Tun laia tuarnate hi nakina kan chunga ropuina tihlan tur nen chuan tehkhin thamah ka ruat si lo. Thil siam zawng zawngte chuan beisei em emin, Pathian fate lo lanna chu an nghakhlel hle si. Thil siam zawng zawngte chu …. Chhiatna bawih atan tihchhuahin an awm ang a, Pathian fate zalenna ropuiah chuan an lut dawn si a… chu chang a ni lo a, keini ngei pawh, Thlarau hmahruai neitu te hian, fa kan nihna nghakin, keini meuh pawh kan rilruin kan rum bawk si (Rom 8:18)
Kan tunlai mihring nun hi a hmanhmawh ta khawp mai. Engkim hi thleng zung zung mai turin kan duh tawh a, engmah hi kan nghak veng veng thei tawh lo. Kan nitin nun hi han chhui let ila, hmanhmawh tulna awm lemloah pawh hian kan phi chung tawh a, khawilo kan kal pawhin thlen thuai thuai kan duh a, eng ilo tih nikhua nise zawh vat vat kan duh a, Pathian ngei pawh hi kan dilna te min tihhlawhtlin sak zung zung turin kan duh. Science lam thiamna atanga kan zirchhuah ‘A thei thei din channa khawvel’ khan kan nun hi min kaihruai a nih hmel a, a hnuaihnung zawka kan awm lohna tur leh mi hnunga kawl ek thai kan nihloh nan hian kan hmanhleh niberin a hriat.
Chutiang taka nun hman chu a sual reng em? Thil reng reng hian thatna leh thatlohna a nei vek mai a, thil tha lo pawh hian thatna chhete chu a lo nei thin a, chu a thatna hman thiam chuan thil tha tak a ni thei. Hmanhmawh bakleng leh nghakhlel taka kan nun hian a tha zawngin min kaihruai se, kan nitin nunah te, kan thlarau nunah te, midangte nena kan chenhona khawvelah te malsawmna min thlen ang. Midangte Pathian hnena hruai kawngah te hian hmanhlel ila, Kan mimal leh chhungkaw nun a thatna tur hian hmanhlel ila, khawtlang leh ram damna tur hian hmanhlel ila kan va nihlawh dawn em!
Anihna takah chuan heti taka kan hmanhlel hian midangte min nekbeh tir a ni. Thil tha taka hman theih kha a tha lo zawngin kan hmang a, mi hnunga kan tlan lohnan midangte kan nekbet a, mi thlarau nun chawikan ai chuan mahni tanghma haiin kan buai a, midangtan chuan sawiloh Pathian tan pawh hian hun kan pe hman ta meuh lo. Kan ram leh khawtlang thatna te pawh hi mahni changkan nan leh midangte an san lutuk bik lohnan kan duh a, thahnem kan ngai mai mai. A thatna duh tak tak chu ni ila, heti hian kan awm suau suau lo tawp ang. Hlep nei turin kan thawhna pakhat ve mai a ni.
Mahni leh mahni inbum hi a lo awmtheih khawp mai. Thil reng reng chu kan duh tak tak anih chuan tawrh leh chan huamin kan bei thin a, a hlawhtling nge nge bawk thin. Kan beisei leh hmathlir hi mahni inhaivurna anih chhung chu a kawr atan ‘midang tana malsawmna’ tih hi hmang thin mah ila, midang tana hnawksak leh ninawm mai a ni reng ang. Pathian kan biak leh zuina kawngah pawh hian engvanga hmasawn theilo nge kan nih kan inhre vek mai. Mite hian kan nun min chhiar a, min hrechiang em a, kan sawi leh kan thawh te hian nghawng a nei theilo thin a ni.
A tawp berah hetiang taka kan hmanhlel hian khawi hmun nge min thlen ang tih pawh hi kan ngaihtuah tel a pawimawh. Kan beisei leh nghahhlel ber tur chu kan zavai atana zalenna ni, chatuan atana kan chhandamna ni tur a ni a, he khawvel thil tam tak kan buaipui lai hian kan nghahhlel ber tur hi kan lo theihnghilh dah ang e. Khawvel thil atana kan beihna zawng zawng hian khawi hmun mah min thlen dawn lo a, he khawvel hun reilote atan chuan min lo chhawk zangkhai a ni thei, chatuan atan engmah min hnutchhiah dawn lo a, kan inchhirna mai tur hian kan lo hah thlawn ang e.
No comments:
Post a Comment