan tawh kha Lal Isua hmaah thlen a ni ta. Sual chuan thiamloh min chantir ngei tumin a mupui hmangin min hek mawlh mawlh tawh mai si a, Lal Isua a rawn tawng chhuak a, sualna neilo chuan deng hmasa rawh se a ti.

Lal Isua thuthlukna i ti mai ang. Sualna neilo chuan deng hmasa rawh se. I den hmain sualna i neih leh neihloh in en ve phawt rawh le. Mahni sualna inhmu hmasa rawh. Mahni lam in en rawh. Lal Isua thuthlukna pakhatna chu mahni lam in en a ni ta daih mai. Kan nihna a tira kan sawi kha Sual chi kan ni a, mahni kan in en chuan kan nihna dik tak, sual kan nihna, uire kan nihna kha inhmu thiam turin min duh a ni.

Min hrechiang em em tu pahnih an awm, Pakhat chu Pathian a ni, a hmaah chuan engmah hi thup leh zep a awmlo a, kan lang chiang. Pahnihna chu mahni kan ni. Mahni kan inhriatchian tluk hian tumahin min hrechianglo. Pathian chuan min hmu fiah tawh a, mahni lam inhmufiah ve turin min duh ta.

Kan sawi tak zawng zawng te kha darthlalanga hmangin han in en chhin teh, I pass vek em, Pathian hmaah heng zawng zawng hi chu ka naupan tet ata ka fihlimna vek a ni, hengah hian kei chu ka bawlhlawh ve lo e i ti thei em? Awhna laka filhimin i inhria em? Nangmah i in hmangaih angin i vengte i hmangaih chiah em?

Chutichuan mahni kan han infiah ta a, felna reng neilo, thiamthu sawi tur neilo, sual chi, kan pa pawh Diabola, uire denhlum tur kan nih kan han inhmu ve ta a, I felna i lo chhuan ve thin te chu felna pawh a nilo, chapona mai a ni tih te i lo hrefiah ta. Lalpan mahni inhmuhthiam tir che rawh se, heta ka sawi avanga thleng thei a ni ngawt lo ania, Mahni sualna in hmuhthiam a, mahni inen fiah thiam na chuan a upa ber atanga tana inpaih thawl turin, thehthang bo turin min pui dawn a ni. Mahni inhmuhthiam hma chu, midang hmanga kan in teh chhung chu, midang phena kan bihruk chhung chu, mahni thiamthu theipui hnah thuichawp kan inbel chhung chu keimahni a uire na te hian kian tih ni a nei ngailo ang. Mahni kan inhmuh thiam hnuah erawh chuan pakhat khatin nangmaha i chhuan thinte chu chhuan tlak annih lohzia hriain a bo ta zel a, vawilehkhata fel duak a ni lo, nangmah i ralna zelah fel chi Lal Isua chu a lo thanglian zel ang a, a lo rah zel ang.

A upa ber atanga a te ber thlengin thiamthu sawithei, thiamthu sawi thin ho kha an bo ta zel a, a tawpah thiamthu sawi tur neilo uirenu leh Lal Isua chauh an inhmachhawn ta ang hian, nang leh Isua chauh in awm ta, a tawpah chuan kei leh Lal Isua chauh kan awm ta a nih chu. Mahni kan inhriatchian hnuah chuan, mahni felna chhuan tur kan neilo tih kan inhriatfiah hnuah chuan Lal Isua felna chu kan chhuan tur awmchhun a ni tih kan lo hre ta a, Lal Isua felna chu kan innghahna tur a ni tih kan lo hrethiam ta a, Lal Isua felna chu kan rin tur awmchhun a ni tih kan lo hre ta a, Amah leh Mahni bak kan awm takloh hnu chuan Lal Isua felna lo chu chhuan tur dang kan neihloh pawh kan lo hrethiam ta.

