Tin, an mi sual khai pakhat chuan Isua a hau va, “Krista chu i ni lo vem ni? Intidam la, keini pawh min tidam ta che,” a ti a. Nimahsela pakhat chuan chhan pahin a zilhhau va, “Pathian meuh pawh i hlau na nge? Thuhmun rengin an hrem che hi. Keini zawng hremzia reng kan ni; kan thiltih man chauh hmu kan nih hi; he mi hi zawngin engmah a tisual si lo,” a ti a. Tin, “Isu, i ram i thlen hunah mi hre reng ang che,” a ti a. Tin, ani chuan a hnênah, “Tih tak meuhvin ka hrilh a che, vawiinah hian ka hnênah Paradis-ah i awm ve ang,” a ti a. (Luka 23:39)
Misual kan nih chu inhrilh leh hranpa kan ngai lo. Bible hi awm lo mahse, Pathian hian kan sualna te min puansak dum dum lo mahse, thuhriltu ten Eden huan kaihnawih sualna min aukhum fo lo mahse, kan sual ve hrim hrim. Kan mihring mizia hian sual hi a hranpa in zir lo mahse, sual dan tur hi eng lehkhabuah mah chhiar tur awm kherlo mahse, kan sual ve hrim hrim. Kan chenhona khawvelah ah, kan inthenawmnaah, kan inhmelhriatnaah te hian pawnlam langtheiin kan innunsiak a, meng leh meng hi kan inbum suau suau a, mahni te thlengin kan inbum tel bawk a, kan sual ve ngawt mai.
Hmangaihna kan atchilh mek lai hian ‘hmangaih tlak pawh hi kan awm tak tak ang em aw’ tih te pawh ngaihtuah tham a ni a, kan inhmangaih danah mahni inhmangaihna a tel tlat zel a, chu chu Kalvari tlanga khenbeh pahnih te hian min zirtir a tum te pawh niin ka hre hial! He huna mi pahnih khenbeha an lo awm ve kher kher hi chhuizui ta ila, a chhan leh vang emaw, a entir tum emaw, khenbeh ve te rilru leh ngaihtuahna tak tak chu kan zu hrethiam pha tawh hauh lo ang a, an thukhawchang zawk hi han sawi zui lawk teh ang.
Pakhat zawk chuan ‘Krista chu I ni lo vem ni? Intidam la, keini pawh min tidam ta che’ a ti a, a sawina rilru awm tur han chhuizui ta deuh ila, Ani hi zawngin mahni lam inen a, mahni leh mahni darthlalanga inhmuh chu a la hlat hmel khawp mai. A tunhma hun chu kan hriatsak lo, mahse ‘misual thiamloh chantir tlak’ niturin a nun a lo hmang liam ve tawh a, chung hun liamta chu thlir a, inchhir a, ‘nun kawng dik ka lo zawh ta lo kha’ tih lam ai chuan thinrim hrikthlakna tur zawng, puhmawh tur dap, mahni thiamlohnaah pawh midang mawhpuh tur zawng tlat, tihdam ngai, tanpui ngai, chhanchhuah ngai anih a inhre em em, mahse mahni lam tih tur erawh ngaihtuah leh der si lo, chu ngaihdan atang chuan a tidam theitu a bul maia awm reng si, engti bawk si lo chu a va thiamlo lehling ta. Mahse, hei hi keini kan nihna pawh a lo ni reng lo maw! Heti zawng hian ngaihtuahna seng teh ang!
Kan mimal nunah, kan chhungkaw nunah, kan khawtlangah he hri thalo hi kan la chhawm nung zel a, nu leh paten anmahni inen lo in, an fate kawngdika kal turin an beisei a, an fate avangin chhungkua an buai niin an hria a, ‘intidam ula, keini pawh mintidam ta che u; nun kawng dik leh fel chu zawh ula, keini pawh nun nuamin kan nung ang chu’ an ti a, an fate lah chuan an nu leh pate ‘intidam ula, keini pawh min tidam ula; Enge in nih chuan bik, entawn turin nung ula, keini min thiamlo hmasa ngawt lo hian’ an ti ve bawk a, khawtlang hruaitu ten ‘kan ram rorel tura kan thlanchhuah te hian hetia min hruai tlat chuan’ an tih laiin kan rorel tu te chuan ‘mipuite hian an zir ngang si lo a’ an ti a, ‘Intidam ula, keini pawh min tidam ta che u’ tih thunawn hi kan hria emaw hrelo emaw kan aupui nitin chu a ni.
Khenbeh misual pakhat zawk chuan a hau a, ‘Mahni lam inen hmasa lo a, chutia i thiamloh ngawt, keini chu hremzia reng kan nih laiin Ani chuan engmah a tisual hleinem’ a ti a, Ni e, hei hi kan damna thunawn zawk chu a ni dawn. Thunawn diklo zawk kan insak khum chhung chuan damna tak leh thiamchanna tak hi kan pawh dawn lo a, Van khawpui pawh khi kan kik hawng zo kher lo maithei ania. Kan damna tura tuartu ngei pawh hian mahni lam kan inthlir thiam phawt loh chuan min chhang lo mai ang a!
Hawh teh u, kan thiamchanna Kalvari tlang hi thlir dan dangin in thlir teh ang. Misual pahnih ni tawh lo in, mi pakhat chauh, dinglamah nangmah, nangmah vek veilamah, i duhthlanna erawh chuan dinglam emaw veilam emaw ah a khengbet dawn che. Khawilam zawkah emaw midang hmuh kan tum thin a, a ni lo, veilam emaw dinglamah emaw midang hmuh i tum tlat chuan mahni i inhmu thei dawn lo. Tunah khan khawilamah nge i awm tih nangmah ngeiin ngaihtuah la, khenbeha i awmna lam kha sawn ngai i ni em tih mahni ngei inen ang che.
Misual thiamchantir tlak kan lo niha, chatuan thutiam ‘vawiinah ka hnenah Paradisah i awm ve ang’ tih chu kan chan theuh theih nan mahni i inen thin ang u.
No comments:
Post a Comment