Uire nu hmaa mi ding teuh kha an tlem tial tial avangin chu uire nu chu a fel tial tial lo, thiamthu sawi theih a neih belh telh telh lo, ‘kha a ni pawh engmah a ni bik lo a, a chhuah leh tawh saw, saw pawh.. saw pawh, ka tih reng kha, ka sual bik viauah i ngai a’ a ti zawt zawt lo, kan thiamthu chu keimahni a sual kiam zelah a ni lo a, zu in kan sim takah a ni lo a, kuhva ei ka sim takah a ni lo a, keini aia sual kawh tur kan neihah a ni lo a, midang ti ve tho an awmah a ni lo a, eiru ve tho an awmah a ni lo a, Amah Isua chu kan thiamthu a ni zawk, midang sualna leh bawlhhlawhna, uire na zawng zawngte chu thiamthu min sawitirtu nilo in mahni min inhmuhthiamtirtu a lo ni zawk, mahni kan inhmuhthiamna kha Lal Isua a min tlukluhtirtu, Lal Isua min rintirtu a lo ni zawk tur a ni, Lal Isua hmaa min dintirtu a lo ni zawk ang a, Chuta tang zel chuan, mahni kan ral zelnaah chuan tumahin thiamloh min chantir lo ang,  a tawpah ‘Kei pawhin thiamloh ka chantir lo a che, kal la tunhnuah tisual leh tawh suh’ min ti zel tawh zawk dawn a ni.

‘Kal la tunhnuah tisual leh tawh suh’ a tih hi ‘Tun hnuah chuan uire tawh suh’ a ti lo, ‘tun hnuah zu in tawh suh’ a ti lo, tunhnuah ‘eiru tawh suh’ a ti lo, Ui kawlh mi seh ching hi i thlunbeh chhung chu tumah a seh lo ang, thlunbeh anih avang khan che thei heklo mawle, a sehloh avang khan chu ui chu ui fel a nih phah ta em ni, Ni bawk hek lo. mahse chu ui chu tifing in ti zaidam ta la, chhuah eng ang pawh ni la mi a seh tawh lo ang. Hrui hmangin, ti suh, Dan hmangin chutichuan tih tur, tih loh tur hmangin kan inthlung bet a, Zu hi sual a ni tih hmangin kan inthlung bet a, kan inthlunbehna hrui te chu kan tal mar pawp pawp fo mai a, engemaw chen chu min veng ve ngei mai tak e, mahse chu formula ‘ei suh’ tih kha Eden huan atang reng khan a Fail chiang tawh a, chu fail na Dan chu apply thar leh tum hian awmzia a nei lo. Lalpa hian chu fail formula chu he hmeichhia chungah pawh hian a rawn apply leh hi ring suh

Ui kawlh mi seh ching chu tihfin a, tih zaidam zawk tur a ni. Chutichuan mi te tihkhai kha mite ngainat a lo ni tawh ang. Uire nu chu a uire theihlohna tur atana ven lam a ni lo, khuahkhirh lam a ni lo, a uire na thinlung kha tih fin a, thlak danglam lam a ni zawk e. Chu chuan uire na tur chance pawh nei eng sateh mahse, a uire tir lo dawn a lo ni. Zu va inleh tawh ngailoh te, va eiruk leh tawhlo te, va sual leh tawhlo te hi kan felna a ni mai mai lo. Permit kan inpe a ni lo kan tih tawh kha. Kan sawi tak zawk chu maw, a tira kan sawi, a thuhmahruai, mahni felna kan chhuanna kha, kha kha kan tihsual lian ber a ni a, khatah khan va tisual leh tawh suh kan inti duh a ni.

An felna an hmuh len avangin uire nu rawn man tu zawng zawngte khan anmahni uirena an hmuthiam lo a lo ni a, mahse Lal Isuan ‘Sualna neilo chuan deng rawh se’ an tih takah chuan mahni felna chhuan tur an lo nei biklo tih kha an hrethiam ta chiah a, an relhbo zo ta ang khan mahni felna kan chhuan avang hian, mahni sualna kan hmuh thiamloh avang hian Lal Isua felnaa intukluh lam kan hrethiam lo thin a, mahse, mahni kan inhmuh thiam hnu ah mahni felna bawk chhuang turin fel kan zir thar leh ang maw? Chu tah bawk chuan kan tisual leh dawn em ni? Kan felna kan chhuan vang hian midang kan hmu sual a, mi sualna atangin kan in khaikhin a, fello pui pawh felah kan inchhuah lui tlat thin kha a ni a, chu chu va chhuang leh tawh suh kan inti a ni.

Chutianga mahni kan in en let a, kan fellohna kan hmuhthiamna zel chuan ‘bawih thahnemlo ka ni e’ min tihtir thin a, kan thawktha hle ni a kan inhriat pawhin ‘thiamthu sawi thei ka ni lo e’ kan ti thin anih hi. Miten ‘a fel asin’ an tih pawhin Lal Isua hmaah kan in dintir a, mahni lam kan in en a, kan fellohna chuan Lalpa felnaah min tlukluhtir zel zawk a nih hi, mi inkhawmloh laia i inkhawm hian i felna chhuangin tisual leh tawh suh, mi te eiruk leh duhamnaa an inhai buai laiin hreawm taka dik leh fel taka i thawh bik avangin, chu mahni felna chu chhuangin tisual leh tawh suh, mi chu zu leh ruihhlo nena an nawmchen laiin mahni intihreawmin i in veng fimkhur tih mahni inhriain i felna chhuangin tisual leh tawh suh, chu chu i hriatthiam ngat chuan i thiltihah tibik inih i inhre ngam tawh ngailo ang a, i tihlohah pawh, i tlinlohnaah pawh i tihlohna, i zawmlohna chuan thiamloh a chantir nawn awn awn lo ang che ang a, Lal Isua felnaah zel i tlu lut thin dawn a lo ni.

Chutiang chuan mahni lam i ral zel ang a, nangmah ni tawhloin chi thar Lal Isua kha a lo thanglian zel ang a, nangmaha nung Lal Isua kung kha a lo rah thuah thuah dawn a lo ni zawk. Cocunut hi theihai in rah tum tlat se, a va hahthlak dawn em? Lal Isua chi leh kung ni hawtloa rah tha a rah kan tum thin hi a hahthlak, keimahni zawk hi ral ila, intulut zel ila, Lal Isua chi thar zawk chu a lo puitling ang a, a lo rah chho mai dawn alawm, ka fel ta, ka famkim ta ka ti lo, ka la fello, ka sualna te pawh a lo lang chhuak fo, mahse chung chuan min phetthlu ngailo ang, min phehthluk ahnekin chhuan tur thar ka neih Lal Isua felnaah min umlut zawk thin a, ‘bawih thahnemlo ka ni e’ kan ti leh thin a nih hi. Chutiang taka mahni kan inhriatfiah a, Lal Isua felnaa kan tlukluh zelna chuan ‘Kei pawhin thiamloh ka chantir lo a che, kal la, tisual leh tawh suh (I felna hnawl a, keima felnaa tlukluh hi rawn chhunzawm zel rawh)’ tih hi min lo hlawhchhuah tir zawk a lo ni.

Chu uire nu chuan thiamchang ka ni ta a ti lo, thiamloh chantir a ni lo tih erawh a inhria ang hian, Thiamchang tih leh thiamlohnaah thiamloh chantir a ni lo tih hi a dang daih tih te pawh hre tel ta ila, Thiamchang tih chuan thiamlohna neilo tihna a ni, chu uire nu leh keini erawh chuan thiamchang dinhmun hi kan luah pha lo, mahse, thiamloh chang ni mahila, thiamloh chantir erawh kan ni si lo, thiam kan chang ta nilo in, kan thiamlohnaah thiamloh chantir kan ni lo, ngaihdam kan ni, chu ngaihdam nih inhriatna zawk kha kan chhuan leh kan innghahna tur a lo ni, chuta tang zawk chuan alawm kan nun hi a tlawm theih thin. Thiamchang chuan chhuan tur a nei a ni, keini erawh chuan chhuan tur kan nei lo. Chhuan tur neilo hian kan chhuan tur awmchhun Lal Isua hi chhuang mai ila a lo fel mai zawk a lo ni. Mahni felna chhuan bansana Lal Isua felnaa kan tlukluh zel theihnan Lalpan a thu kan zavaia tanah mal min sawmsak rawh se. Amen.